أَيُوبْ 8

ڒْحَارْذْ أَمزْوَارُو ن بِيلْذَاذْ أَكْ-ذ أَيُوبْ

‏1 خَاسْ ؤُشَا يَارَّا-د بِيلْذَاذْ، ونِّي د-يُوسِينْ زِي شُوحَا، إِنَّا:

‏2 مشْحَاڒْ إِ غَا ثكّذْ ثسَّاوَاڒذْ أَمُّو،

أَذْ إِڒِينْ وَاوَاڒنْ ن ؤُقمُّومْ نّكْ أَمشْنَاوْ أَصمِّيضْ ن ثْهَارْيَاضْثْ.

‏3 مَا أَذْ إِسّْفَارْغْ أَربِّي ثَاسْغَارْثْ،

نِيغْ أَذْ إِسّْفَارْغْ ؤُمْزمَّارْ خْ كُوڒْشِي ثَاسڭْذَا؟   

‏4 مَاڒَا أَكِيذسْ خْضَانْ إِحنْجِيرنْ نّكْ،

أَقَا إِسّكّْ إِ-ثنْ ذڭْ ؤُفُوسْ ن ؤُخطُّو نْسنْ.

‏5 مَاڒَا شكْ ثَارزُّوذْ أَربِّي س جّهْذْ،

ؤُ ثتّْزَاوْڭذْ أَحِينِّي غَارْ ؤُمْزمَّارْ خْ كُوڒْشِي،   

‏6 مَاڒَا ثدْجِيذْ ذ أَمزْذَاڭْ ؤُ ثْسڭّْمذْ،

خنِّي أَذْ أَشْ إِوْشَا ثَايْنِيثْ نِيشَانْ،

أَذْ إِعْذڒْ ثَازذِّيغْثْ نّكْ إِ شكْ.

‏7 ثَامزْوَارُوثْ نّكْ أَذْ ثِيڒِي ذ ثُوقْڒِيتْشْ،

مَاشَا ثَانڭَّارُوثْ نّكْ أَذْ ثِيڒِي ثمْغَارْ.

‏8 وَاهْ، سقْسَا خنِّي غَارْ جِّيڒْ إِعْذُونْ،

تّْحكَّارذْ ذِي ڒجْذُوذْ نْسنْ.   

‏9 مَاغَارْ نشِّينْ ن إِضنَّاضْ وَاهَا، وَارْ نسِّينْ وَالُو،

مَاغَارْ ؤُسَّانْ نّغْ خْ ثمُّورْثْ أَمْ ثِيڒِي.   

‏10 مَا وَارْ شكْ سّڒْمِيذنْ نِيثْنِي، مَا وَارْ غَاركْ سِّيوِيڒنْ،

مَا وَارْ د-سُّوفُّوغنْ أَوَاڒنْ زڭْ وُوڒْ نْسنْ؟

‏11 مَا إِغمِّي ؤُغَانِيمْ ن بَابِيرُوسْ بْڒَا سّبْخثْ،

مَا أَذْ إِمْغَارْ ؤُغَانِيمْ غَارْ ثْمَا ن يغْزَارْ بْڒَا أَمَانْ؟

‏12 خْمِي إِتّْنوَّارْ، وَارْ إِمْجَارْ عَاذْ،

إِتَّاژغْ قْبڒْ مَارَّا أَرّْبِيعْ نّغْنِي.   

‏13 أَمُّو إِ دْجَانْ إِمسْرَاقْ ن مَارَّا إِنِّي إِتُّونْ أَربِّي،

ڒَايَاسْ ن ؤُمْنَافقْ أَذْ إِفْنَا.     

‏14 مِينْ خفْ إِعمّذْ، أَذْ إِتّْوَاقْضعْ،

مِينْ خفْ إِتّْشَاڒْ، أَذْ د-إِبَانْ ذ أَخْمَاڒْ ن قُونْذْعَا.

‏15 أَذْ إِسنّذْ خْ ثَادَّارْثْ نّسْ، مَاشَا وَارْ ثتّْبذِّي،

أَذْ ذَايسْ إِشبَّارْ، مَاشَا وَارْ ثتّْغِيمِي ثْبدّْ.

‏16 نتَّا ذ أَزِيزَا ذِي ثْفَاوْثْ ن ثْفُوشْثْ،

ؤُ ڒفْرُوعْ نّسْ إِمژْيَاننْ تّْبزَّاعنْ خْ وحْوِيشْ نّسْ.

‏17 إِژوْرَانْ نّسْ مُّوذنْ إِخفْ نْسنْ خْ إِجّْ ن ؤُعُورِّيشْ ن يژْرَا،

إِتَّارْجَا إِشْثْ ن ثَادَّارْثْ ن يژْرَا إِ يِيخفْ نّسْ.

‏18 مَاڒَا نتَّا إِقدْجعْ إِ-ث زڭْ ومْشَانْ نّسْ،

أَذْ ث إِنْكَارْ ومْشَانْ نِّي، أَذْ يِينِي: ’عمَّارْصْ وَارْ شكْ ژْرِيغْ!‘

‏19 خْزَارْ، ثَا ثدْجْ ذ ڒفْرَاحثْ ن وبْرِيذْ ن ثُوذَارْثْ نّسْ

ؤُ إِنّغْنِي أَذْ غمْينْ زڭْ ؤُشَاڒْ.

‏20 خْزَارْ، أَربِّي وَارْ إِنطَّارْ ونِّي إِكمْڒنْ

ؤُ وَارْ إِتِّيشْ أَفُوسْ إِ إِعفَّاننْ.

‏21 عَاذْ أَذْ إِشُّورْ أَقمُّومْ نّكْ س ثْضحَّاشْثْ،

ؤُ إِينْشِيشنْ نّكْ س ؤُسْڒِيوْڒوْ.

‏22 إِمشْرَاهْ نّكْ أَذْ يَارْضنْ ڒفْضِيحثْ،

ؤُ أَقِيضُونْ ن إِعفَّاننْ وَارْ إِتِّيڒِي عَاذْ.