أَمزْوَارُو 2

‏1 أَمُّو إِ إِتّْوَاكمّڒْ ؤُجنَّا ذ ثمُّورْثْ ذ قَاعْ أَستّفْ نْسنْ ن ثْزمَّارْ.    ‏2 ذڭْ وَاسّْ وِيسّْ سبْعَا إِكمّڒْ أَربِّي ڒْخذْمثْ نّسْ إِ إِڭَّا ؤُشَا يَاريّحْ ذڭْ وَاسّْ وِيسّْ سبْعَا زِي مَارَّا ڒْخذْمثْ نّسْ إِ إِڭَّا.    ‏3 إِبَاركْ أَربِّي أَسّْ وِيسّْ سبْعَا ؤُشَا إِقدّسْ إِ-ث، مِينْزِي ذَايسْ إِ يَاريّحْ زِي مَارَّا ڒْخذْمثْ نّسْ إِ د-إِخْڒقْ أَربِّي مَاحنْذْ أَذْ ت إِڭّْ أَمنِّي.

ثَاخڒْقِيثْ ن أَذَامْ ذ ثمْغَارْثْ نّسْ

‏4 إِنَا ذ إِمزْرُوينْ ن وخْڒَاقْ ن ؤُجنَّا ذ ثمُّورْثْ ڒَامِي د-تّْوَاخڒْقنْ ذڭْ وَاسّْ إِ إِڭَّا سِيذِي أَربِّي ثَامُّورْثْ ذ إِجنْوَانْ. ‏5 ؤُڒَا ذ إِجّْ ن شْبَارْقْ وَارْ ثُوغِي عَاذْ ذِي ثمُّورْثْ نِيغْ أَفْسُو ن ييَّارْ وَارْ د-إِغْمِي عَاذْ، مِينْزِي سِيذِي أَربِّي وَارْ إِجِّي أَنْژَارْ أَذْ إِوّثْ عَاذْ خْ ثمُّورْثْ ؤُشَا وَارْ ثُوغِي ذِينْ أَذَامْ عَاذْ حِيمَا أَذْ إِخْذمْ ثَامُّورْثْ. ‏6 خنِّي ثْڭعّذْ-د ثَايُّوثْ زِي ثمُّورْثْ، ثسُّو مَارَّا ؤُذمْ ن ثمُّورْثْ.

‏7 ؤُشَا إِكوّنْ سِيذِي أَربِّي أَذَامْ زِي ثْعجَّاجْثْ ن ؤُشَاڒْ ؤُشَا إِصُوضْ ڒعْوِينْ ن ثُوذَارْثْ ذڭْ ونْزَارنْ نّسْ. أَمُّو إِ إِذْوڒْ أَذَامْ ذ إِجّْ ن نّفْسْ إِدَّارْ.   

‏8 خنِّي إِژُّو سِيذِي أَربِّي جّنّثْ جِّيهثْ ن شَّارْقْ ذِي عَاذْنْ ؤُشَا إِسَّارْسْ ذِينْ أَذَامْ إِ إِڭَّا.    ‏9 ؤُشَا إِسّغْمِي-د سِيذِي أَربِّي زِي ثمُّورْثْ كُوڒْ ثَاشجَّارْثْ ثشْنَا إِ ڒْخژْرَاثْ ؤُ ثْمِيژِيذْثْ إِ مَاشَّا، ؤُشَا إِسّغْمِي-د ثَاشجَّارْثْ ن ثُوذَارْثْ ذِي ڒْوسْثْ ن جّنّثْ، ؤُڒَا ذ ثَاشجَّارْثْ ن ثُوسّْنَا ن ڒْخَارْ ذ ڒْغَارْ.   

‏10 إِفّغْ-د إِجّْ ن يغْزَارْ زِي عَاذْنْ حِيمَا أَذْ إِسُّووْ جّنّثْ ؤُ سّنِّي إِمّْسبْضَا خْ أَربْعَا ن إِجدْجِيفنْ.

‏11 إِسمْ ن يغْزَارْ أَمزْوَارُو ذ فِيشُونْ. نتَّا إِ إِنّْضنْ إِ مَارَّا ثَامُّورْثْ ن حَاوِيلَا مَانِي إِدْجْ وُورغْ.

‏12 ؤُرغْ ن ثمُّورْثْ نِّي إِصْبحْ. أَقَا ذِينْ عَاوذْ ڒبْخُورْ ن سُّوذَانْ ذ وژْرُو ن ’بِيرِيلْ‘.

‏13 إِسمْ ن يغْزَارْ وِيسّْ ثْنَاينْ ذ جِيهُونْ. نتَّا إِ إِنّْضنْ إِ مَارَّا ثَامُّورْثْ ن كُوشْ.

