36
1 بَاصَالِييِيلْ ذ أَهُولِييَابْ ذ كُوڒْ أَرْيَازْ س وُوڒْ أَمِيغِيسْ، ؤُمِي إِوْشَا سِيذِي ثِيغِيثْ ذ ڒعْقڒْ مَاحنْذْ أَذْ سّْننْ مَامّشْ إِ غَا ڭّنْ مَارَّا ڒْخذْمثْ إِ ثْسخَّارْثْ ن زَّاوشْثْ إِقدّْسنْ، ڭِّينْ مَارَّا أَمْ مَامّشْ ثنْ يُومُورْ سِيذِي. 2 مُوسَا إِڒَاغَا-د إِ بَاصَالِييِيلْ ذ أَهُولِييَابْ ذ كُوڒْ أَرْيَازْ س وُوڒْ أَمِيغِيسْ، ؤُمِي إِڭَّا سِيذِي ثِيغِيثْ ذڭْ وُوڒْ نّسْ، ؤُڒَا مَارَّا ونِّي ؤُمِي إِنْهزّْ وُوڒْ نّسْ، مَاحنْذْ أَذْ د-يَاسْ غَارْ ڒْخذْمثْ ؤُشَا أَذْ ت إِڭّْ. 3 نِيثْنِي كْسِينْ زِي زَّاثْ ن وُوذمْ ن مُوسَا مَارَّا ثَاوْهِيبْثْ نِّي سّْڭعّْذنْ أَيْثْ ن إِسْرَائِيل إِ ڒْخذْمثْ إِ ثْسخَّارْثْ ن زَّاوشْثْ إِقدّْسنْ مَاحنْذْ أَذْ زَّايسْ ت ڭّنْ. ؤُشَا أَقَا عَاذْ ڭِّينْ أَذْ أَسْ د-أَوْينْ كُوڒْ ضّْبحْ ثِيوْهِيبِينْ س ڒْخَاضَارْ. 4 خنِّي ؤُسِينْ-د مَارَّا إِرْيَازنْ إِمِيغِيسنْ، إِنِّي ثُوغَا إِشغْڒنْ خْ مَارَّا ڒْخذْمثْ ن زَّاوشْثْ إِقدّْسنْ، كُوڒْ إِجّْ زِي ڒْخذْمثْ نِّي ڭِّينْ نِيثْنِي، ▫ 5 ؤُشَا سِّيوْڒنْ أَكْ-ذ مُوسَا، نَّانْ: ”ڒْڭنْسْ يِيوِي-د كْثَارْ زِي مِينْ إِتّْخصَّانْ ذِي طّْوعْ نْ ڒْخذْمثْ نِّي إِ ذ أَنغْ يُومُورْ سِيذِي حِيمَا أَذْ ت نڭّْ.“ 6 خنِّي يُومُورْ مُوسَا حِيمَا أَذْ بَارّْحنْ ذِي ڒْمَارْڭحْ ن ڒْعسْكَارْ، أَذْ إِنِينْ: ”وَارْ ثجِّي أَرْيَازْ نِيغْ ثَامْغَارْثْ عَاذْ أَذْ يڭّْ شَا ن ڒْخذْمثْ ثنِّي إِ غَا إِسّْڭعّذْ ذ ثَاوْهِيبْثْ إِ زَّاوشْثْ إِقدّْسنْ!“ أَمُّو إِ إِسّْبدّْ مُوسَا ڒْڭنْسْ أَذْ يَاوِي عَاذْ كْثَارْ، 7 مِينْزِي شْفَا ثِيمسْڒَايِينْ نِّي د-إِوْينْ إِ مَارَّا ڒْخذْمثْ إِ غَا ڭّنْ، أَقَا ثْشطّْ عَاذْ كْثَارْ.
