ؤُفُّوغْ 29

‏1 ”ذ مَانْ أَيَا إِ ذ أَسنْ غَا ثڭّذْ حِيمَا أَذْ ثنْ ثسّْقدّْسذْ، مَاحنْذْ أَذْ أَيِي إِڒِينْ ذ إِكهَّاننْ. كْسِي إِجّْ ن ؤُينْذُوزْ، أَمژْيَانْ ن ؤُفُونَاسْ، ذ ثْنَاينْ ن وَاشْرَارنْ إِشْنَانْ قَاعْ    ‏2 ؤُ عَاوذْ أَغْرُومْ بْڒَا أَنْثُونْ ذ ڒمْسمْنَاثْ بْڒَا أَنْثُونْ إِخدْجْضنْ س زّشْثْ ذ ثڒْفَافْ بْڒَا أَنْثُونْ تّْوَاذهْننْثْ س زّشْثْ، ثِينِّي إِ غَا ثڭّذْ مَارَّا س وَارنْ أَزْذَاذْ ن يِيرْذنْ. ‏3 أَذْ ثنْثْ ثڭّذْ ذِي ثْسُودْجثْ ؤُشَا أَذْ ثنْثْ ثَاوْيذْ ذِي ثْسُودْجثْ س ؤُينْذُوزْ ذ ثْنَاينْ ن إِشَارِّييّنْ. ‏4 أَذْ د-ثسّْقَارّْبذْ هَارُونْ ذ إِحنْجِيرنْ نّسْ غَارْ وَاذَافْ ن ؤُقِيضُونْ ن ؤُمْسَاڭَارْ ؤُشَا أَذْ ثنْ ثسِّيرْذذْ س وَامَانْ. ‏5 أَذْ ثكْسِيذْ أَرُّوضْ، أَذْ ثسّْيَارْضذْ هَارُونْ إِجّْ ن وَارُّوضْ ن ثڒْمشْثْ ذ ؤُسڒْحَامْ إِ ؤُبَالْطُو ذ ؤُبَالْطُو سِيمَانْثْ نّسْ ذ ثجْمشْثْ ؤُشَا أَذْ أَسْ ثْبيْسذْ س ثْحزَّامْثْ إِزوّْقنْ ن ؤُبَالْطُو. ‏6 أَذْ ثسَّارْسذْ أَرژّثْ خْ ؤُزدْجِيفْ نّسْ ؤُ خْ أَرژّثْ أَذْ ثڭّذْ ثَامْرِيسْثْ ثَامْقدَّاسْثْ. ‏7 أَذْ ثكْسِيذْ زّشْثْ إِ وذْهَانْ ؤُشَا أَذْ ت ثْزدْجْعذْ خْ ؤُزدْجِيفْ نّسْ ؤُشَا أَذْ ث ثْذهْنذْ.    ‏8 خنِّي أَذْ ثَاوْيذْ إِحنْجِيرنْ نّسْ، أَذْ أَسنْ ثسّْيَارْضذْ أَرُّوضْ ن ثڒْمشْثْ. ‏9 أَذْ أَسنْ ثْبيْسذْ س ثْحزَّامْثْ، إِ هَارُونْ ذ إِحنْجِيرنْ نّسْ، ؤُشَا أَذْ أَسنْ ثَاركّْبذْ ثِيشُوشَّايْ. أَذْ غَارْسنْ ثِيڒِي ثُوكهَّانْثْ عْلَاحْسَابْ إِشْثْ ن ثوْصيّثْ إِ ڒبْذَا. أَذْ ثَاڒقّْمذْ هَارُونْ ذ إِحنْجِيرنْ نّسْ.   

‏10 خنِّي أَذْ ثَاوْيذْ أَمْوَا أَمژْيَانْ زَّاثْ إِ ؤُقِيضُونْ ن ؤُمْسَاڭَارْ ؤُ هَارُونْ ذ إِحنْجِيرنْ نّسْ أَذْ سَّارْسنْ إِفَاسّنْ نْسنْ خْ ؤُزدْجِيفْ ن ؤُينْذُوزْ.   

‏11 أَذْ ثْغَارْصذْ إِ ؤُينْذُوزْ زَّاثْ إِ وُوذمْ ن سِيذِي، غَارْ وَاذَافْ ن ؤُقِيضُونْ ن ؤُمْسَاڭَارْ.

