Penaniam pa'kuhhusam sumanga'na Daud
18:1-51
18
Lu lako to untetem to menani. Pampujiam napapia Daud, sabua'Na DEBATA. Napenggamahaam Daud längäm DEBATA wattunna nalappasam dio mai pala' limanna Saul sola ingganna balinna Daud.2 Ma'kada Daud naua: “O DEBATA, umpakeä' pangkaha' pa'kamase lako kaleMu,
kamatohoamMu umpasukunnä'!
3 O DEBATA, Iko buntu batungku, bettem matoto'ku, anna to ullappasannä',
Puang Allataala To kupenombai, buntu batungku, Ia pentuhehungangku,
unta' matoto'ku, tandu' kasalamasangku,a lempo kuongei mentuhehum!
4 Mengkaalaä' längäm DEBATA to sipäto' dipuji,
lambisam nalappasannä' dio mai ingganna balingku.
5 Diampasammä' pebalum,
napakao'dä-o'dä pallulunna katilakaam.
6 Diettesammä' pepungngu' dua pesäke' tängä,
tipattim poja la mepakattu sungnga' dio oloku.
7 Mengkaalaä' längäm DEBATA illaam kamasussaangku,
metambaä' längäm Puang Allataala to kupenombai umpelau pepamolo.
Nahingngi gamahangku längäm banua di ada'Na,
anna napaalai penaba pelauangku.
8 Iya pahodom anna kakemba-kemba lino,
pagego' anna pahundam ingganna pentokoanna tanete,
napobua' aha' kasalleNa DEBATA.
9 Pelamboho hambu illaam mai illäNa,
mellelo api illaam mai sädäNa,
tisembu' hobaja illaam mai pudu'Na.
10 Umpatibukka langi' naola yabo mai,
tihembom gabum malotä dio pehhondoanNa.
11 Mentia' ussäkei kerub,b
mentia' sumaniu' umpa'tendam hibu'.
12 Ussapu' kaleNa malillim naongei mentuhehum,
naongei mentulindum,
umputu' kaleNa gabum makambam ma'ku'dum.
13 Pangkähhä dio oloNa umpassii lao gabum,
anna umpasule uham kembua sola hobaja.
14 Mane magaluntu'i DEBATA yabo langi';
To Handam Matande umpa'pahingngiam gamahanNa.
15 Umpa'tembasam batu bälä'du'Na, nasuhum tiseham ke'de' balinNa;
umpasilalle kila', lambi' sikalumpa' lao to umbalii.
16 Tibungkalle posi' mapättäna le'bo',
anna tandaam apa' mahihinna litä',
tappana untibuheseiKo balimMu DEBATA,
tappana messubum penaba kakuasaamMu illaam mai illäMu.
17 Umpengkandoam limanNa DEBATA yabo mai ongeam malangka';
naanda'iä' anna nahuntu'ä' dio mai uwai la mepusa'i.
18 Nalappasannä' dio mai balingku to bahani matoho,
anna dio mai ingganna to ungkabassiä',
aka tä' deem lalanna la kutaloi.
19 Sikanaheba' lalangku wattungku nahua kamasussaam,
sapo' DEBATA sussaheangku.
20 Nababaä' lako pädä kalua' ongeam malona',
anna nalangnga'iä' aka napohäeä'.
21 Naulalannä' DEBATA situhu' kamaloloangku;
natamba'ä' aka tadeennä ma'gau' kadake.
22 Aka kutuhu'i ulalanNa DEBATA
anna tama'gau' kadakeä' umpemboko'i Puang Allataala to kupenombai.
23 Ingganna ätohanNa takupalappa'i mata takupasalai pikkiham,
anna ingganna pahentaNa kuoli' mamma' kusalungku metindo.
24 Maseho pindannä' maunna' pebajoam dio oloNa,
anna kujagai liu kaleku anna mala tää' umpogau' kakadakeam.
25 Nasuhum nabala'iannä' DEBATA situhu' kamaloloangku,
aka naissam naua, tä' deem kasalaanna Daud.