8 جَارْ ينِّي غَارْ ثُوغَا ڒْخذْمثْ، أَقَا مَارَّا إِمِيغِيسنْ ن وُوڒْ ڭِّينْ ثَازذِّيغْثْ زِي عشْرَا ن ثْجَارْثِيڒِينْ ن ڒقْطنْ أَزْذَاذْ إِمُوذنْ ؤُ زڭْ ؤُفِيڒُو أَذحْمِي ذ ؤُرْجُووَانِي ذ ؤُزڭّْوَاغْ إِحذْقنْ أَكْ-ذ إِكِيرُوبنْ إِنِّي خَاسنْثْ إِڭَّا أَمْ إِجّْ ن وَارْشَامْ ن ؤُفنَّانْ. ▫ 9 ثُوزّڭَّارْثْ ن إِشْثْ ن ثْجَارْثِيڒْثْ ثُوغَا-ت ثْمنْثْعَاشْ ن إِغَادْجنْ ؤُ ثِيرُو ن إِشْثْ ن ثْجَارْثِيڒْثْ ثُوغَا-ث أَربْعَا ن إِغَادْجنْ ؤُ مَارَّا ثِيجَارْثِيڒِينْ غَارْسنْثْ ذ ڒعْبَارْ ذ إِجّْ. ▪
10 إِسّْمُونْ خمْسَا ن ثْجَارْثِيڒِينْ إِشْثْ أَكْ-ذ ثنّغْنِي ؤُشَا خمْسَا ن ثْجَارْثِيڒِينْ إِسّْمُونْ إِ-ثنْثْ عَاوذْ إِشْثْ أَكْ-ذ ثنّغْنِيثْ. ▫
11 خنِّي إِڭَّا ثِيسَارَاوِينْ إِذحْمَانِييّنْ ذِي ثْمَا ن يِيشْثْ ن ثْجَارْثِيڒْثْ غَارْ طَّارْفْ غَارْ ؤُسڒْقِي ؤُشَا أَمنِّي ثنْثْ إِڭَّا عَاوذْ ذِي ثْمَا ن ثْجَارْثِيڒْثْ نّغْنِي غَارْ طَّارْفْ، غَارْ مَانِي إِدْجْ ؤُسڒْقِي نّغْنِي. ▪
12 إِڭَّا خمْسِينْ ن ثْسَارَاوِينْ خْ ثْمَا ن يِيشْثْ ن ثْجَارْثِيڒْثْ ذ خمْسِينْ ن ثْسَارَاوِينْ غَارْ طَّارْفْ ن ثْجَارْثِيڒْثْ مَانِي إِ غَا ثْمُونْ أَكْ-ذ ثنّغْنِيثْ. ثِيسَارَاوِينْ طّْفنْثْ نِيشَانْ إِشْثْ ذِي ثنّغْنِيثْ. ▪
13 إِڭَّا عَاوذْ خمْسِينْ ن ثْسنَّارِينْ ن وُورغْ ؤُشَا إِسّْمُونْ ثِيجَارْثِيڒِينْ إِشْثْ إِ ثنّغْنِي س ثْسنَّارِينْ ؤُشَا أَمُّو ثذْوڒْ ثْزذِّيغْثْ ذ إِشْثْ. ▪
14 إِڭَّا عَاوذْ ثِيجَاڒْثِيڒِينْ ن شّْعَارْ ن إِغَايْضنْ، أَذْ إِڒِينْثْ ذ أَقِيضُونْ خْ ثْزذِّيغْثْ. إِڭَّا حِيطَاشْ ن ثْجَارْثِيڒِينْ.
15 ثُوزّڭَّارْثْ ن إِشْثْ ن ثْجَارْثِيڒْثْ ثُوغَا-ت ثْڒَاثِينْ ن إِغَادْجنْ ؤُ ثِيرُو ن إِشْثْ ن ثْجَارْثِيڒْثْ ذ أَربْعَا ن إِغَادْجنْ. حِيطْعَاشْ ن ثْجَارْثِيڒِينْ غَارْسنْثْ ڒعْبَارْ ذ إِجّْ.
16 نتَّا إِسّْمُونْ خمْسَا ن ثْجَارْثِيڒِينْ وحّذْسنْثْ ؤُ عَاوذْ ستَّا ن ثْجَارْثِيڒِينْ وحّذْسنْثْ.
17 إِڭَّا خمْسِينْ ن ثْسَارَاوِينْ خْ ثْمَا ن ثْجَارْثِيڒْثْ ثَانڭَّارُوثْ غَارْ طَّارْفْ ن ؤُسڒْقِي أَكْ-ذ ثنّغْنِي ؤُشَا إِڭَّا عَاوذْ خمْسِينْ ن ثْسَارَاوِينْ خْ ثْمَا ن ثْجَارْثِيڒْثْ غَارْ طَّارْفْ ن ؤُسڒْقِي نّغْنِي.