‏12 خنِّي أَذْ ثكْسِيذْ إِذَامّنْ ن ؤُينْذُوزْ ؤُشَا أَذْ ثنْ ثڭّذْ س ؤُضَاضْ نّكْ خْ وَاشَّاونْ ن ؤُعَالْطَارْ ؤُشَا أَذْ ثْزدْجْعذْ مَارَّا إِذَامّنْ إِقِّيمنْ غَارْ إِضَارنْ ن ؤُعَالْطَارْ.   

‏13 أَذْ ثكْسِيذْ عَاوذْ مَارَّا ثَاذُونْثْ ثنِّي إِذْڒِينْ أَذَانْ ذ مِينْ يُويْڒنْ غَارْ ثْسَا، ذ ثْنَاينْ ن ثِيژَّاڒْ أَكْ-ذ ثَاذُونْثْ إِ خَاسنْثْ إِدْجَانْ ؤُشَا أَذْ ثسّْبخَّارذْ أَيَا خْ ؤُعَالْطَارْ.   

‏14 مَاشَا أَيْسُومْ ن ؤُينْذُوزْ ذ يِيڒمْ نّسْ ذ ؤُمسَّاڒْ نّسْ أَذْ ثنْ ثسّْشمْضذْ س ثْمسِّي بَارَّا إِ ڒْمَارْڭحْ ن ڒْعسْكَارْ، أَقَا ذ ثَاغَارْصْثْ ن دّْنُوبْ.   

‏15 خنِّي أَذْ ثكْسِيذْ إِجّْ ن ؤُشَارِّي ؤُشَا هَارُونْ ذ إِحنْجِيرنْ نّسْ أَذْ سَّارْسنْ إِفَاسّنْ نْسنْ خْ ؤُزدْجِيفْ ن إِشَارِّي.

‏16 أَذْ ثْغَارْصذْ إِ إِشَارِّي ؤُشَا أَذْ ثكْسِيذْ إِذَامّنْ نّسْ، أَذْ ثنْ ثْزدْجْعذْ خْ ؤُعَالْطَارْ زِي مَارَّا إِغزْذِيسنْ نّسْ.   

‏17 أَذْ ثْقسّذْ إِشَارِّي ذِي إِشدْجِيقنْ، أَذْ ثسِّيرْذذْ أَذَانْ نّسْ ذ إِشكْرَاذْ نّسْ ؤُشَا أَذْ ثنْ ثڭّذْ خْ إِشدْجِيقنْ نّسْ ؤُ خْ ؤُزدْجِيفْ نّسْ.

‏18 أَذْ ثسِّيغذْ إِ إِشَارِّي أَمْ إِكْمڒْ خْ ؤُعَالْطَارْ، أَقَا-ث ذ ثَاغَارْصْثْ ن وشْمَاضْ إِ سِيذِي، إِشْثْ ن ڒفْوَاحثْ إِتّْفُوحنْ، أَقَا-ت ذ إِشْثْ ن ثوْهِيبْثْ ن ثْمسِّي إِ سِيذِي.

‏19 خنِّي أَذْ ثكْسِيذْ إِشَارِّي نّغْنِي ؤُشَا هَارُونْ ذ إِحنْجِيرنْ نّسْ أَذْ سَّارْسنْ إِفَاسّنْ نْسنْ خْ ؤُزدْجِيفْ ن إِشَارِّي.

