36
Bezaleel sola Aholiab anna ingganna to majatta kapapia-pia puham namana' DEBATA kakeakasam sola kamanähängam anna mala naissam ungkähä ingganna hupanna kähängam la umpake'de' Kema Kapenombaam, la mengkähä umba susi indo to napa'pahentaam DEBATA.”2 Anna mane natambai Musa Bezaleel, Aholiab, anna ingganna to majatta kapapia-pia, sangngim puham namana' DEBATA kakeakasam anna sangngim tigaha' penabanna la sule ungkähä indo pengkähängam ia too. 3 Mane nabeenni ingganna indo bua pemala' dipasehe to nababa sule to Israel la dipake umpake'de' Kema Kapenombaam. Sulibanna ia too, mesa mebengngi' sule liupi to Israel umbaba bua pemala' unä' penabanna lako Musa. 4 Iya untampe salam pengkähänganna indo to majatta to ungkähä ingganna pengkähängam la umpake'de' Kema Kapenombaam, 5 anna ma'kadai lako Musa naua: “La'bi polem indo pa'passubunna hupatau la dipake umpalako indo pengkähängam to napa'pahentaam DEBATA.” 6 Iya napa'pahentaammi Musa anna mala dipa'paissangam illaam ongeanna to Israel ma'kema diua: “La tä' opi umpassubum baham-baham susi muane teem baine mendadi bua pemala' dipasehe lu lako Kema Kapenombaam.” Dipateemmi too dipatohho opi hupatau umbaba bua pemala'na, 7 aka ganna'um, anna la'bi polem indo baham-baham la dipake ungkähä ingganna indo pengkähängam.
Unggahaga Kema Kapenombaam
36:8-38
8 Iya ingganna to majatta illaam alla'-alla'na indo to ungkähä Kema Kapenombaam umpapia sapulo lamba'na sampim bännä linen malängngo' natannum, bännä malibulum, bännä mellolo pao, bännä kasa eja, anna disumma'pi dio gamba'na kerub, nasumma' to majatta. 9 Salamba' oi indo sampim dua pulo oom kahua singkum kalandona anna appa' singkum kalua'na. Dadi indo sampim pada-pada kalua'na anna kalandona. 10 Lima lamba'na indo sampim napasiampim-ampim mendadi salamba', anna naampim susi siam duka' indo lima lamba'pi senga'na. 11 Natalinga-lingai dio bihim kalandona indo sampim diampim uhuna, sampim malibulum napake, anna napateem siam duka' indo sampim diampim kaduanna. 12 Lima pulo talinga-linganna indo sampim diampim uhuna, anna lima pulo siam duka' indo sampim diampim kaduanna, lambi' tungga' sipatu-patu indo talinga-linganna. 13 Mane nagahagai lima pulo pekädä-kädä patomali, bulabam napapia dipasikädäam indo dua lamba' sampim puha diampim, nasuhum mendadi salamba'um papana sitonda hindinnam indo Kema Kapenombaam. 14 Nagahaga duka' sampim bulu beke sapulo mesa lamba'na mendadi papana sitonda hindinna indo Kema Kapenombaam lapi' kaduanna. 15 Mesa oi indo sampim bulu beke tallu pulo oom singkum kalandona anna appa' singkum kalua'na. Dadi, indo sapulo mesa lamba'na sampim pada-pada kalua'na anna kalandona. 16 Lima lamba'na indo sampim napasiampim-ampim mendadi salamba', anna annam lamba'na napasiampim-ampim duka' mendadi salamba'. 17 Natalinga-lingai dio bihinna indo sampim diampim uhuna lima pulo talinga-linganna, anna lima pulo siam duka' indo sampim diampim kaduanna. 18 Nagahaga duka' lima pulo pekädä-kädä tembaga napapia napake umpasiampim indo dua lamba' sampim, nasuhum mendadi salamba'. 19 Nagahagapi duka' pesambona sitonda hindinnam indo kema salapi' lollo' domba laki diwante' malea, anna lollo'na olo'-olo' malängngo' napalapi'iam polepi yabona.
20 Nagahaga duka' andihi dipasiundu' dikatea'i alla'na kaju akasia napapia la mendadi pahamaka'na indo Kema Kapenombaam. 21 Mesa oi indo andihi dipasiundu' dikatea'i alla'na sapulo oom singkum kalandona anna sasingkum satangnga alla'na indo andihi dipasiundu'. 22 Mesa oi indo andihi dipasiundu' bassim diotim oom dio tämpä' tando dokkona anna mala sitohoi. Napateem asammi too pada indo andihi dipasiundu'na Kema Kapenombaam. 23 Napapiai dua pulo andihi dipasiundu' dio sa'de tandai selatanna indo Kema Kapenombaam, 24 anna nagahaga appa' pulo pentokoam peha' la napentokoi indo dua pulo andihi dipasiundu'. Dua pentokoam mesa oi andihi dipasiundu', nasimesai indo dua otinna. 25 Susi toi duka' sa'dena indo Kema Kapenombaam tandai utara, nagahaga dua pulo andihi dipasiundu' 26 anna appa' pulo pentokoam peha'. Dua pentokoam mesa oi indo andihi dipasiundu'. 27 Dio boko'na indo Kema Kapenombaam, battu diua tandai katampusam, annam ia andihi dipasiundu' nagahaga. 28 Sulibanna ia too, nagahaga duka' dua andihi dipasiundu' dio sikunna patomali dio boko'na indo Kema Kapenombaam. 29 Indo dua andihi dipasiundu' napaundu'iam polepi indo andihi dipasiundu' dio sikunna patomali mengkalao dio sule längäm, anna napasianda'i umpake galege'-lege'. Napateemmi too napadekke'. 30 Dadi, kahua andihi dipasiundu' dio boko' sitonda sapulo annam pentokoanna peha', dua pentokoam mesa oi indo andihi dipasiundu'.
31 Nagahaga duka' sapulo lima pesulu' kaju akasia napapia, lima pesulu' dio sa'de mesanna indo kema, 32 lima pesulu'na dio sa'de kaduanna, anna lima pesulu'na indo andihinna Kema Kapenombaam dio boko', battu diua tandai katampusam. 33 Indo pesulu' illaam tängäna andihi, napadekke' bahe tängäna längäm indo andihi dipasiundu', salolo tungngette' mengkalao dio tämpä' sabalinna sule lako tämpä' sabalinna. 34 Indo andihi dipasiundu' sangngim nasapu' bulabam; indo galege'-lege' dipassollo'i tama pesulu' bulabam napapia; anna indo pesulu'na nasapu' bulabam.
35 Nagahaga sampim pesapa', bännä malibulum, bännä mellolo pao, bännä kasa eja, anna bännä linen malängngo' ditannum. Nasumma' gamba'na kerub dio, napapia to majatta massumma'. 36 Nagahaga duka' appa' andihinna indo sampim pesapa' kaju akasia napapia anna nasapu'i bulabam. Nagahaga toi duka' passedangam bulabam dio indo andihi, anna untollo appa' pentokoam peha'.
37 Mane nagahagai sampim pesapa' la natutu'iam ba'bana indo Kema Kapenombaam, bännä malibulum, bännä mellolo pao, bännä kasa eja, anna bännä linen malängngo' natannum, anna disumma' sanda dio hupanna. 38 Indo sampim pesapa' la ditutu'iam ba'bana indo kema nagahagaam lima andihi sitonda passedangam dio. Nasapu' bulabam yabo tämpä'na sola indo talikaba' to umpasianda'-anda'i indo andihi, anna indo lima pentokoanna tembaga ia nagahaga.