ؤُفُّوغْ 22

ثِيوصَّا زِي جِّيهثْ ن وَاڭْڒَا ن ؤُمْقَارّبْ

‏1 ”مَاڒَا إِتّْوَافْ ؤُشفَّارْ عَاذْ أَمْ إِتَّاشَارْ، ؤُشَا إِوْثَا إِ-ث ؤُشَا إِمُّوثْ، وَارْ خَاسْ تِّيڒِينْ إِذَامّنْ ذڭْ ؤُفُوسْ نّسْ. ‏2 مَاڒَا ثنْقَارْ-د خَاسْ ثْفُوشْثْ، أَذْ خَاسْ إِڒِينْ إِذَامّنْ ذڭْ ؤُفُوسْ نّسْ. أَذْ أَسْ إِخدْجصْ ؤُشفَّارْ مَارَّا. مَاڒَا وَارْ غَارسْ شَا، أَذْ إِمّنْزْ ذِي سِّيبّثْ ن ثُوشّفّْرَا نّسْ. ‏3 مَاڒَا ثتّْوَافْ ثُوشّفَّارْثْ ثدَّارْ ذڭْ ؤُفُوسْ نّسْ، ذ ؤُفُونَاسْ ثُوغَا-ث نِيغْ ذ أَغْيُوڒْ نِيغْ ذ إِجّْ زڭْ وُودْجِي، إِتّْخصَّا أَسْ أَذْ إِخدْجصْ ثْنَاينْ ن ثْسقَّارْ.

‏4 مَاڒَا حذْ إِجَّا أَذْ إِهْذَا إِيَّارْ نِيغْ أَمَارْجُوعْ ن ؤُضِيڒْ ؤُشَا يَارْوسْ ثَاحِيمَارْثْ نّسْ ذَايسْ ؤُشَا أَذْ أَسنْ إِضْڒقْ أَذْ هْذَانْ ذِي ثمُّورْثْ ن ونّغْنِي، خنِّي أَذْ ت إِخدْجصْ زِي ڒمْخيّرْ ن ييَّارْ نّسْ ؤُ زِي ڒمْخيّرْ ن ؤُمَارْجُوعْ ن ؤُضِيڒْ نّسْ.

‏5 مَاڒَا ثفّغْ-د ثْمسِّي ؤُشَا ثڒْقفْ أَسنَّانْ ؤُشَا ثشَّا ثِيقبِّيضِينْ ن إِمنْذِي نِيغْ إِمنْذِي إِبدّنْ نِيغْ إِيَّارْ، خنِّي ونِّي إِقّْذنْ ثِيمسِّي أَذْ إِخدْجصْ مَارَّا مِينْ إِتّْوَاشمْضنْ.

‏6 مَاڒَا حذْ إِحْضَا إِ وَاجَّارْ نّسْ نُّوقَارْثْ نِيغْ ڒقْشُوعْ ؤُ مَانْ أَيَا إِتّْوَاشَارْ أَسْ زِي ثَادَّارْثْ ن ورْيَازْ نِّي، خنِّي أَشفَّارْ، مَاڒَا ؤُفِينْ ث، ڭُّورْ أَذْ إِخدْجصْ ثْنَاينْ ن ثْسقَّارْ. ‏7 مَاڒَا وَارْ إِتّْوِيفْ ؤُشفَّارْ، ڒخْذنِّي أَذْ سّْقَارّْبنْ بَابْ ن ثَادَّارْثْ غَارْ أَربِّي مَاحنْذْ أَذْ سّْننْ مَا وَارْ إِسّْوِيژّضْ ؤُفُوسْ نّسْ غَارْ وَاڭْڒَا ن وَاجَّارْ نّسْ.

‏8 ذِي كُوڒْ ثَانْفُوتْشْ زِي جِّيهثْ ن ؤُفُونَاسْ نِيغْ ن وغْيُوڒْ نِيغْ إِجّنْ زڭْ وُودْجِي نِيغْ ن وَارُّوضْ نِيغْ ن مِينْ إِودَّارنْ إِ زَّايسْ إِنَّا حذْ: ’أَقَا-ث ذ وَا!‘، أَذْ د-ثَاسْ ثْمسْڒَاشْثْ إِ إِدْجَانْ جَارْ أَسنْ س ثْنَاينْ زَّاثْ إِ أَربِّي ؤُشَا ونِّي خَاسْ غَا إِحْكمْ أَربِّي، أَذْ إِخدْجصْ إِ وَاجَّارْ نّسْ ثْنَاينْ ن ثْسقَّارْ.