‏20 أَذْ ثْغَارْصذْ إِ إِشَارِّي ؤُشَا أَذْ ثكْسِيذْ زڭْ إِذَامّنْ نّسْ ؤُشَا أَذْ ثڭّذْ مَانْ أَيَا خْ إِغسْ ن ؤُمزُّوغْ أَفُوسِي ن هَارُونْ ؤُ خْ إِغسْ ن ؤُمزُّوغْ أَفُوسِي ن إِحنْجِيرنْ نّسْ ؤُ عَاوذْ خْ ؤُضَاضْ ن يِيمزْ ن ؤُفُوسْ نْسنْ أَفُوسِي ؤُ خْ ؤُضَاضْ ن يِيمزْ ن ؤُضَارْ نْسنْ أَفُوسِي ؤُشَا أَذْ ثْزدْجْعذْ إِضَامّنْ إِقِّيمنْ خْ ؤُعَالْطَارْ زِي كُوڒْ جِّيهثْ. ‏21 خنِّي أَذْ ثكْسِيذْ زڭْ إِذَامّنْ إِنِّي إِدْجَانْ خْ ؤُعَالْطَارْ ؤُ زِي زّشْثْ إِ وذْهَانْ ؤُشَا أَذْ زَّايْسنْ ثْرُوشّذْ هَارُونْ ذ وَارُّوضْ نّسْ ؤُ أَكِيذسْ أَذْ ثْرُوشّذْ عَاوذْ إِحنْجِيرنْ نّسْ ذ أَرُّوضْ ن إِحنْجِيرنْ نّسْ، حِيمَا أَذْ يِيڒِي إِتّْوَاقدّسْ، نتَّا ذ أَرُّوضْ نّسْ، ؤُڒَا ذ ثَارْوَا نّسْ ذ أَرُّوضْ ن ثَارْوَا نّسْ أَكِيذسْ. ‏22 أَذْ ثكْسِيذْ ثَاذُونْثْ ن إِشَارِّي ڒَا ذ ثَاذُونْثْ غَارْ ؤُنوَّارْ ڒَا ثَاذُونْثْ نِّي إِذْڒِينْ أَذَانْ، ؤُڒَا مِينْ يُويْڒنْ غَارْ ثْسَا ذ ثْنَاينْ ن ثِيژَّاڒْ س ثَاذُونْثْ إِ خَاسنْثْ إِدْجَانْ ذ أَشكْرُوذْ أَفُوسِي، مِينْزِي وَا ذ إِشَارِّي إِ ؤُذشّنْ ن إِكهَّاننْ. ‏23 كْسِي عَاوذْ إِشْثْ ن ثشْنِيفْثْ ن وغْرُومْ ذ إِشْثْ ن ثمْسمّنْثْ ن وغْرُومْ إِتّْوَاسّْوجْذنْ س زّشْثْ ذ إِشْثْ ن ثڒْففْثْ زِي ثْسُودْجثْ ن وغْرُومْ بْڒَا أَنْثُونْ إِ إِدْجَانْ زَّاثْ إِ وُوذمْ ن سِيذِي. ‏24 سَارْسْ مَانْ أَيَا مَارَّا خْ إِفَاسّنْ ن هَارُونْ ؤُ خْ إِفَاسّنْ ن إِحنْجِيرنْ نّسْ ؤُشَا أَذْ ثنْ ثسّنْهزّذْ زِي سَّا غَارْ ذَا أَمْ إِشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي. ‏25 أَوَارْنِي أَسْ أَذْ ثنْ ثكْسِيذْ زڭْ إِفَاسّنْ نْسنْ ؤُشَا أَذْ ت ثسّْبخَّارذْ خْ ؤُعَالْطَارْ، خْ ثْغَارْصْثْ ن وشْمَاضْ، أَذْ ثِيڒِي ذ إِشْثْ ن ڒفْوَاحثْ إِتّْفُوحنْ زَّاثْ إِ وُوذمْ ن سِيذِي. أَقَا-ت ذ إِشْثْ ن ثوْهِيبْثْ ن ثْمسِّي إِ سِيذِي. ‏26 أَذْ ثكْسِيذْ إِذْمَارنْ ن إِشَارِّي إِ ؤُذشّنْ ن هَارُونْ ؤُشَا أَذْ ثنْ ثْسنْهزّذْ زِي سَّا غَارْ ذَا أَمْ إِشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي. ثَانِيثَا أَذْ ثِيڒِي ذ ثَاسْغَارْثْ نّكْ. ‏27 أَذْ ثسّْقدّْسذْ إِذْمَارنْ ن ونْهزِّي ؤُڒَا ذ ؤُشكْرُوذْ إِ د-إِتّْوَاسّْڭعّْذنْ، ونِّي إِتّْوَانْهزّنْ زِي سَّا غَارْ ذَا ذ ثنِّي إِتّْوَاسْڭعّْذنْ، إِنِّي إِدْجَانْ زڭْ إِشَارِّي ن ؤُذشّنْ، إِنِّي إِدْجَانْ إِ هَارُونْ ؤُڒَا إِ إِحنْجِيرنْ نّسْ. ‏28 أَيَا أَذْ يِيڒِي إِ هَارُونْ ذ إِحنْجِيرنْ نّسْ ذ إِشْثْ ن ثوْصيّثْ إِ ڒبْذَا زِي جِّيهثْ ن أَيْثْ ن إِسْرَائِيل، مِينْزِي ذ ثَاوْهِيبْثْ ن ؤُسْڭعّذْ إِ يدْجْ. أَيَا أَذْ يِيڒِي ذ ثَاوْهِيبْثْ ثنِّي إِ غَا سّْڭعّْذنْ أَيْثْ ن إِسْرَائِيل زِي ثْغَارْصَا نْسنْ ن ڒهْنَا. أَقَا-ت ذ ثَاوْهِيبْثْ نْسنْ ن ؤُسْڭعّذْ إِ سِيذِي.   

