Injil Córif or Síyara
HAMÓL
Síyara Hamól or Foriso
E síyara Hamól óilde Isáyi zomát cúru ówar baabute edde yíba Jerúsalem ottu lóti Yohúdiyat, Samáriat edde oinno-oinno zagat hondilla gori fóligiyoi híin or baabute, zendilla Isá ye uore asman ot zaibar age Nizor cárit tun ore hoóil (1:8). Síyara yibár lekóya óilde Lukás, zibá ye Injil Córif or Lukás nam or síyara wa yó leikké. Lukás ézzon dabair ḍakṭor accíl, aar yóggwa ye ziín-ziín fúinnil edde deikkíl híin sóiyigori leikkíl. Yóggwa ye síyara Lukás ore edde síyara Hamól ore Tiyofílas or hañse leikkíl, zibá ézzon Girík koum accíl, montor yóggwa ye hé síyara gún Girík edde Yohúdi aar Isáyi zomát ókkol or hañse yó niyot gorí leikkíl (1:1).
Síyara Hamól yibá Isá Mosih zormo ói baade háiṭ ottu háiṭ sair bosór or dormiyan ot leká gíyl, kiyólla-hoilé síyara yibá Pául ziyól ottu hálas óibar age leikká hótom óoil. Lukás óu sáhabi Pául or fúañti sofór ot giíl, hétolla óitofare yóggwa ye síyara Hamól yibá Enṭiyok cóor ot leikkíl. Síyara Hamól óilde Injil Córif or síyara Lukás or lagatar hotá, síyara yibá Isá re uore asman ot tulífelaiye de híyan lói cúru óiye. Lukáse síyara Hamól edde síyara Lukás ore ek ḍoilla moksót lói leikkíl. Lukáse saáil de, Tiyofílase edde barát accíl de Isáyi zomát ókkole uúin sóiyigori mani louk ziín tará re cíka gíyl, hétolla yóggwa ye Isár zindigir baabute edde Isáyi mozáb fólar baabute sóiyigori leikkíl.
Síyara Hamóle añára re zomát cúru ówar nomuna dahá, aar cíka de, añára ttu Isár uore iman aní hondilla gori zindigi haṛa foribó. Aar sáhabi gún or nomuna ókkole yó dahá de, añára ttu maincór hañse kúchóbor tobolik goríbar októt Pak-Ruhr uore keén bóraca raká foribó.
Súrki ókkol
1. Ummot ókkol or uore Pak-Ruh lami aiccé, aar zomát barát doijje (1:1—8:1)
2. Zomát or uore zulúm cúru óiye, aar ítara Jerúsalem or baáre úddwa fólat accíl (8:2—12:23)
3. Pául or foóilabar tobolik or sofór (12:24—14:28)
4. Jerúsalem ot sáhabi gún or fáisela, Beyohúdi imandár ókkol ottu kii-kii gorá foribó de híyan or (15:1-35)
5. Pául or dusárabar tobolik or sofór (15:36—18:22)
6. Pául or tisárabar tobolik or sofór (18:23—20:38)
7. Jerúsalem ot Pául or gereftari (21—26)
8. Pául ore Rom ot loigílgoi (27—28)