फरीसी त सदूकी यीशु केआं स्वर्गे यक निशाणी मगीण
16
1 फरीसी त सदूकी दले मेह्णु यीशु केईं आए त तेस परखुण जे तेस जे बोलु, “असी स्वर्गे कोई निशाणी हराल।”a 2 पर यीशु तेन्हि जे जवाब दिता, “ब्यादि तुस बोते मौसम ठीक भुन्ता, किस कि अम्बर लाल असा। 3 होर भ्यागे बोते ‘आज तुफान एन्ता, किस कि अम्बर लाल त बदेआ असा।’ तुस अम्बर हेर कइ त तसे भेद पता लाई सकते। पर इस जुगे निशाणे भेद किस न बताई सकते। 4 सद बुरे त कुकर्मी मेह्णु निशाण तोपते, पर योने भविष्य वक्ते निशाण छड़ दी कइ होर कोई निशाण न हरालीन्ता।” तोउं से तेन्हि छड़ दी कइ घेई गा।bफरीसी त सदूकी शिक्षाई केआं सावधान
5 जपल चेले तथे पार पूज गे, तोउं तेन्हि पता लगा कि से रौठि अण्हण बिसरी गो असे। 6 तोउं यीशु तेन्हि जे बोलु, “हेरे, फरीसी त सदूकी टकेणे केआं बच कइ बिशे।”c 7 त चेले अपफ बुच बोक करण लगे, “असी रौठि न अण्ही, तोउं कि से असी जे ईं बोलुण लगो असा ना?” 8 तेन्के मने पता लाई कइ यीशु तेन्हि जे बोलु, “ए कमजोर विश्वासीओ! तुस अपफ बुच की बोक करण लगो असे, कि असी केईं रौठि नेईं? 9 तुसी अपल तकर बि समझ न आई ना? मेईं पन्ज रौठि बइ पन्ज हजार मेह्णु खिलाण केईआं पता तुसी कत चाउं टुकुड़ भरो थिए, से याद नेईं ना?d 10 होर सत रौठि बइ चोउर हजार मेह्णु रज्जाणि कइ कत चाउं टुकुड़ भरो थिए, से बि याद नेईं ना?e 11 तुस किस न समझते कि मेईं तुसी जे रौठि के बारे नेईं बोलो, पर ईं कि तुसी फरीसी त सदूकी के शिक्षाई केआं बच कइ बिशुण। किस कि तेन्के शिक्षा टकेणे ईं असी।” 12 तोउं तेन्हि समझ एई गई कि तेन टकेणे बारे नेईं, बल्कि फरीसी त सदूकी के शिक्षाई केआं बच कइ बिशणे बोलो थिउ।
पतरस यीशु सुसुर पिछाणण
13 तोउं जपल यीशु अपु चेली जुए साते कैसरिया फिलिप्पी शेहर आ, त तेन अपु चेली केआं पुछु, “केस जे मेह्णु मनखे कुआ बोते?” 14 तेन्हि बोलु, “कुछ मेह्णु चुसुणे बाड़े यूहन्ना जे, कुछ मेह्णु एलिय्याह भविष्य वक्ते जे, त होर कुछ मेह्णु यिर्मयाह भविष्य वक्ते या होरे भविष्य वक्ती अन्तर कोउं यक जेईं जे ‘मनखे कुआ भो’ बोते।”f 15 त यीशु तेन्हि जे बोलु, “पर तुस में बारे की बोते?” 16 शमौन पतरसे जवाब दिता, “तु जीन्ते परमेश्वरे कुआ ‘मसीह’ भो।”g 17 त यीशु तेस जे बोलु, “ए शमौना, योने कोईया! तु धन्य असा; किस कि तोउ अपफ इसे पता नेईं लगो, पर में बोउ, जे स्वर्ग अन्तर असा, ई बोक तोउ पुठ हराली। 18 होर शुण पतरसा! अउं तोउ जे बोता, तें नओएं मतलब पलण असा। अउं इस पलण पुठ अपु सतसंग बणान्ता, होर मौत बि तस हराई ना बटती। 19 अउं तेन्धे स्वर्गे राज्ये कुंजुड़ देन्ता, त जे कुछ तु धरती पुठ बन्हियाल, से स्वर्ग अन्तर बि बन्हिन्तु; त जे कुछ तु धरती पुठ खोलियाल से स्वर्ग अन्तर बि खोलिन्तु।”h
20 तोउं तेन चेली जे सक्ति कइ बोलु “केसे पता न लौता लगो कि अउं मसीह भो।”
यीशु मसीहे बारे नियको बोक त तसे सच्चाई
(मत्ती 16:21—20:34)
अपु मरणे बारे यीशु भविष्य वाणि
21 तेस टेम केआं खड़ यीशु अपु चेली जे बोलुण लगा, “में यरुशलेम शेहर घेण जरूरी असु। तठि घेई कइ टजे स्याणे, मुख्य पुजारे, त धर्मशास्त्री मोउं दुख त ती कष्ट देन्ते। तठि अउं मरता त फिर टेके रोजे दुबारी जी घेन्ता।” 22 ई शुण कइ पतरस तेस बखरे घिन गा त तेस जड़काण लगा, “ए प्रभु, ई ना बोले। परमेश्वर तुसी जोई कदी ईं भुण न देन्ता।” 23 त तेन पतरस जे बोलु, “ए शैताना, में सामणि केआं दूर भोई गा! तु में कम रोकुण लगो असा, किस कि तु परमेश्वरे बोकी पुठ न, बल्कि मेह्णु के बोकी पुठ मन लान्ता।”
यीशु चेला बणणे मतलब
24 तोउं यीशु अपु चेली जे बोलु, “जे कोउं में पता एण चहन्ता, से अपु मने मुताविक जीण छड़ दिए, त अपु दुख त मरुण सेहणे लिए तेयार भोई कइ में पता एईए।ij 25 किस कि जे कोउं अपु प्राण बचाण चहन्ता, से तेस गड़ाई छता; होर जे कोउं में लिए अपु प्राण देन्ता, से तस मेता।k 26 अगर मेह्णु पूरु मतोक बि मेई घियेल, पर अपु प्राण न बचाई सकियाल, त की फायदा? फिर मेह्णु अपु प्राणे बदले की देन्ता? कुछ ना!”