‏9 مَاڒَا حذْ إِوْشَا إِ وَاجَّارْ نّسْ أَغْيُوڒْ نِيغْ أَفُونَاسْ نِيغْ إِجّْ زڭْ وُودْجِي، نِيغْ مَامّشْ مَا ثڭَّا ڒبْهِيمثْ، حِيمَا أَذْ ث إِحْضَا ؤُشَا إِمُّوثْ نِيغْ يَارّژْ نِيغْ ؤُشَارنْ ث، أَمْ وَارْ إِژْرِي حذْ،

‏10 خنِّي أَذْ ثِيڒِي ثْجَادْجِيثْ غَارْ سِيذِي جَارْ أَسنْ بلِّي وَارْ إِسّْوِيژّضْ أَفُوسْ نّسْ غَارْ وَاڭْڒَا ن وَاجَّارْ نّسْ. بَابْ نّسْ أَذْ إِقْبڒْ ثْجَادْجِيثْ نّسْ ؤُشَا أَذْ ثَافْ نْهْڒَا مَا ونّغْنِي أَذْ ث إِتّْخدْجصْ.

‏11 مَاشَا مَاڒَا ؤُشَارنْ ث نِيشَانْ زِي غَارسْ، ذِي لْحَالَا-يَا أَذْ إِخدْجصْ إِ بَابْ نّسْ.

‏12 مَاڒَا ثْبَانْ ثتّْوَامزّقْ نِيشَانْ، ڭُّورْ أَذْ ث يَاوِي إِ شّْهَاذثْ ؤُشَا وَارْ ڭُّورْ أَذْ إِتّْخدْجصْ مِينْ إِتّْوَامزّْقنْ.

‏13 مَاڒَا حذْ يَارْضڒْ شَا خْ وَاجَّارْ نّسْ ؤُشَا ثَارّژْ نِيغْ ثمُّوثْ ذِي ڒْغَايبْ ن بَابْ نّسْ، إِتّْخصَّا أَسْ أَذْ ت إِخدْجصْ مَارَّا.

‏14 مَاشَا مَاڒَا بَابْ نّسْ ثُوغَا إِحْضَارْ، أَذْ ثَافْ نْهْڒَا مَا أَذْ ت إِخدْجصْ. مَاڒَا ثُوغَا إِشْرَا ت خَاسْ، أَذْ يَاوِي ڒخْڒَاصْ نّسْ.

ثِيوصَّا زِي جِّيهثْ ن ؤُسفْسَاذْ ن أَرُّوحْ ذ أَرِّيمثْ

‏15 ؤُشَا مَاڒَا إِمَّارْضنْ حذْ خْ شَا ن ثعْزَاڒشْثْ ثُوغَا وَارْ ت إِخْضِيبْ حذْ عَاذْ ؤُشَا إِطّصْ أَكِيذسْ، إِتّْخصَّا أَسْ أَذْ أَسْ إِوْشْ صَّاذَاقْ إِمُونْ مَاحنْذْ أَذْ ت يَاوِي ذ ثَامْغَارْثْ.

‏16 مَاڒَا بَابَاسْ وَارْ إِخْسْ أَذْ أَسْ ت إِوْشْ، وَاخَّا أَمنِّي أَذْ أَسْ إِوْزنْ صَّاذَاقْ ن ثعْزُورَايْ س نُّوقَارْثْ.

‏17 وَارْ تّجِّي ثَاسحَّارْثْ أَذْ ثدَّارْ.   

‏18 مَانْ ونْ مَا إِطّْصنْ أَكْ-ذ إِجّْ ن ڒْمَاڒْ، أَذْ ث نْغنْ نِيشَانْ.   

