Ȓuṣiyaṯ n arrasul Bulus i Timutawus
4
1 Fa iqqar Arruḥ iqeddsen nican bȓa ccekk ḏeg wussan-a ineggura aḏ semḥen ca n yiwḏan ḏi lʼiman nican aḏ ggen array i jnun iɣeddaren ḏ min seȓmaḏen ccayaṭin.
2 Aḏ yiȓi manaya s nnifaq n iryazen isxarriqen, ḍḍamir nsen ṣafi iḥareq mamc iy ṯ iḥareq ijjen n warcem n wuzzeȓ isecmaḍen.
3 Niṯni aḏ sbedden iwḏan bac war meǧcen ca, qqaren-asen ƹaweḏ qa ca n lmaklaṯ memnuƹ aṯent ccen. Walakin lmaklaṯ nni ixȓeq-iṯent-id Arebbi aṯent neqbeȓ neccin ig itamnen nessen lḥaqiqa.
4 Qa marra min d ixȓeq Arebbi ḏ aṣebḥan. Meȓa neqbeȓ-iṯ neccin s ccuker ataf war ḏayes min ɣa nƹiff.
5 Aqa manayenni iḥeǧeȓ ḥalal ƹlaḥsab awaȓ n Arebbi ḏ ṯẓaǧiṯ.
6 Ṯimesȓayin-a meȓa ṯesbeyyaneḏ-ṯent-id i ayṯmaṯneɣ aḏ tiȓiḏ cek ḏ ijjen n uxeddam ḏ aṣebḥan n Ƹisa Lmasiḥ, aḏ tiȓiḏ twarebbiḏ s wawaȓen n lʼiman ḏ ttaƹlim nni aṣebḥan iy ṯḏeffareḏ cek.
7 Fa awggwej cek x ṯḥuja nni iǧan ḍed lʼiman iy tƹawaḏent ṯwessura waha, setrinar ixef nnec ƹlaḥsab lʼiman.
8 Meȓa ṯestrinareḏ ixef nnec s arriyaḍa, aḏ tawiḏ ijjen n arbaḥ ac ineffeƹ cwayt. Meȓa ṯestrinareḏ s lʼiman, aḏ tawiḏ ijjen n arbaḥ ineffeƹ i ṯmesȓayin marra. Lʼiman-a iwaƹeḏ-ic ƹlaḥsab ṯuḏarṯ-a iǧan ȓexxu ḏ ṯenni iy d ɣa yasen.
9 Awaȓ-a ḏayes ttiqeṯ u labud aḏ itwaqbeȓ ikmaȓ.
10 X manaya neccin nxeddem nrebbeȓ liʼanna negga lʼamal nneɣ ḏi Arebbi iddaren wenni isenjamen marra iwḏan xaṣṣatan ḏ yinni itamnen.
11 Ṯimesȓayin-a tweṣṣa xasent cek seȓmaḏ-iṯent.
12 War tejja ḥadd ac iseḥqar ƹlaḥsab ṯemzi nnec. Lla, cek labud aḏasen tiȓiḏ i ȓmuminin ḏ lmiṯal ƹlaḥsab awaȓen nnec ḏ ṯicri nnec ḏ ȓemḥibbeṯ nnec ḏ lʼiman ḏ ȓeṣfiyeṯ.
13 Ḥetta aȓ d ɣa yaseɣ nec sxeddam ixef nnec mliḥ s ṯɣuri n Lkutub ḏ uḥeddeṯ ḏ useȓmaḏ.
14 War tferraṭ ca ḏi lqudra nni iy ḏac immucen ƹlaḥsab awaȓ nni aṣebḥan iy xac nnan lʼanbiya wami arruyas n jmaƹeṯ n ȓmuminin sersen xac ifassen nsen.