18 إِڭَّا عَاوذْ خمْسِينْ ن ثْسنَّارِينْ ن نّْحَاسْ حِيمَا أَذْ إِسّْمُونْ أَقِيضُونْ مَاحنْذْ أَذْ ث يَارّْ ذ إِجّنْ. ▪
19 إِڭَّا عَاوذْ إِشْثْ ن ثْسقَّافْثْ ن إِڒْمَاونْ إِزڭّْوَاغنْ ن إِشَارِّييّنْ إِ ؤُقِيضُونْ ؤُشَا سنّجْ إِ مَانْ أَيَا إِشْثْ ن ثْسقَّافْثْ ن إِڒْمَاونْ ن دّنْفِيڒَاثْ. ▪
20 إِڭَّا ثِيفڒْوِينْ إِ ثْزذِّيغْثْ س ؤُكشُّوضْ ن ؤُكَاسِييَا ثِينِّي إِبدّنْ نِيشَانْ. ▪ 21 ثُوزّڭَّارْثْ ن إِشْثْ ن ثفْڒوْثْ ثُوغَا-ت عشْرَا ن إِغَادْجنْ ؤُ ثِيرُو ن يِيشْثْ ن ثفْروْثْ ذ إِجّْ ن ؤُغِيڒْ ذ وزْينْ. ▪ 22 كُوڒْ ثَافْڒوْثْ غَارسْ ثْنَاينْ ن إِضَارنْ، إِنِّي إِسّْمُوننْ إِشْثْ أَكْ-ذ ثنّغْنِي أَمْ ثْوتْشْمَاثِينْ. أَمُّو إِ إِڭَّا س مَارَّا ثِيفڒْوِينْ ن ثْزذِّيغْثْ. ▪ 23 إِڭَّا ثِيفڒْوِينْ إِ ثْزذِّيغْثْ، عِيشْرِينْ ن ثْفڒْوِينْ غَارْ جِّيهثْ ن لْجَانُوبْ، غَارْ يفُّوسْ. ▪ 24 إِڭَّا عَاوذْ أَربْعِينْ ن ثْيَارْسَاوِينْ ن نُّوقَارْثْ سَاذُو عِيشْرِينْ ن ثْفڒْوِينْ، ثْنَاينْ ن ثْيَارْسَاوِينْ سَاذُو إِشْثْ ن ثفْڒوْثْ إِ ثْنَاينْ ن إِضَارنْ نّسْ، ؤُڒَا ذ ثْنَاينْ ن ثْيَارْسَاوِينْ سَاذُو ثَافْڒوْثْ نّغْنِي إِ ثْنَاينْ ن إِضَارنْ نّسْ. ▪ 25 إِڭَّا عَاوذْ عِيشْرِينْ ن ثْفڒْوِينْ إِ ؤُغزْذِيسْ نّغْنِي ن ثْزذِّيغْثْ، غَارْ ؤُغزْذِيسْ ن شَّامَالْ ▪ 26 س أَربْعِينْ ن ثْيَارْسَاوِينْ نّسْ ن نُّوقَارْثْ: ثْنَاينْ ن ثْيَارْسَاوِينْ سَاذُو إِشْثْ ن ثفْروْثْ ذ ثْنَاينْ ن ثْيَارْسَاوِينْ سَاذُو ثفْروْثْ نّغْنِي. ▪ 27 إِ إِغزْذِيسنْ ن ضفَّارْ ن ثْزذِّيغْثْ، غَارْ ؤُغزْذِيسْ ن ڒْغَارْبْ، إِڭَّا ستَّا ن ثْفڒْوِينْ. ▪ 28 إِڭَّا ثْنَاينْ ن ثْفڒْوِينْ ذ ثِيفڒْوِينْ إِ ثْغمُّورَا ن ثْزذِّيغْثْ غَارْ ثْنَاينْ ن إِغزْذِيسنْ غَارْ ضفَّارْ. ▪ 29 زِي سْوَادَّايْ ثُوغَا ڒصْقنْثْ أَمْ وَاشْنِيونْ ؤُشَا أَمُّو ثنْثْ ثُوغَا ذ إِشْثنْ أَڒْ د-ذوْڒنْثْ سنّجْ ذڭْ إِشْثْ ن ثخْرَازْثْ. أَمُّو