‏29 أَرُّوضْ إِقدّْسنْ ن هَارُونْ أَذْ يِيڒِي إِ إِحنْجِيرنْ نّسْ أَوَارْنِي أَسْ، مَاحنْذْ أَذْ ثنْ ذهْننْ ؤُ أَذْ ثنْ أَڒقْمنْ ذَايسْ. ‏30 مَانْ ونْ زڭْ إِحنْجِيرنْ نّسْ إِ غَا يِيڒِينْ ذ أَكهَّانْ ذڭْ ومْشَانْ نّسْ ؤُشَا أَذْ يَاذفْ غَارْ ؤُقِيضُونْ ن ؤُمْسَاڭَارْ مَاحنْذْ أَذْ إِسخَّارْ ذِي زَّاوشْثْ إِقدّْسنْ، أَذْ ث يَارْضْ سبْعَا ن وُوسَّانْ.

‏31 أَذْ ثكْسِيذْ إِشَارِّي إِ ؤُذشّنْ ؤُشَا أَذْ ثسّنْڭّْوذْ أَيْسُومْ نّسْ ذڭْ إِجّْ ن ومْشَانْ إِقدّْسنْ. ‏32 هَارُونْ ذ إِحنْجِيرنْ نّسْ أَذْ شّنْ أَيْسُومْ ن إِشَارِّي ذ وغْرُومْ إِ إِدْجَانْ ذِي ثْسُودْجثْ غَارْ وَاذَافْ ن ؤُقِيضُونْ ن ؤُمْسَاڭَارْ.    ‏33 أَذْ شّنْ زِي مِينْ زِي إِتّْوَاڭّْ وسْڒَاحْ، حِيمَا أَذْ ثنْ ڒقّْمنْ ؤُ أَذْ ثنْ سّْقدّْسنْ. مَاشَا إِجّْ ن ؤُبَارَّانِي وَارْ زَّايسْ إِتّتّْ، مِينْزِي أَقَا-ت ذ إِشْثْ ن ڒْحَاجّثْ ثَامْقدّسْثْ.    ‏34 مَاڒَا إِشطّْ شَا زڭْ ويْسُومْ ن ثْغَارْصَا إِ ؤُذشّنْ نِيغْ زڭْ وغْرُومْ أَڒْ ضّْبحْ، أَذْ ثسّْشمْضذْ مِينْ إِشطّنْ ذِي ثْمسِّي. إِتّْخصَّا وَارْ ث إِتّتّْ حذْ، مِينْزِي ذ إِشْثْ ن ڒْحَاجّثْ إِقدّْسنْ إِ يدْجْ.

