إِزْڒِي ن ؤُغلّبْ ن مُوسَا
15
1 ڒخْذنِّي إِزهّذْ مُوسَا جْمِيعْ أَكْ-ذ أَيْثْ ن إِسْرَائِيل زْهِيذْ-أَ إِ سِيذِي، نَّانْ: ”أَذْ زهّْذغْ إِ سِيذِي، مِينْزِي نتَّا ثُوغَا إِغْڒبْ س يِيجّْ ن ڒغْڒبْ إِمْغَارْ!
أَيِيسْ ذ ونِّي خَاسْ ينْيِينْ إِنْضَارْ إِ-ثنْ ذِي ڒبْحَارْ. ▪
2 سِيذِي ذ جّهْذْ إِنُو ذ ؤُزهّذْ إِنُو.
نتَّا إِذْوڒْ ذ أَسنْجمْ إِنُو.
وَا ذ أَربِّي إِنُو، نشّْ أَذْ ث سّمْغَارغْ.
نتَّا ذ أَربِّي ن بَابَا، نشّْ أَذْ ث سّْعُودْجغْ! ▪
3 سِيذِي ذ أَرْيَازْ ن ؤُمنْغِي،
سِيذِي ذ إِسمْ نّسْ!
4 إِكَارُّوثنْ ن فِيرْعُونْ ذ ڒْعسْكَارْ نّسْ إِنْضَارْ إِ-ثنْ ذِي ڒبْحَارْ
ؤُ أَشوَّارْ ن إِنغْرَافنْ نّسْ زِي ڒْعسْكَارْ غَارْقنْ ذِي ڒبْحَارْ ن ثلْڭَا.
5 أَمَانْ يُودْجْغنْ ذْڒنْ إِ-ثنْ.
أَمشْنَاوْ أَژْرُو هْوَانْ غَارْ ڒَادْجَاغْ. ▪
6 أَ سِيذِي، أَفُوسْ أَفُوسِي نّكْ إِتّْوَاعزّْ س جّهْذْ،
أَفُوسْ أَفُوسِي نّكْ، أَ سِيذِي، أَقَا إِڒْبزْ ڒعْذُو. ▪
7 س ڒمْغَارثْ ن ؤُعُودْجِي نّكْ ثتّحِّيذْ إِنِّي كِيكْ إِتّمْعَاڒَانْ.
مَاڒَا ثسّكّذْ ڒْحَاذُوقْ ن وغْضَابْ نّكْ، أَذْ ثنْ يشّْ أَمشْنَاوْ إِغدْجْ.
8 س ؤُصُوضِي ن ونْزَارنْ نّكْ عُورّْشنْ وَامَانْ،
تّْوَاسّْبدّنْ ثْسدْجْيَا أَمشْنَاوْ أَغْبَارْ،
ؤُ أَمَانْ يُودْجْغنْ جمْذنْ ذِي ڒْوسْثْ ن ڒبْحَارْ. ▪
9 إِنَّا ڒعْذُو: ’ڭُّورْ أَذْ ثنْ أَرذْفغْ، ڭُّورْ أَذْ ثنْ عْذُوغْ،
أَذْ بْضِيغْ ڒْمُورْ، ڒعْمَارْ إِنُو أَذْ زَّايْسنْ إِجِّيونْ،
أَذْ د-جبْذغْ سِّيفْ إِنُو، أَفُوسْ إِنُو أَذْ ثنْ إِهلّكْ.‘
10 ثصُوضذْ س نّفْسْ نّكْ ؤُشَا إِذڒْ إِ-ثنْ ڒبْحَارْ.
نِيثْنِي هْوَانْ-د أَمشْنَاوْ ڒخْفِيفْ ذڭْ وَامَانْ إِمْغَارنْ. ▪
11 أَ سِيذِي، مَانْ ونْ إِ إِدْجَانْ أَمْ شكْ جَارْ إِربِّيثنْ؟
وِي إِدْجَانْ أَمْ شكْ، ذ ونِّي إِتّْوَاسّْعُودْجنْ ذِي ثْقدَّاسْثْ،
أَمْوقَّارْ ذڭْ إِزْڒَانْ ن ؤُصبّحْ ذ مَانْ ونْ إِتّڭّنْ ڒعْجَايبْ أَمْ شكْ؟
12 ثسّْوِيژّْضذْ أَفُوسْ أَفُوسِي نّكْ،
ثْصَارْضْ إِ-ثنْ ثمُّورْثْ.
13 شكْ ثْڭوّْذذْ ڒْڭنْسْ-أَ س ثْمخْسِيوْثْ نّكْ إِشُووَّارنْ، أَقَا ثفْذِيذْ ث،
س جّهْذْ نّكْ ثْنذْهذْ ثنْ غَارْ ثْزذِّيغْثْ إِقدّْسنْ نّكْ.
14 ڒڭْنُوسْ سْڒِينْ خْ ؤُيَا ؤُشَا أَرْجِيجنْ.
ثطّفْ ثڭّْوُوذِي ذڭْ إِمزْذَاغْ ن فِيلِيشِيثْ.
15 ڒخْذنِّي إِمقّْرَاننْ ن ثْقبَّاڒْ ن إِذُومْ أَذْ ثْبهْثنْ،
ؤُشَا إِنِّي غَارْ ثدْجْ صُّولْطَا ذِي مُوآبَ أَذْ أَرْجِيجنْ،
ؤُ مَارَّا إِمزْذَاغْ ن كنْعَانْ أَذْ فسْينْ! ▪
16 أَذْ خَاسنْ د-ثوْضَا ڒْعُورّثْ ذ ثِيڭّْوُوذِي.
