Yinni itarran ixef nsen ḏ imseȓmaḏen
2
1 Iwa zi zic kkaren ca n lʼanbiya jar ccaƹb sneƹmiȓen waha. Amenni ƹaweḏ iy d ɣa kkaren can imseȓmaḏen jarawem zaƹma. S ṯnufra iṯarrasen-a aḏ siḏfen ttaƹlim n lbidaƹ jarawem ig isfennan waha. Aḏ nkaren waxxa ḏ Siḏiṯsen iy xasen ixeǧsen lfidya. Yina ḏeɣya tawin-d ȓefna x yixef nsen.
2 Aṭṭas iy ɣa iqellden ȓeqbaḥeṯ nsen. X ssabab-a wanitan iwḏan aḏ tukkaren abriḏ n lḥaqiqa.
3 Ƹlaḥsab aƹeddis nsen aḏawem ccen ȓmux s wawaȓen iy tsayasen waha. Mecḥaȓ zeg wami lƹiqab nsen ƹaḏ itrajan-ṯen war iteṭṭeṣ ca.
4 Iwa cuf, qa Arebbi war iḥinn ca x lmalaʼikaṯ wami ṯ ƹṣant, iruḥ iqenn-iṯent s snaseȓ inḍar-iṯent ḏeg yijjen n ṯaǧest ḏ ṯabercant ḏi lʼaxira mani ɣa rajant Yuwm Lḥisab ḏ Lƹiqab.
5 War iḥinn ca ƹaweḏ x ddunect-a n zman aqḏim wami xasen d isehwa ijjen n ṭṭufan n waman x yinni war ḏas itṭiƹin ca. Tuɣa iḥḍa ɣir Nuḥ wenni itbeccaren s ȓḥaqq ḏ yijjen n sebƹa akiḏes.
6 Iƹaqeb ƹaweḏ Arebbi ṯandint n Sadum ḏ ṯendint n Ƹamura isecmeḍ-iṯent yarri-ṯent ḏ ṯaƹejjajṯ n yiɣeḏa waha, iggi-ṯent ḏ lƹibra x min itrajan i yinni war ḏas itṭiƹin ca.
7 Isenjem Arebbi ɣir Luṭ netta ḏ ijjen n bnaḏem iy iǧan nican ṯesxeyyaq-iṯ ȓeqbaḥeṯ n lmufsidin.
8 Minzi aryaz-a itƹic jar lmufsidin nican, itett-iṯ wuȓ nnes kuȓ nhar ƹlaḥsab ȓefƹayeȓ nsen ṯiƹeffanin ḏ min itesȓa ḏ min itwaȓa.
9 Ammu ƹaweḏ issen Arebbi aḏ isenjem yinni iy ḏas itṭaƹan zi ȓemḥayen iy xasen d itekken. Issen ƹaweḏ aḏ iqenn yinni iƹeṣṣan swadday lḥukem nnes ḥetta aȓ Yuwm Lḥisab ḏ Lƹiqab.
10 Xaṣṣatan yinni igguren ḏeg ubriḏ n ccehweṯ ig isexnizen bnaḏem ḏ yinni itseḥqaren ssulṭa.
Iṯarrasen-a ḏaysen zƹameṯ n ttakebbur, war teggwḏen ca aḏ inin awaȓen war iḥȓin x lmexluqaṯ n ujenna.
11 Qa lmalaʼikaṯ waxxa ɣarsent jjheḏ ḏ ṯzemmar ktar zeg iṯarrasen-a, walakin tagint aṯen tahment s wawaȓen war iḥȓin zzaṯ i Mawlana.
12 Iṯarrasen-a niṯni qqaren awaȓen war iḥȓin x ṯmesȓayin war fehhmen ca. Niṯni ggin am ȓuḥuc iqefȓen am lḥayawanaṯ iy iǧan s ṭṭabiƹa nsen iwƹaren. Xeȓqen-d iṯarrasen-a bac aḏ twaṭṭfen aḏ twanɣen mammec iy twaneqqen ȓuḥuc.
13 Aḏ txaȓasen ƹlaḥsab mamc ggin, aḏ twaḍarrmen mammec ḍarrmen niṯni iwḏan.
Meȓa zehhun ḏi ṯfawt n uziȓ teḥsaben manaya ḏ aṣebḥan. Niṯni ḏ ixeciwen ḏ ȓƹibaṯ, zehhun s ccehweṯ nsen istwaɣarran xmi tmunsiwen akiḏwem.
14 Ṯiṭṭawin nsen ɣir xezzarent ḏi lfasad, war tjiwinent ca s ȓmuƹṣiyaṯ. Niṯni tḥeǧaqen-d yinni war itejhiḏen ca ḏi lʼiman, uȓawen nsen trinaren ḏi ṭṭmaƹ. Niṯni ḏ ṯarwa n nnaƹȓeṯ.
15 Ffɣen abriḏ nican weddaren, ṭṭfen abriḏ n nnabi Balƹam mmis n Biƹur netta tuɣa iteƹjib-as txaȓus n ccerr.
16 Netta ṯenha-ṯ ṯeɣyuȓṯ nnes x ccerr nni; ṯaɣyuȓṯ nni ḏ ijjen n ȓwaḥc ḏ ṯazeyzunt ṯessiweȓ s yijjen n ṯmijja n bnaḏem ṯesbedd ṯubbuhȓiya nnes n nnabi nni.
17 Iṯarrasen-a niṯni ḏ ȓaƹnaṣeȓ bȓa yaman ḏ ṯayyuṯ iy ṯneddeh lƹaṣifa waha. Niṯni ṯetwasewjeḏ-asen ijjen n ṯaǧest ḏ ṯabercant aṭṭas.
18 Semɣaren ixef nsen s wawaȓen ixwan. S ȓeqbaḥeṯ nni n ccehweṯ n bnaḏem tḥeǧaqen-d yinni yallah ƹaḏ irewwȓen zeg yiwḏan iy tƹicen ḏi lɣalaṭ.
19 Ḍemmnen-asen iṯarrasen-a lḥurriya i yiwḏan walakin yina bab nsen netta ḏ ȓefna. Ȓaḥeqqac min iteḥkamen x bnaḏem netta ḏ bab nnes.
20 Cuf, iṯarrasen-a meȓa tuɣa ssnen Siḏiṯneɣ Ƹisa Lmasiḥ rewȓen zi ȓewsex n ddunect-a ssenni ƹaweḏ ƹeqben-d ḥnunnḍen ḏayes iḏweȓ iḥekkem xasen, ataf aneggaru nsen iqseḥ ktar zeg umezwaru nsen.
21 Maƹlik tuɣa ƹemmarṣ war ssinen ca ȓuṣiyeṯ nni n ȓḥaqq iȓi ḥsen zi meȓa ssnen-t, ssenni semḥen ḏi ȓuṣiyeṯ-a ṯamqeddest iy ḏasen d immucen zi qbeȓ.
22 Iwqeƹ ḏ ṣṣaḥ min iqqar lmiṯal: Aqzin iƹqeb-d aḏ icc min d inṣer niɣ \bd Ṯiȓefṯ iƹummen ḏeg waman ṯeḏweȓ-d aḏ teḥnunneḍ ḏeg urwiḍ.