‏14 إِسمْ ن يغْزَارْ وِيسّْ ثْڒَاثَا ذ حِيدَّاقِيلْ. نتَّا إِ إِتَّازّْڒنْ غَارْ شَّارْقْ ن أَشُّورْ. ؤُ إِغْزَارْ وِيسّْ أَربْعَا ذ لْفُورَاطْ.

‏15 إِكْسِي سِيذِي أَربِّي أَذَامْ ؤُشَا إِسَّارْسْ إِ-ث ذِي جّنّثْ ن عَاذْنْ، حِيمَا أَذْ ت إِخْذمْ ؤُ أَذْ ت إِحْضَا.

‏16 سِيذِي أَربِّي إِوصَّا أَذَامْ، إِنَّا: ”زِي مَارَّا ثِيشجِّيرَا ن جّنّثْ أَذْ ثشّذْ مَاشَّا،

‏17 مَاشَا زِي ثْشجَّارْثْ ن ثُوسّْنَا ن ڒْخَارْ ذ ڒْغَارْ وَارْ تّتّذْ شَا زَّايسْ، مِينْزِي ذڭْ وَاسّْ إِ زَّايسْ غَا ثشّذْ، ڒْموْثْ إِ غَا ثمّْثذْ!“

‏18 إِنَّا سِيذِي أَربِّي ”وَارْ إِعدّڒْ أَذْ يِيڒِي أَذَامْ وحّْذسْ. أَذْ أَسْ ڭّغْ وِي ث غَا إِعَاوْننْ، أَمْ نتَّا قِيبَاتْشْ نّسْ.“

‏19 ؤُشَا إِڭَّا سِيذِي أَربِّي زڭْ ؤُشَاڒْ مَارَّا ڒْمَاڒْ ن ڒخْڒَا، ؤُ مَارَّا إِجْضَاضْ ن ؤُجنَّا، ؤُشَا إِنْذهْ إِ-ثنْ غَارْ أَذَامْ حِيمَا أَذْ إِژَارْ مَامّشْ إِ ثنْ غَا إِسمَّا. مَامّشْ إِ غَا إِسمَّا أَذَامْ كُوڒْ نّفْسْ إِدَّارنْ ذ وَا ذ إِسمْ نّسْ. ‏20 إِڭَّا أَذَامْ إِسْمَاونْ إِ مَارَّا ڒبْهَايمْ ذ يجْضَاضْ ن ؤُجنَّا ؤُ إِ مَارَّا ڒْمَاڒْ ن ڒخْڒَا، مَاشَا إِ أَذَامْ وَارْ يُوفِي وِي ث غَا إِعَاوْننْ ذ وِي غَا يِيڒِينْ أَمْ نتَّا قِيبَاتْشْ نّسْ.

‏21 إِسّهْوَا-د سِيذِي أَربِّي إِجّْ ن يِيضصْ يُودْجغْ خْ أَذَامْ ؤُشَا إِطّصْ. خنِّي إِكْسِي إِشْثنْ زِي ثْغزْذِيسِينْ نّسْ ؤُشَا إِقّنْ أَمْشَانْ نِّي س ويْسُومْ. ‏22 يَارَّا سِيذِي أَربِّي ثَاغزْذِيسْثْ ثنِّي إِ إِكْسِي زِي أَذَامْ ذ ثَامْغَارْثْ ؤُشَا إِوْيِي ت-إِ-د غَارْ أَذَامْ.    ‏23 إِنَّا أَذَامْ: ”ڒخُّو ثَانِيثَا أَقَا-ت ذ إِغسْ زڭْ إِخْسَانْ إِنُو ذ أَيْسُومْ زڭْ ويْسُومْ إِنُو. أَذْ ثتّْوَاسمَّا ’ثَارْيَازْثْ‘، إِخْسْ أَذْ يِينِي ’ثَامْغَارْثْ‘، مِينْزِي نتَّاثْ ثتّْوَاكْسِي-د زڭْ ورْيَازْ.    ‏24 س ؤُينِّي أَذْ إِسْمحْ ورْيَازْ ذِي بَابَاسْ ذ يمَّاسْ، أَذْ إِقّنْ غَارْ ثمْغَارْثْ نّسْ ؤُشَا أَذْ إِڒِينْ ذ إِشْثْ ن أَرِّيمثْ.“      ‏25 ثُوغَا-ثنْ س ثْنَاينْ إِذْسنْ ذ إِعَارْيَاننْ، أَذَامْ ذ ثمْغَارْثْ نّسْ، ؤُشَا ثُوغَا وَارْ ذِينْ شَا ن ڒحْيَا جَارْ أَسنْ.