س ڒمْغَارثْ ن ؤُغِيڒْ نّكْ أَذْ سّغْذنْ أَمشْنَاوْ أَژْرُو،
أَڒْ إِ غَا إِژْوَا ڒْڭنْسْ نّكْ، أَ سِيذِي،
أَڒْ إِژْوَا ڒْڭنْسْ-أَ إِ ثْكسْبذْ إِ يِيخفْ نّكْ. ▪
17 شكْ أَذْ ثنْ ثْنذْهذْ ؤُشَا أَذْ ثنْ ثژُّوذْ خْ وذْرَارْ ن ڒْوَارْثْ نّكْ،
أَمْشَانْ إِ ثڭِّيذْ ذ ثَازذِّيغْثْ نّكْ، أَ سِيذِي،
زَّاوشْثْ إِقدّْسنْ إِ إِڭِّينْ إِفَاسّنْ نّكْ، أَ سِيذِي إِنُو.
18 سِيذِي أَذْ إِحْكمْ إِ ڒبْذَا قَاعْ!
19 مِينْزِي أَيِيسْ ن فِيرْعُونْ يُوذفْ غَارْ ڒبْحَارْ س إِكَارُّوثنْ نّسْ ذ إِمْنَاينْ نّسْ ؤُشَا إِقْڒبْ خَاسنْ سِيذِي عَاوذْ أَمَانْ ن ڒبْحَارْ. مَاشَا أَيْثْ ن إِسْرَائِيل ژْوَانْ خْ ڒَاژَاغْ ذِي ڒْوسْثْ ن ڒبْحَارْ.“
20 ؤُ مَارْيَامْ، ثَانَابِيثْ، ؤُتْشْمَاسْ ن هَارُونْ، ثكْسِي أَدْجُونْ ذڭْ ؤُفُوسْ نّسْ ذ مَارَّا ثِيمطَّا فّْغنْثْ ضفَّارْ نّسْ س إِبنْذِيرنْ ذ شّْضِيحْ س نُّوبْثَاثْ. ▪ 21 خنِّي ثَارَّا-د خَاسنْثْ مَارْيَامْ: ”غنّْجنْثْ إِ سِيذِي، مِينْزِي أَقَا إِغْڒبْ س يِيجّْ ن ڒغْڒبْ إِمْغَارْ! إِنْضَارْ أَيِيسْ أَكْ-ذ ونِّي خَاسْ ينْيِينْ ذِي ڒبْحَارْ.“
ذڭْ وبْرِيذْ غَارْ مَارَا ذ إِلِيمْ
22 خنِّي مُوسَا إِڭَّا أَذْ إِفْسِي ڒْڭنْسْ ن إِسْرَائِيل إِقِيضَانْ نْسنْ إِنِّي إِدْجَانْ غَارْ ڒبْحَارْ ن ثلْڭَا ؤُشَا رُوحنْ ذِي ڒخْڒَا ن شُورْ، ؤُيُورنْ ثْڒَاثَا ن وُوسَّانْ ذِي ڒخْڒَا بْڒَا مَا أَذْ أَفنْ أَمَانْ. 23 ؤُشَا إِوْضنْ غَارْ مَارَا، مَاشَا وَارْ زمَّارنْ أَذْ سْونْ أَمَانْ ن مَارَا، مِينْزِي ثُوغَا أَثنْ ذ إِمرْزَاڭنْ. س ؤُيَا ڭِّينْ أَسْ إِسمْ: ’مَارَا‘. ▪ 24 إِنّذْقمْ ڒْڭنْسْ خْ مُوسَا، إِنَّا: ”مِينْ إِ غَا نْسُو؟“ ▫ 25 نتَّا إِڒَاغَا إِ سِيذِي ؤُشَا سِيذِي إِمّڒْ أَسْ إِجّْ ن ؤُكشُّوضْ ؤُشَا إِنْضَارْ إِ-ث ذَاخڒْ ذڭْ وَامَانْ ؤُشَا ذوْڒنْ وَامَانْ ذ إِمِيژِيذنْ. ذِينْ إِ ذ أَسْ إِڭَّا إِ ڒْڭنْسْ إِشْثْ ن ثوْصيّثْ ذ إِشْثْ ن لْفَارِيضَا ؤُ ذِينِّي إِ-ثنْ إِقدْجبْ. 26 إِنَّا: ”مَاڒَا ثسْڒِيذْ مْلِيحْ إِ وَاوَاڒْ ن سِيذِي، أَربِّي نّكْ، ثڭِّيذْ مِينْ إِدْجَانْ نِيشَانْ ذِي ثِيطَّاوِينْ نّسْ، أَذْ ثسْڒذْ إِ ڒُومَارَاثْ نّسْ، أَذْ ثحْضِيذْ مَارَّا ثِيوصَّا نّسْ، خنِّي نشّْ وَارْ ذ أَومْ-د سّكِّيغْ ڒهْڒَاشْ إِ د-سّكّغْ خْ مِيصْرَا، مِينْزِي نشّْ ذ سِيذِي، أَمسْڭنْفِي نّكْ!“ 27 ڒخْذنِّي إِوْضنْ غَارْ إِلِيمْ، مَانِي ثُوغَا ثنْعَاشْ ن ڒْعُونْصَارَاثْ ن وَامَانْ، ذ سبْعِينْ ن ثْشجِّيرَا ن ثِينِي ؤُشَا وْثِينْ إِقِيضَانْ نْسنْ ذِينِّي زَّاثْ إِ وَامَانْ.