أَيُوبْ 12

ثَامْوَارِّيثْ ن أَيُوبْ خْ صُوفَارْ

‏1 يَارَّا-د أَيُوبْ، إِنَّا:

‏2 ذ ثِيذتّْ، كنِّيوْ ذ إِجّْ ن دَّارْبْ ن ڒْڭنْسْ،

أَقَا ثِيغِيثْ أَذْ ثمّثْ أَكِيذْومْ!

‏3 نشّْ غَارِي إِجّْ ن وُوڒْ أَمْ كنِّيوْ،

نشّْ وَارْ وطِّيغْ ذڭْ ؤُمْقُوذِّي أَكِيذْومْ.

وِي وَارْ إِسِّيننْ مَارَّا مَانْ أَيَا؟

‏4 نشّْ أَمْ ونِّي إِدْجَانْ إِ ثْسضْحَاشْ إِ ؤُمدُّوكّڒْ نّسْ،

نشّْ ذ ونِّي ثُوغَا إِتّْڒَاغَانْ غَارْ أَربِّي، ؤُشَا خنِّي نتَّا إِسْڒَا،

نشّْ ذ أَمْسڭّذْ ذ ونِّي إِكمْڒنْ، أَقَا ذوْڒغْ ذ ڒْقشْعثْ ن ثْسضْحَاشْثْ.   

‏5 ’ڒْحڭْرَا ذ ثَاسْغَارْثْ ن ونِّي إِتّْوَارْژَانْ!‘،

أَمُّو إِ إِتّْخَارَّاصنْ يِينِّي ؤُمِي إِتّْغِيڒْ أَقَا أَثنْ ذِي ڒَامَانْ،

إِتّْغِيڒْ أَسنْ أَيَا إِتّْرَاجَا إِنِّي إِتّْنقْرَاضنْ ذڭْ إِضَارنْ نْسنْ.

‏6 إِقِيضَانْ ن إِمْثحَّايّنْ أَرْسَانْ،

ؤُ إِنِّي إِسعَّارنْ أَربِّي غَارْسنْ أَطَّاسْ ن ڒَامَانْ.

مَاشَا وِي إِزمَّارنْ أَذْ يَاوِي أَربِّي س ؤُفُوسْ نّسْ؟   

‏7 سقْسَا خنِّي ڒْمَاڒْ، أَذْ أَشْ ث سّْڒمْذنْ،

ؤُ إِجْضَاضْ ن ؤُجنَّا أَذْ شكْ ث حَاجَانْ.

‏8 نِيغْ خزَّارغْ مْلِيحْ غَارْ ثمُّورْثْ، ؤُ نتَّاثْ أَذْ شكْ ثسّْغَارْ،

ؤُڒَا ذ إِسڒْمَانْ ن ڒبْحَارْ أَذْ أَشْ ث عَاوْذنْ.

‏9 مَانْ ونْ وَارْ إِسِّيننْ مَارَّا أَيَا،

أَقَا أَفُوسْ ن سِيذِي إِ ث إِڭِّينْ؟

‏10 نتَّا ذ ونِّي ذڭْ ؤُفُوسْ نّسْ إِدْجْ ڒعْمَارْ ن مَارَّا مِينْ إِدَّارنْ،

ؤُڒَا ذ بُوحْبڒْ ن كُوڒْ أَرِّيمثْ ن بْنَاذمْ.

‏11 مَا وَارْ إِتّْقدْجِيبْ ؤُمزُّوغْ أَوَاڒنْ،

أَمْ إِتّْقَاسَا وَانغْ مَاشَّا؟   

‏12 غَارْ إِوسُّورَا إِ ثدْجْ ثِيغِيثْ،

ؤُ ذِي ثُوذَارْثْ ثَازِيرَارْثْ ثدْجْ ڒفْهَامثْ.

‏13 نتَّا غَارسْ إِ ثدْجْ ثِيغِيثْ ذ جّهْذْ،

نتَّا غَارسْ شّْوَارْ ذ ڒفْهَامثْ.

‏14 خْزَارْ، مَاڒَا نتَّا إِهدّمْ، وَارْ إِبنِّي ؤُڒَا ذ إِجّْ عَاوذْ،

مَاڒَا نتَّا إِبلّعْ خْ شَا ن يِيجّنْ، وَارْ ذ أَسْ يَارزّمْ عَاذْ.   

‏15 خْزَارْ، مَاڒَا نتَّا إِسّْبدّْ أَمَانْ، أَذْ أَژْغنْ نِيثْنِي،

مَاڒَا يَارْخُو أَسنْ، أَذْ سّنْقڒْبنْ ثَامُّورْثْ.

‏16 نتَّا غَارسْ جّهْذْ ذ ؤُفكِّي،

نّسْ ذ ونِّي إِودَّارنْ ؤُڒَا ذ ونِّي إِسّْودَّارنْ.

‏17 نتَّا إِتّجَّا إِرْيَازنْ ن شّْوَارْ ڭُّورنْ س ڒحْفَا،

ڒْقُوضَاثْ إِتَّارَّا إِ-ثنْ ذ إِپُوهَاڒِييّنْ.   

‏18 أَزِييَّارْ ن إِجدْجِيذنْ إِسّْبطّڒْ إِ-ث،

ؤُ خنِّي نتَّا إِتّْشدَّا إِ-ثنْ س إِجّْ ن وبْيَاسْ زِي ثجْعِينَّا نْسنْ.

‏19 نتَّا إِندّهْ إِكهَّاننْ س ڒحْفَا،

أَيْثْ ن جّهْذْ إِغطّرْ إِ-ثنْ.

‏20 إِتّكّسْ أَوَاڒْ إِ إِرْيَازنْ إِتّْوَاقدْجْبنْ،

إِ إِوسُّورَا إِتّكّسْ أَسنْ ڒفْهَامثْ.   

‏21 أَسحْقَارْ إِتّْزدْجَاعْ إِ-ث خْ ثَارْوَا ن ثَاصِيڒثْ،

إِ أَيْثْ ن بُو-ڒخْشُونثْ إِسَّارخُّو أَسنْ أَبْيَاسْ.   

‏22 إِمُوشَانْ يُودْجْغنْ ن ثَادْجسْثْ إِتّْعَارَّا خَاسنْ،

ذ ثِيڒِي ن ڒْموْثْ إِسُّوفُّوغْ إِ-ت غَارْ ثْفَاوْثْ.   

‏23 ڒڭْنُوسْ إِس أمْغَارْ إِ-ثنْ ؤُشَا إِغطّرْ إِ-ثنْ،

نتَّا إِتّْبزَّاعْ ڒڭْنُوسْ ؤُشَا إِندّحْ إِ-ثنْ.  

‏24 إِتّكّسْ ؤُڒْ إِ إِزدْجِيفنْ ن ڒْڭنْسْ خْ ثمُّورْثْ،

إِسّْودَّارْ إِ-ثنْ ذِي ثْنزْرُوفْثْ مَانِي وَارْ إِدْجِي وبْرِيذْ.   

‏25 نِيثْنِي ثمْهَافَانْ ذَا ذ ذِيهَا ذِي ثَادْجسْثْ، مَانِي وَارْ ثدْجِي ثْفَاوْثْ،

نتَّا إِتّجَّا إِ-ثنْ أَذْ مْهَافَانْ أَمْ إِمسْشَارْأنْ.