26 Lu lako to manontom, umpa'patandaangKo kamanontongamMu,
lu lako to tadeem sassainna umpa'patandaangKo katepuamMu.
27 Lu lako to maseho umpa'patandaangKo kamasehoamMu,
sapo' lu lako to manekko' umpa'patandaangKo kakeakasamMu.
28 UllappasangKo to dipakamase-mase,
sapo' uhhonnosangKo to mangngita-ita dokko.
29 O DEBATA, Iko umballoiä';
o Puang Allataala to kupenombai, Iko ummasiä'i kamalillingangku.
30 Iko umbeennä' kamatohoam la umpentaloi mentu' balingku;
anna pepamoloNa Puang Allataala to kupenombai lambisam kukahaba bettenna.
31 Tepu ulalanNa Puang Allataala;
tä' deem sassainna pa'dandinNa DEBATA.
DEBATA unta' matoto'na
ingganna to mentuhehum lako kaleNa.
32 Aka mennangka Puang Allataala senga' sulibanna DEBATA,
anna mennangka buntu batu sulibanna Puang Allataala to tapenombai?
33 Puang Allataala ussamba'ä' kamatohoam,
anna Ia umpomalolo lalangku.
34 Ia umpomatitta bitti'ku sihhapam bitti' jonga,
anna Ia umpomatogonnä' ke'de' yabo tanete malangka'.
35 Napatuduä' laoanna pa'bundusam,
nasuhum matohoä' ungkedoam bälä'du' tembaga.
36 O DEBATA, Iko umbeennä' unta'Mu umpa'timpasannä',
katea' bassimMu ussamba'ä';
kamapiaam penabamMu napolalam makkatalo-taloä'.
37 Umpomalobännä' lalangku,
anna tapuppu' lente'ä' tamangingngi' taha-taha.
38 Kupangngappi' balingku sampe kusakka simesa,
anna tä' kuaku ma'pasule ke tä'i kupempa'deam asam.
39 Kupentettesam simesa lambi' tä' nabela ma'geu',
silele tiampa' dio oloku.
40 Iko ussamba'ä' kamatohoam illaam pa'bundusam,
Iko umpopa'balinguntu' dio oloku to umpobaliä'.
41 Iko umpasikalumpa' lao balingku napelleiä';
ingganna to ungkabassiä' kupempa'deam.
42 Sikatamba umpelau pepamolo,
sapo' tä' deem umpesäkäii,
silele mengkaala längäm DEBATA,
sapo' tä' deem natimba'i.
43 Kupadahi kapu' susi sobä' natantam hibu',
anna kupa'tibeanni lako lalam susi hossä' la dipa'kuttä'.
44 Ullangnga'iä' dio mai kamesaanna hupatau to pabali-bali,
anna muäkä'ä' ungkuasai buda kahajaam;
to tadiita hambu apinna kuposabua'.
45 Napelelena pa'palakoangku,
tappa mengkahea' lako kaleku;
to sulibam botto ma'bukku dio oloku.
46 Silele maputtum lindona;
sangngim lumalla' messubum illaam mai bettenna.
47 Mannassa tubo DEBATA! Dipuji buntu batungku!
Dipomatande Puang Allataala to ullappasannä'!
48 Puang Allataala, iam too to umpabala'i pa'pogausanna balingku;
buda kahajaam napopa'luttu' dio oloku,
49 nalappasannä' dio mai pala' limanna balingku.
O DEBATA, Iko umpopataloä' mueba balingku,
ullangnga'iä' dio mai pala' limanna to bassa' patappaam lima.
50 Nasuhum la kupakende' pa'kuhhusam sumanga' dio oloMu illaam alla'-alla'na buda kahajaam,
anna kupenggamahaam pampujiam lu matim.
51 Ia umbeem kapataloam kasalle lako tomahaja pantuhoNa,
anna umpa'patandaam pangkaha' pa'kamaseNa takattu tintim tamondo' sahuham lako to nalanti',
Daud-um too diuaam sola ingganna pessubunna sule lako salako-lakona.”