पार 10

सरग दूत आरू तोल तो पिटीत कागेत

1 आनातले मारी आन ओक निक्के लाव तो सरग दूतीन, बादोरीन मूयी एरी, सरग तीग इड़ूरानोन चूड़ेन। ओन तेल्ल ती नाल बाम्ब चित्ती मेन्डू। ओन मोकोम पोकालीन आकाट मेडूरू आरू ओन केलूल किच तो कोमेन आकाट तोव मेन्डूव। 2 ओन केय्य ती ओक उलाक मेन्डान तोल तो पिटीत कागेत मेन्डू। ओड तान्न वेला केलीन सोमून्द ती आरू डेबरा केलीन नेन्दील ती चात्तीक मेन्डीड। 3 आरू निक्के जोड़ ती गुर-मुरूरान डूवीन आकाट कोलार एञ्ञेड। आरू आटनी कोलार एरेक सात गुबोड़ूल वाञी गुडरूरान पोल्ला उपजोतो। 4 सात गुबोड़ूल वाञी गुडरी किली पोकरानोन आन लिकू कानतीन, एरोड आन सरग तीग, “सात गुबोड़ूल आ वाञी गुडरी किली पोकरान पाटेलीन पारगाकमेन आरू आवीन लिकूमेन” एन्डान पोल्लेन वेट्टेन। 5 आरू आन चूड़रान सोमून्द आरू नेन्दील ती केलूल चात्तीक मेन्डान सरग दूत तान्न वेला केय्यीन सरग टिटाक एतीक किली, 6 जुग जुगूग जियोम मेन्डान आरू सरगीन आरू आनात जाम्मा बानीलीन, मोंजीपूरीन आरू आनात जाम्मा बानीलीन, सोमून्दीन आरू आनात जाम्मा बानीलीन गेड़रानेडीन किरीया तिन्नी किली, “एपोर गो मुरले गेराया। 7 एरोड सातवां सरग दूत मोरी ऊन्दूरान वादेक, मापोरबून पाकीक मेन्डान पाटा पूरा एर्रा। आटनी पूरा एर्रा एनी मापोरबून कान तीग काबेर वेन्नी किली लोगीन पोक चियरान तान्न कामीयाल गुरूकूलीन ई पाटेन वेनपीक मेन्डीड” एट्टेड।

8 आनातले आन सरग तीग वेन्नी मेन्डीन आ पोल्ला मारी आनीन ऊबीक किली, “चेन आरू सोमून्द आरू नेन्दील ती केलूल चात्तीक मेन्डान सरग दूतीन केय्य तो उलाकतान तोल तो कागेतीन पात” एट्टेड। 9 आदूग आन सरग दूतीन लेग्गाट चेनी किली, “ई तोल तो पिटीत कागेतीन आनूंग चिय” एट्टेन। आदूग ओड, आनीन “इदीन पाती किली तिन। इद इन पोटे ती गो केता, एरोड इन चोन्ड ती तीन नेय्यीन आकाट तिर्रे मेन्डा” एट्टेड। 10 आदूग आन आ तोल तो पिटीत कागेतीन आ सरग दूतीन केय्य तीग पात्ती किली तिन्देन। आरू आद आन्न चोन्ड ती तीन नेय्यीन आकाट तिर्रे गो मेन्डू; एरोड आन आदीन तिन्दानूग, आन्न पोटे ती केतानो एञ्ञो। 11 तेबे ओड आनीन, “इनूंग कुबे जातूलतेरीन आरू देचेल-देचेलतेरीन आरू पाटेलतेरीन आरू कोसकूलीन बीतेर ती मापोरबून कान तीग काबेर वेन्नी किली मारी बेले पोक चियू लागूरा” एट्टेड।