‏19 ونِّي إِ غَا إِوهّْبنْ شَا ن ثْغَارْصْثْ إِ يِيجّْ ن أَربِّي، ؤُ مَاشِي إِ سِيذِي وَاهَا، إِتّْخصَّا أَذْ إِتّْوَاحَارّمْ إِ ؤُثحِّي،   

ثِيوصَّا زِي جِّيهثْ ن إِنِّي إِضعْفنْ

‏20 وَارْ دّدْجثْ أَبَارَّانِي ؤُ وَارْ خَاسْ تّْزيَّارمْ، مِينْزِي ثُوغَا ؤُڒَا ذ كنِّيوْ ذ إِبَارَّانِييّنْ ذِي ثمُّورْثْ ن مِيصْرَا.   

‏21 وَارْ سّحْقَارَامْ شَا إِشْثْ ن ثَاجَّاتْشْ نِيغْ إِجّْ ن ؤُيُوجِيڒْ.    ‏22 مَاڒَا ثِيوْضذْ أَذْ ث ثسّحْقَارذْ أَطَّاسْ ؤُشَا نتَّا إِسْغُويّْ-د غَارِي، أَقَا نشّْ س ؤُغِيڒْ أَذْ سْڒغْ إِ ثْغُويِّيثْ نّسْ. ‏23 أَذْ يَارغْ وغْضَابْ إِنُو ؤُشَا نشّْ أَذْ كنِّيوْ نْغغْ س سِّيفْ، ثِيمطَّا نْومْ أَذْ ذوْڒنْثْ ذ ثِيجَّاڒْ ذ ثَارَّاوْثْ نْومْ ذ إِيُوجِيڒنْ.

‏24 مَاڒَا ثَارضْڒذْ نُّوقَارْثْ إِ ڒْڭنْسْ إِنُو، إِ ؤُمزْڒُوضْ إِ ذِينْ غَاركْ، خنِّي وَارْ تّڭّذْ أَكِيذسْ أَمشْنَاوْ بَابْ ن ؤُمَارْوَاسْ نِيغْ أَذْ خَاسْ ثڭّذْ أَرِّيبَا.   

‏25 مَاڒَا ثكْسِيذْ أَرُّوضْ ن وَاجَّارْ نّكْ ذ أَضْمَانْ، أَرّْ أَسْ ث قْبڒْ مَا أَذْ ثغْڒِي ثْفُوشْثْ.    ‏26 مِينْزِي وَارْ غَارسْ مْغِيرْ أَحدْجفْ وَانِيثَا، أَقَا-ث ذ أَرُّوضْ خْ ثڒْمشْثْ نّسْ. مِينْ ذِي إِ غَا إِطّسْ خنِّي؟ خْمِي غَارِي د غَا إِسْغُويّْ، ڒخْذنِّي أَذْ أَسْ سْڒغْ، مِينْزِي نشّْ أَقَا ذ أَحْنِينْ!

ثِيوصَّا زِي جِّيهثْ ن ؤُوقَّارْ إِ أَربِّي

‏27 وَارْ تّْشقّفْ ذِي أَربِّي ؤُ وَارْ ثكّْوَارْ أَمْڭوّذْ ن ڒْڭنْسْ نّكْ.   

‏28 وَارْ سْعطَّاڒَا ثَاشُّورثْ ن ثْميْرَا نّكْ نِيغْ أَحْڒَايْ ن ثيْسَارْثْ نّكْ. أَذْ أَيِي ثوْشذْ ؤُڒَا ذ أَمنْزُو ن إِحنْجِيرنْ نّكْ.    ‏29 أَمُّو إِ غَا ثڭّذْ عَاوذْ س إِفُونَاسنْ نّكْ ذ وُودْجِي نّكْ. سبْعَا ن وُوسَّانْ أَذْ إِڒِينْ أَكْ-ذ يمَّاثْسنْ ؤُشَا غَارْ وَاسّْ وِيسّْ ثْمنْيَا أَذْ أَيِي ثنْ ثوْشذْ.   

‏30 أَذْ أَيِي ثِيڒِيمْ ذ إِمْقدَّاسنْ ؤُ وَارْ تّتّمْ أَيْسُومْ إِ إِتّْوَامزّْقنْ ذِي ڒخْڒَا. أَذْ ث ثنْضَارمْ إِ يِيطَانْ.“