मत्ती
लिखो खुश खबरी
यीशु मसीहे जमुण त शुरुवाती बोके
(मत्ती 1:1—4:17)
यीशु ऊड़ी
1
1 यीशु मसीह, दाऊद राजे खानदानी अन्तर जमो थिआ, जे अब्राहमे ऊड़ी थिआ। तसे दादु पड़दादु के नओं ई भो।2 अब्राहम केआं इसहाक जमा, इसहाक केआं याकूब जमा, याकूब केआं यहूदा त तसे भाई जमे।
3 यहूदा केआं फिरिस त जराह जमा, जेन्के ईया नओं तामारa थिउ। फिरिस केआं हिस्रोन जमा, त हिस्रोन केआं एराम जमा।
4 एराम केआं अम्मीनादाब जमा, अम्मीनादाब केआं नहशोन त नहशोन केआं सलमोन जमा।
5 सलमोन त तसे जुएली राहाब केआं बोआज जमा। बोआज त तसे जुएली रूत केआं ओबेद जमा, तोउं ओबेद केआं जिशा जमा।
6 तोउं जिशे केआं दाऊद राजा जमा।
त दाऊद केआं सुलैमान जमा। सुलैमान तेस जिल्हाणु केआं जमा जे पेहले उरिय्याह जुएली थी।
7 सुलैमान केआं रहबाम जमा। रहबाम केआं अबिय्याह जमा त अबिय्याह केआं आसा जमा।
8 आसा केआं यहोशाफात जमा। यहोशाफात केआं योराम जमा त योराम केआं उज्जियाह जमा।
9 उज्जियाह केआं योताम जमा। योताम केआं आहाज जमा त आहाज केआं हिजकिय्याह जमा।
10 हिजकिय्याह केआं मनश्शिह जमा। मनश्शिह केआं आमोन जमा त आमोन केआं योशिय्याह जमा।
11 योशिय्याह केआं यकुन्याह त तसे भाई जमे। तढ़े पता बेबीलोन देशे मेह्णु, यहूदी मेह्णु कैदी बणाई कइ अपु देश जे घिन गे।
12 कैदी भोई कइ बेबीलोन पुजुण केआं पता यकुन्याह केआं शालतिएल जमा। तोउं शालतिएल केआं जरूब्बाबिल जमा।
13 जरूब्बाबिल केआं अबीहूद जमा। अबीहूद केआं इल्याकीम जमा त इल्याकीम केआं अजोर जमा।
14 अजोर केआं सदोक जमा। सदोक केआं अखीम जमा त अखीम केआं इलीहूद जमा।
15 इलीहूद केआं इलियाजार जमा। इलियाजार केआं मत्तान जमा त मत्तान केआं याकूब जमा।
16 याकूब केआं यूसुफ जमा, जे मरियमे धाणि थिआ। त मरियम केआं यीशु जमा जेस जे “मसीह” बोते।
17 ईं अब्राहम केआं दाऊद राजा तकर चौधा पीढ़ी भुई। त दाऊद राजे केआं कैदी भोई कइ बेबीलोन देश पुजुण तकर ई चौधा पीढ़ी होरी भुई। तोउं कैदी भोई कइ बेबीलोन पुजुण केआं पता मसीह जमुण तकर चौधा होरी पीढ़ी भुई।
यीशु जमुण
18 यीशु मसीहेb जनम ईं भुआ: जपल तसे ई मरियमे छक यूसुफ जोई भुई,d त तेन्के दुहि के साते उंघुण केआं पेहलाई तस पता लग गा कि से शुची आत्माईc बेलि गभुरवाल भुओ असी। 19 तसे धाणि यूसुफ, जे धर्मी मेह्णु थिआ से तेस बदनाम करण न चहन्ताथ। त तेन मठे तेस छड़ देणे सोचु। 20 जपल से ई सोचुण ईं लगो थिआ दे प्रभु स्वर्गेदूत सुपने एई कइ बोलुण लगा, “ए यूसुफा, दाऊदे कोईया! तु अपु जुएली अपु गी अण्हुण जे डर नउ, किस कि जे गभुर तसे पेट अन्तर असु, से शुची आत्माई कनार भो। 21 से यक कुआ जमाणती। तोउ तसे नओं यीशुe रखुंणf किस कि से अपु मेह्णु तेन्के पापी केआं बचान्ता।”
22 ई सोब तोउं भु, ताकि यशायाह भविष्य वक्ते बेलि परमेश्वरे जे बोलो थिउ से पूरु भोल। 23 तेन बोलो थिउ कि
“हेरे! यक कुवांरी कुई गभुरवाल भुन्ति
त यक कुआ जमाणती
त तेस नओं इम्मानुएल रखते”g