Ibrani 1

Suha' lako to Ibrani

Matande puha ia Änä'na Puang Allataala anna la ingganna malaika'

1:1-14

Indo yolona pembuda ma'battakada Puang Allataala lako nene to taponene napalombum ingganna nabi. Ma'hupa-hupa lalam napogau'. 2 Sapo' illaam inde wattu la kasuppisanna lino ma'kale Ia Änä'na Puang Allataala puha umpalombungangkia' tula'na. Indo Änä'na abana inna napa'tantum Puang Allataala la Ia muampuam asam ingganna-ingganna sia. Anna Änä'na siam duka' ungkähäi anna napadadii Puang Allataala langi' sola lino. 3 Ia naongei tandaam pangkähhä kamatandeanna Puang Allataala, anna susi siam sipa'na anna pa'pogausanna Puang Allataala. Anna Ia toi umpaliaha ingganna-ingganna sia, tula'na ponno kakuasaam napake. Tappana puha umbasei lao dosa budanna hupatau, iya le'ba'um längäm suhuga muokko' dio tandai kananna To Handam Matande. 4 Lambi' matande puha ia tadongkonganna anna la ingganna malaika', umba susi matande puha ia indo sanganna to nasangaiam Puang Allataala anna la sanganna malaika'. 5 Aka tä' tia deem la naua Puang Allataala lako malaika':

“Ikom too Änä'ku;

allo temo, Kaom too Ambemu.”

Sapo' anggam diona Änä'na naua:

“Kao la mendadi ambena

anna Ia la mendadi Änä'ku.”

Tä' ia deem ma'kada susi diona malaika'.

6 Mane deenni, wattunna anna ussuai Änä' uluana Puang Allataala mentama inde lino, ma'kada naua:

“Ingganna malaika'na Puang Allataala la pahallu menomba dio olona.”

7 Anna diona ia ingganna malaika', naua Ia:

“Puang Allataala umpopengkubalim malaika'na napadadi susi hibu',

anna to si napakasua-sua napopengkubalim napadadi susi kila'.”

8 Sapo' lako ia Änä'na naua:

“O Puang Allataala, okkosam kahajaamMu la tontä liu sule lako salako-lakona,

tekkem dipappa'Mu, tekkem muundu' kamaloloam.

9 Umpohäeko kamaloloam anna ungkabassiko kakadakeam;

iam too nasuhum nalanti'ko Puang Allataala, Puang Allataala to umpenombai,

natolloi minnä'-minnä' to umpasundede buamu, untondom ingganna solamu.”

10 Nauapi duka' Puang Allataala lako Änä'na:

“O Debata Iko umballa' lino indo anna dipadadii,

ma'kale limamMu ungkumbä langi'.

11 Ingganna ia too la pa'de asam sule,

sapo' Iko-Iko la tontä liuko;

ingganna ia too la malusa sihhapam poheba;

12 la sihhapam juba umbokkom-bokkom,

anna umpabala'i polei bakahunna,

sapo' Iko-Iko la tontä liuko,

anna la tubo batuko.”

13 Anna tä' tia deem la naua Puang Allataala lako malaika':

“Okko'ko dio tandai kanangku,

sule lako wattunna la kupopa'udum guntu' ingganna balimmu

dio olomu lambi' uhhondoi dokko.”

14 Dadi, aka ia umbai' indo malaika'? Indo malaika' sangngim mempenaba to napakasua-sua Puang Allataala la umpamoloi hupatau to la dimana' kasalamasam.