तोल तो कागेतीन उलाकतानो
5
1 आनातले मारी आन नाड़बूल तो गाद्दी ती उन्डी मेन्डानेडीन वेला केय्य ती ओक तोल तो कागेतीन चूड़ेन।
आदीन वाल आरू बीतराम लिकूरानो मेन्डू।
आरू सात गोटा सीलूल ताप्पी किली आदीन बोन्द चाजूरानो मेन्डू।a
2 मारी आन ओक निक्के लाव तो सरग दूतीन चूड़ेन।
ओड जोड़ ती,
“तोल तो कागेतीन सील तापरानोन उलाक किली आदीन चानतान बातेरतेड एड आय?”
एन्डीड।
3 एरोड आ तोल तो कागेतीन चानतान बातेरतेड एके,
सरग ती आरू मोंजीपूर ती आरू मोंजीपूरीन ले किड़ी बेले एडी टोन्डेरा।
4 आदूग आन नेञ्ञकी-नेञ्ञकी आड़ू मुरीयाकतेन।
एटे एनोड आ तोल तो कागेतीन चानतान आरू आना लिकूरानोन चूड़रान बातेरतेड एडी टोन्डेरा।
5 तेबे,
आ सियानकूल कान तीग ओकूर आनीन,
“आड़मेन;
इद चूड़!
एऊदेन तेरान तो डूवीन आकाटतेडb आरू दाऊदीन कुटूम तो मुर वारीनc आकाटतेड चेयतानीन आराकतेड नाड।
ओड आ तोल तो कागेतीन सात गोटा सील तापरानोन उलाक आरू चान्डूक नाम्बीकताड” एट्टेड।
6 आरू आन आ गाद्दीन आरू नालू जियोम तो बानीलीन नेनगा आरू सियानकूल नाड़बूल कुड्डी किली चाय्यरान आकाट एरी मेन्डान ओक मेन्डा पापीनd आकाटतेड निलतानोन चूड़ेन।
ओनूग सात गोटा कोडूल आरू सात गोटा बोम्मेल मेन्डूव।
आ बोम्मेल एके,
मापोरबू गुलाय मोंजीपूर ती चोटची मेन्डान मापोरबून सात गोटा जियोमूलe आय।
7 ओड वेरी किली गाद्दी ती उन्डरानेडीन वेला केय्य तीग,
आ तोल तो कागेतीन पात्तेड।
8 आरू ओड आ तोल तो कागेतीन पातेक,
आ नालू जियोम तो बानील आरू कोड़ेक नेलवीर सियानकूल,
मेन्डा पापीन आकाटतेडीन मुन्देल माटीकूटेल चिञ्ञेर।
ओर जाम्मेन केय्य ती चारांगील आरू दूप तीग कोपरान सोन तो बेटकील मेन्डूव।
आ दूप मापोरबूग एलगाक मेन्डान लोगीन बिन्तीलf आय।
9 आरू ओर ई पुन्न पाटेन पाडूरीर:
“ईन ई तोल तो कागेतीन पात्ती किली आना तापरान सीलीन उलाकतान बातेरतोत आय।
एटे एनोड ईन कुडीक एरी किली इन नेतीर तीग
तेरानूल-तेरानूल तीग आरू पाटेल-पाटेल तीग आरू जातूल-जातूल तीग आरू देचेल-देचेल तीग
लोगीन मापोरबूग मोलयाकतोत नात।
10 आरू ईन ओरीन आम्म मापोरबूग सेवा चाजू,
मापोरबू आंगरूरान लोग एरीक किली पेलाचकूल चाजोत;
g
आरू ओर मोंजीपूर ती मापोरबून चेंगे आंगरूरार” एट्टेर।
11 आनातले आन नेंजराक किली कुबे सरग दूतकूलीन पोल्लेन वेट्टेन।
ओर गो नेकीकपोड लाक आरू करोड़ आकाट मेन्डीर।
आरू ओर आ गाद्दीन,
जियोम तो बानीलीन आरू सियानकूलीन बोँरेक मेन्डीर।
12 आरू ओर जोड़ ती “कुडीक एर्रान मेन्डा पापीन आकाटतेड ताकोत,
देन माल,
गियान आरू लाव बेटूरान बातेरतेड आय।
आरू ओड पिदीर पातरान,
इजीत तो मान पातरान आरू जुवार चाजू एर्रान बातेरतेड आय” एनी पाटेल पाडूरीर।
13 मारी आन सरग ती,
मोंजीपूर ती,
मोंजीपूर किड़ी आरू सोमून्द तो जाम्मा गेड़रान बानील आरू आवीन कान मेन्डान जाम्मा बानील नातेक,
“गाद्दी ती उन्डरानेडीन आरू मेन्डा पापीन जुवार चाजूरानो,
पिदीर पातरानो इजीत तो मान पातरानो आरू ओनूग लाव टोन्डूरानो नातेक जुग जुगूग एरको”h एनी पाटेल पाडरानोन वेट्टेन।
14 आरू आ नालू जियोम तो बानील,
“आमीन,
आटनीची एरको” एट्टोव आरू सियानकूल मान्डीकूटेल चियी किली मोड़कूरीर।