Pául Meliti ḍiyat
28
Zeéñtte añára héfazot or sáañte kul or uore foóñiccí, añára zani faijjí de, hé ḍiya wár nam óilde Meliti. 2 Hé ḍiyar bácinda ókkole añára re ódorbaára meérbani goijjíl. Híyala zór deer de edde ṭánḍa accíl de hétolla ítara ooin zolai yóre añára beggún ore estekbal goijjíl. 3 Páule zettót ek tara fúana dargwá dola gorí ooin ot diyé, tói gorome eggwá bic ola háf neeli aái íbar át sai hooñri dóijje. 4 Héçiyar bácinda ókkole zettót Pául or át ot háf fwa loṭki táikke de deikké, ítara ek zon ore ek zone hoór de, “Becók, e manúic cwá kúni; ibá doriya ttu basilé yó Insáfi nam or debota ye ibá re basitó no deer.” 5 Lekin Páule háf fwa zári ooin ot félaidiye, ar íbar honó hóti nó. 6 Manúic ókkole ṭáijjil de, íbar gaa fúlizaibói, arnóile atíkka fori mori zaibói, montor ítara boóut hotún entezar gorí baade dekér de, íba ttu kessú noór, hétunot ítara nizor mon bodoli hoór de, “Íba eggwá debota.”7 Hé zagar ḍáke hé ḍiyar ebbe ḍoóñr manúic or zobin ókkol accíl. Manúic íbar nam óilde Fubili. Íba ye añára re estekbal goijjé, ar tin din fán añára re becábicí meémandári goijjé. 8 Ar eén óiye, hé októt Fubilir baf gaat zore edde gaalamani ye bisánat fori accíl. Páule íba re saitó bútore giyé, ar dua gorí baade íbar uore át dii íba re gom goijjé. 9 Yárbaade, hé ḍiyat accíl de baki biyaraimma beggún Pául or hañsé aiccé, ar ítara re yó gom gorá giyé. 10 Ítara añára re boóut ḍóilla torika loi izzot goijjé; ar añára héntu bacá loi bolla toiyar óiyi de októt, añára ttu sofór olla lage de híin beggún ítara zaáñs ot bóridiyé.
Pául Rom ot Foóñiccé
11 Tin mac baade añára Alexzendariya cóor or zaáñs ot gorí bacá loiyí, ziyán fura cít-hal foijjonto hé ḍiyat accíl. Hé zaáñs sán ore “Zooñikka Debota,” bouli hoó. 12 Ar Sírakusa cóor ot zaáñs sán bañdí yóre héçe tin din táikki. 13 Añára héntu zaáñs ot gorí bacá loi Regiyon cóor ot foóñiccí. Ek din baade doóinali boiyar baát doijje, ar tarfordin Puteli ṭoón ot foóñiccí. 14 Héçe añára hoozzon imandár báiyain loot faáilam, zetará añára re ítarar fúañti ek háfta tákito dawot diíl. Eéngorí añára Rom ot foóñiccígoi. 15 Héçiyar imandár báiyain de zettót añára aiyír de fúinne, ítara añára lloi milto hodún Appiyus or Bazar hoó de híyan or héddur aiccé, ar hodún Tinboóçing hoó de híyan or héddur aiccé. Páule ítara re dekí Alla re cúkuriya goijjé, ar íba ye hímmot faáil. 16 Añára Rom ot foóñsi baade Pául ore nizor ttu mone hoó de héçe táki bolla ezazot diya giyé. Íba re ek zon fóouse faára dito.
Rom ot Pául or tobolik
17 Tin din baade, Páule Yohúdir neta ókkol ore ekkán ot mataiyé, ar ítara zeéñtte zoma óiye, Páule ítara re hoór de, “Óu báiyain, zodi añí añárar koum or edde añárar bafdada ókkol or rosóm ókkol or ulḍa kessú no goillé yó, toóu añáre hodir ḍóilla gorí Jerúsalem ottu Romi ókkol or át ot gosái diya giyé. 18 Romi ókkol ottu añáre zerá gorí baade eri dito mone hoóil, kiyólla-hoilé ítara añár ttu mora fore de héndilla honó hosúri nó faa. 19 Montor Yohúdi ókkole zettót híyan ot bazá diyé, añí mojbur ói Káisar ore apíl goijjí, háleke híyan or maáni añár ttu nizor koum or ulḍa elzam lagaibár niyot accíl de noó. 20 Hétolla bóuli añí tuáñra re sai bolla edde tuáñra lloi hotá hoi bolla tuáñra re mataiyí de, kiyólla-hoilé Boni Isráil ókkole ze acá raké hé acár zoriya añáre e síyol lói bañdá giyé.”
21 Hétunot ítara íba re hoór de, “Añára tuáñr baabute Yohúdiya ttu honó ceñçí nó fai, ar héntu ze báiyain eçé aiccíl ítarar bútor ttu yó honókiyé tuáñr baabute noó honó hóbor diyé, ar noó honó hóraf hoiyé. 22 Montor añára ttu tuáñr rai ókkol fúinto mone hoór, kiyólla-hoilé añára zani de, fottí zagar maincé e fírkar ulḍa hotá ókkol hoó.”
23 Tói ítara Pául loi mili bolla eggwá din ṭík goijjé, ar ítara edde aró bicí manúic íba táke de zaga híyan ot aiccé. Tarfore Páule ítara re biínna ttu lóti házinná foijjonto Allar raijjor baabute buzáail edde gobá diíl, ar Muúsar Córiyot edde nobi ókkol or kitab ottu dahái dii-dii ítara re Isár baabute iman aná baitó kucíc goijjíl. 24 Hoozzone íbar boiyan or uore iman ainné, montor argúne nú ané. 25 Ítarar bútore zettót obonaboni foida óiye, Pául or e hotá fúni ítara zaat doijje, ki hoilé, “Pak Ruú ye nobi Yesáyar áta tuáñrar bafdada ókkol ore sóiyi hotá hoiyé, ki bouli hoilé,
26 E manúic ókkol or hañsé zai hoógoi de,
‘Tuáñra nizor hane fúnat tákiba montor no buzíba,
tuáñra nizor suké saát tákiba montor no siníba.
27 Kiyólla-hoilé manúic ítarar dil doró óigiyoi,
ítarar han bór óigiyoi,
ar ítara nizor suk bon gorífelaye.
Arnóile ítara nizor suké dekíto,
hane fúnito,
nizor dile buzí Añár hañsé fíri aitó,
ar Añí ítara re gom goittám.’a
28 Hétolla tuáñra yián zani loo de ki hoilé, Allar e nejat or hóbor Beyohúdi ókkol or hañsé difeçá giyé, ar ítara fúnibo.” 29 Páule hotá híin hoiyé rár, Yohúdi ókkole afós ot bicí barábari dii giyégoi.