‏35 أَمُّو إِ غَا ثڭّذْ أَكْ-ذ هَارُونْ ؤُ أَكْ-ذ إِحنْجِيرنْ نّسْ، أَذْ ثڭّذْ عْلَاحْسَابْ مَارَّا مِينْ ذ أَشْ ؤُمُورغْ. أَذْ ثنْ ثَاڒقّْمذْ سبْعَا ن وُوسَّانْ. ‏36 كُوڒْ أَسّْ أَذْ ثسّْوجْذذْ أَينْذُوزْ ذ ثَاغَارْصْثْ ن دّنْبْ إِ وصْڒَاحْ ؤُشَا أَذْ ثكّْسذْ دّنْبْ خْ ؤُعَالْطَارْ ؤُمِي غَا ثسِّيوْضذْ أَصْڒَاحْ خَاسْ ؤُشَا خنِّي أَذْ ث ثْذهْنذْ مَاحنْذْ أَذْ ث ثسّْقدّْسذْ. ‏37 سبْعَا ن وُوسَّانْ أَذْ ثفْذِيذْ أَعَالْطَارْ ؤُشَا أَذْ ث ثسّْقدّْسذْ، خنِّي أَذْ يِيڒِي ذ أَمْقدَّاسْ قَاعْ. ونِّي إِ غَا إِحَاذَانْ أَعَالْطَارْ، أَذْ يِيڒِي ذ أَمْقدَّاسْ. ‏38 ذ مَانْ أَيَا إِ غَا ثسّْوجْذذْ خْ ؤُعَالْطَارْ: ثْنَاينْ ن إِزْمَارنْ ن إِجّْ ن ؤُسڭّْوَاسْ، كُوڒْ أَسّْ، ڒبْذَا.    ‏39 أَذْ ثسّْوجْذذْ إِجّْ ن يزْمَارْ ذِي ضّْبحْ ؤُ إِزْمَارْ نّغْنِي أَذْ ث ثسّْوجْذذْ جَارْ ؤُعشِّي ذ دْجِيڒثْ. ‏40 إِ يِيجّْ ن يزْمَارْ كْسِي عشْرَا ذِي ثسْغَارْثْ ن إِجّْ ن إِفَا ن وَارنْ أَزْذَاذْ إِخدْجْضنْ س زّشْثْ دّْزنْ ت-إِ-د زِي زِّيثُونْ، ؤُ أَربْعَا ذِي ثسْغَارْثْ ن إِجّْ ن ؤُهِينُو ن بِينُو ذ ثَاوْهِيبْثْ ن ؤُسيّبْ.    ‏41 أَذْ ثْغَارْصذْ إِ يزْمَارْ نّغْنِي جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ. أَذْ غَارسْ ثَارْنِيذْ ثَاوْهِيبْثْ ن ڒْغِيدْجثْ أَمشْنَاوْ ثنِّي ن ضّْبحْ ؤُ عَاوذْ ثَاوْهِيبْثْ ن ؤُسيّبْ. أَقَا-ث ذ ڒفْوَاحثْ إِتّْفُوحنْ. أَقَا-ث ذ ثَاوْهِيبْثْ ن ثْمسِّي إِ سِيذِي. ‏42 أَذْ ثِيڒِي ذ ثَاغَارْصْثْ ن وشْمَاضْ ڒبْذَا ذِي مَارَّا جِّيڒَاثْ نْومْ غَارْ وَاذَافْ ن ؤُقِيضُونْ ن ؤُمْسَاڭَارْ زَّاثْ إِ وُوذمْ ن سِيذِي، مَانِي إِ غَا سّْمُونغْ أَكِيذْومْ مَاحنْذْ أَكِيذكْ سِّيوْڒغْ ذِينْ. ‏43 أَذْ مّْسَاڭَارغْ ذِينْ أَكْ-ذ أَيْثْ ن إِسْرَائِيل ؤُشَا أَذْ إِتّْوَاقدّسْ س ؤُعُودْجِي إِنُو. ‏44 أَذْ قدّْسغْ أَقِيضُونْ ن ؤُمْسَاڭَارْ ذ ؤُعَالْطَارْ. أَذْ سّْقدّْسغْ عَاوذْ هَارُونْ ذ إِحنْجِيرنْ نّسْ، حِيمَا أَذْ أَيِي إِڒِينْ ذ إِكهَّاننْ. ‏45 أَذْ زذْغغْ جَارْ أَيْثْ ن إِسْرَائِيل، أَذْ أَسنْ إِڒِيغْ ذ أَربِّي    ‏46 ؤُشَا أَذْ سّْننْ بلِّي نشّْ ذ سِيذِي، أَربِّي نْسنْ، ونِّي ثنْ إِسُّوفّْغنْ زِي ثمُّورْثْ ن مِيصْرَا مَاحنْذْ أَذْ زذْغغْ ذِي ڒْوسْثْ نْسنْ. نشّْ ذ سِيذِي، أَربِّي نْسنْ.“