إِ إِڭَّا س ثْنَاينْ إِذْسنْثْ إِ ثْنَاينْ ن ثْغمُّورَا. ▪ 30 أَمُّو إِ ذِينْ ثُوغَا ثْمنْيَا ن ثْفڒْوِينْ س ثْيَارْسَاوِينْ نْسنْثْ ن نُّوقَارْثْ، أَقَا أَثنْثْ ذ سطَّاشْ ن ثْيَارْسَاوِينْ: ثْنَاينْ ن ثْيَارْسَاوِينْ سَاذُو كُوڒْ ثَافْڒوْثْ. ▪ 31 إِڭَّا عَاوذْ ثِيحنْيَا ن ؤُعَارّضْ زڭْ ؤُكشُّوضْ ن ؤُكَاسِييَا، خمْسَا ن ثْفڒْوِينْ غَارْ إِجّْ ن ؤُغزْذِيسْ ن ثْزذِّيغْثْ ▪ 32 ؤُ خمْسَا ن ثْحنْيَا ن ؤُعَارّضْ إِ ثْفڒْوِينْ غَارْ ؤُغزْذِيسْ نّغْنِي ن ثْزذِّيغْثْ ذ خمْسَا ن ثْحنْيَا ن ؤُعَارّضْ إِ ثْفڒْوِينْ ن ثْزذِّيغْثْ غَارْ ثْنَاينْ ن إِغزْذِيسنْ نْ ضفَّارْ غَارْ ڒْغَارْبْ. ▪ 33 ثَاحْنَاشْثْ ن ؤُعَارّضْ ذِي ڒْوسْثْ إِڭَّا إِ-ت أَذْ ثژْوَا زِي ڒْوسْثْ ن ثْفڒْوِينْ زڭْ إِخفْ أَڒْ ونّغْنِي. ▪ 34 إِغدْجفْ ثِيفڒْوِينْ س وُورغْ ؤُشَا إِڭَّا ثِيخْرَازِينْ نْسنْثْ ن وُورغْ مَاحنْذْ أَذْ ذَايْسنْثْ سِّيذْفنْ ثِيحنْيَا ن ؤُعَارّضْ ؤُشَا ؤُڒَا ذ ثِيحنْيَا ن ؤُعَارّضْ إِشلّلْ إِ-ثنْثْ س وُورغْ. ▪
35 إِڭَّا إِجّْ ن ؤُڒحَّافْ س ؤُفِيڒُو أَذحْمِي ذ ؤُرْجُووَانِي ذ ؤُزڭّْوَاغْ إِحذْقنْ ؤُ س ڒقْطنْ أَزْذَاذْ إِمُوذنْ ؤُشَا إِڭَّا إِ-ث ذ إِجّْ ن وَارْشَامْ ن ؤُفنَّانْ، س إِكِيرُوبنْ خَاسْ. ▪ 36 إِڭَّا أَسْ أَربْعَا ن إِبِيلَارنْ ن ؤُكشُّوضْ ن ؤُكَاسِييَا ؤُشَا إِغدْجفْ إِ-ثنْ س وُورغْ. ثِيسنَّارِينْ نْسنْ ثُوغَا أَثنْثْ ن وُورغْ. إِسّفْسِي إِ إِبِيلَارنْ أَربْعَا ن ثْيَارْسَاوِينْ نْسنْثْ ن نُّوقَارْثْ. ▪
37 إِڭَّا إِجّْ ن أَرْوَاقْ إِ وَاذَافْ ن ؤُقِيضُونْ س ؤُفِيڒُو أَذحْمِي ذ ؤُرْجُووَانِي ذ ؤُزڭّْوَاغْ إِحذْقنْ ؤُ س ڒقْطنْ أَزْذَاذْ إِمُوذنْ، أَمشْنَاوْ إِجّْ ن ؤُمُوذِي ن ؤُخيَّاضْ، ▪ 38 س خمْسَا ن إِبِيلَارنْ نّسْ ذ ثْسنَّارِينْ نّسْ. إِغدْجفْ ثِيزدْجِيفِينْ نْسنْ ذ إِقضْبَانْ نْسنْ إِ ؤُسڒْقِي س وُورغْ. ثِييَارْسَاوِينْ نْسنْ ثُوغَا أَثنْثْ ن نّْحَاسْ. ▪