Sáhabir hók edde zimmadari
9
Añí kí azad no? Añí kí sáhabi no? Añí kí Isá añárar Malik ore nó dekí? Malik or hañse añr ham or notiza tuáñra no né? 2 Añí argún or hañse sáhabi de no óile yo, becók tuáñrar hañse ói; kiyólla-hoilé tuáñra óilade Malik or hañse añr sáhabigirir moór.3 Zetará añr sáhabigirir baabute súwal goré, ítarar hañse añr zuwab óilde: 4 añára ttu hána-fina háibar hók nái niki? 5 Añára ttu kí nizor imandár bou loi sofór ot zaibar hók nái, zendilla oinno sáhabi gún ottu, Malik or báiyain dor ttu, edde Kéfasa ottu asé? 6 Aar náki siríf Bárnabas ottu edde añr ttu ham no goríbar hók nái de?
7 Nizor ṭiañ hóros gorí fóous ísafe ham goré de hon asé? Anggur-bariza lagai híyan ottu gula na háa de hon asé? Aar goru-sóol fali híin ottu dud na háa de hon asé? 8 Añí kí iín siríf insán or kiyase hoóir de né? Córiyote yó kí iín no hoó né? 9 Muúsar Córiyot ot toh endilla asé, “Dán úñror de goru re hoóñr no diyó.”b Alla ye ki siríf goru ókkol olla sinta goré de né? 10 Íba ye híyan añára lla hoiyé de no né? Becók, híyan añára lla beh leká gíyeh, kiyólla-hoilé álcac-goróya ttu acár sáañte álcac gorár zorur, aar dán-úñroya ttu bák faibar acár sáañte dán úñrar zorur. 11 Añára zettót tuáñrar bútore ruúhanir bis cíñṭṭi, tói añára zodi tuáñra ttu fósol ísafe duniyaibi jiníc ókkol dai híyan kí ḍoóñr hotá né? 12 Tuáñrar uore oinno kiyó ttu zodi híin faibar hók táke, tóoile añára ttu kí aró bicí nái né?
Montor añára hé hók híyan or fáidai nó tulí; bólke hárr kessú bordac gorí, zeéne añárar zoriya Mosihr kúchóbor olla bazá foida no.
13 Tuáñra no zano né, zee niki baitul-mukaddos or hédmot goré, yóggwa ye baitul-mukaddos ottu hána faa dé? Aar zee niki kurbani-gáñr hédmot goré, yóggwa ye kurbani-gáñ ttu bák faa dé? 14 Borabor héndilla, Malike hókum díye de ki, zetará kúchóbor tobolik goré ítara hé kúchóbor or usílaye nizor zorurot ókkol fouk.
15 Montor añí hé hók híin ekkán ottu úddwa fáidai nó tulí. Aar añí héndilla hók or dabi gorí bolla iín lekír de no, kiyólla-hoilé honókiyo re añr e borái goríbar hók harí loifélaito díyar túaro añí morizon nán añr lla beétor óibo. 16 Añí kúchóbor tobolik gorí de óile yo, añr ttu borái goríbar kessú nái, kiyólla-hoilé híyan toh añr fóros. Añr uore afsús, zodi añí kúchóbor tobolik no gorí. 17 Zodi añí hé ham nizor ttu monehoói goittám, tóoile toh añr lla boccíc tákito; montor añí toh añr zimmadari éna adai gorír, kiyólla-hoilé añré híyan or zimma diiya giyéh. 18 Tóoile añr boccíc kii? Híyan óilde, zeñtté añí kúchóbor tobolik gorí, añí zen honó dam sára kúchóbor tobolik gorí, aar kúchóbor tobolik-goróya ísafe añr ze hók asé, añí zen híyan or furafuri fáidai no tulí.
19 Añí honókiyor gulam no de óile yo, añí nizoré manúc beggún or hañse gulam banaiyí, zeéne añí aró bicí maincóre ṭanianí fari. 20 Yohúdi ókkol or hañse añí Yohúdir ḍóilla boinní, zeéne Yohúdi ítara re ṭanianí fari. Zetará Córiyot or tole asé, añí Córiyot or tole no de óile yo, ítarar hañse Córiyot or tole así fángori táikki, zeéne añí Córiyot or tole asé de ítara re ṭanianí fari. 21 Zetará ttu Córiyot nái, añí ítarar hañse Córiyot sárar ḍóilla boinní, zeéne zetará Córiyot sára asé ítara re ṭanianí fari. Háleke añí Allar diiya córiyot sára de no, añí toh Mosihr córiyot or tole así. 22 Komzur ókkol or hañse añí komzur boinní, zeéne añí ítara re ṭanianí fari. Añí beggún or hañse hárr kessú boinní, zeéne añí ze honó bote hodún ore basai fari. 23 Añí híin beggún goríde óilde kúchóbor or wasté, zeéne añí yó híyan or rahámot or bági ói fari.
24 Tuáñra no zano né, zetará duñraduñri zibbat de ítara duñitte beggúne duñre, montor boccíc siríf ekzone faa dé? Héndilla, tuáñra yó ziti faro fángori duñro. 25 Zetará kélat cámil ó, ítara toh bicí hora niyom-kaanun mani nizoré sóoñli raké. Ítara nac óizagoi de tas fai bolla beh héndilla goré, montor añára nac no ó de tas fai bolla beh gorí. 26 Hétolla honó moksót sára añí no duñri; boccin kéloyar ḍóilla añí boiyar ot no mari. 27 Montor añí añr gaar uore horagori niyom-kaanun solai híyan ore nizor gulam banai rakí, zeéne oinno zon ore tobolik gorí baade añí nize boccíc or nakaabel ói no zaygói.