एऊदा 1

एऊदा

लिकूरान चिट्टी

जुवारतानो

1 ईसू कामीयाल आरू याकूबीन तोल्लेड एऊदेन टिटाक ले,

आम्म बुवा मापोरबू कूयी मेन्डान आरू चोग ती मेन्डान आरू ईसू मसीयाल चाकली मेन्डान लोगूग लिकूरान चिट्टी:

2 इमूंग मापोरबू जियोम नोयपीकतानो, चुक आरू चोग चेड़ीगेन टोन्ड टोन्डी मेनको।

टेगू-टेगू मेरचीकतान गुरूकूल

3 ए आन्न लाडरालेरे! आन इमूंग, आमूंग जाम्मेगी टोन्डी मेन्डान बाचाकतान इसाब तो पाटेन लिकू कुबे मेन्न चाजूरीन। एरोड एबे आन मापोरबूग एलगाक मेन्डान लोगूग ओपोटी ओपीक चियी मेन्डान आ बिसवातीन चेत्तूग इमूंग लेड़रानो आय एनी चोमजाक लागूरा एनमेन। 4 एटे एनोड आम्म नाड़बूल ओदो लोग कुचनाय वेरी किली बिड़ेर नार। ओर मापोरबून माना लोग आय। मापोरबून माया पेमीन दारीयाट कामूल चाजू, दांव टोन्डोतो ना एनी उलटा चोमजेर नार। आरू ओर आम्म ओकूरी सावकार आरू पोरबू ईसू मसीयालीन बाकनूरार। ई लोग डेन्ड बेटूरार एनी मापोरबून कागेत ती मुन्नीत वादेक ले लिकूरानो मेन्डा।

5 ईम ई जाम्मा पाटेलीन मुन्नीत ले पूरा पुन्नी मेनोड बेले एपोर, आन इमीन मारी ओपोट चुरता चाजपीकमेन। यावे मापोरबू इसराएली लोगीन मिसर देचे तीग किली पिटतेल एके ओर कान तीग बिसवात चाजा लोगीन नाचाकतेड। 6 आरू आपलेग मेन्डान पोद्द तो पान्नीन पाती मेनाका आपला डेरेत पाड्डीन चायूरान सरग दूतकूलीन, नियाव एर्रान बेड़तो चिरीक आर्रे, चावाड चीकोड ती चिकरीलोड काटकी किली जुग जुगूग इट्टेड नाड। 7 आटनी सदोम आरू अमोरा आरू आवीन आली पालीत गेड़ेल तो लोग बेले, आरो एरको आयाल चिलाड माईडीनोड दोस पाडरीर आरू आपला मेनूलीन मेन्न के लागेन तो बिचारूल ती बिड़ाकपारे चेन्डीर; मापोरबू आ गेड़ेलीन किच तीग केरीक किली डेन्ड चिञ्ञेड नाड। पापदेरोम चाजूरानेर एतोड नांग नीर-नीरी मेन्डान किच तीग डेन्ड बेटूरार एन्डान पाटेग ओर काटावतेर एञ्ञेर नार।

8 इम नाड़बूल कुचनाय वेरी किली बिड़ी मेन्डानेर बेले आटनीतेर मेन्डार। ओर आपला केलायूकूडीन पोडे चेत्त चाजी किली आपला-आपला मेनीन चूत पाटतीकतार, मापोरबून पान्नीन बाकनूरार आरू सरग तो जियोमूलीन निन्दरूरार। 9 एरोड सरग दूतकूलीन मुकीयाल मिकाईल एन्डानेड मूसाल मोड़ीन इसाब ती चेयतानीनोड पोका-पोक्की एरेक, ओड चेयतानीन निन्दरू आरू नियाव चिड़ाक डाडू चाजाका, “पोरबू इनीन कावडूराड” एट्टेड। 10 एरोड ई लोग एके चोमेन चिला पोसू जातीन आकाट मेन्नी किली ताम्म मेन्न के लागेन तो लालेच ती नातो एरको पाटेलीन बेले चोमजी किली, ताम चोमजा जाम्मा इसाबूलीन निन्दरूरार आरू आ जाम्मेन तीग नाच चेन्डार।

11 ईटो लोगूग ओ! ओ! बेड़तो गेरा एर्रा। एटे एनोड ओर बेले केनीन पाव ती चेली किली ओन चेला बूलेलीन पातीयाकतेर नार। ओर बेले बिलामीन आकाट पोयसेलीन लालेचीन चेत्तूग आपलेन आपला ई कियाल ती चिरकीक एञ्ञेर नार। आरू कोरआ एन्डानेडीन आकाट ऊबागेरी एरी किली नाच चेन्डेर नार।

12 मापोरबून चोगीन चुरता चाजू, ईम तिन्दान तियार तो बोजी ती, ई लोग, सोमून्द तो नीर किड़ी पाकी किली नीर जाजीन बुड़ाकतान चाटरेल आकाट मेन्नी किली, नार्र चिलाका इम चेंगे तिन्नी किली आपला ई पोट्टेन पाञीकतान गाडीकूल आकाटतेर आय। ओर वाञी पाडीकपाका आमान कुमी मेन्नी वाल्ली तीग वेलान बादोरीन आकाट तो लोग आय। इरोट वेट्टी किली वारकूल चेंगे पेड्डी किली तीनतान, बेरे ती मेरकूल आकाटतेर आय। 13 बेड़कूल गुरलेल आट्टी किली पेपोलीन पोड़ी तीनतान सोमून्द तो बेड़तो एलकेल आकाट, ऊर आपला लाज चिला कामूलीन पारगाकतार। ऊर आपला पाडीन चायी किली चुल्लान चुक्केल आकाटतेर आय। ई लोगूग जुग-जुग तो चावाड चीकोडीन इड़रानो मेन्डा।

14 आदमीन तीग सातवां तेरानतेड अनोक एन्डानेड बेले ऊर बीतेर ती, “चूड़ूर, पोरबू नाती केचूर चिला आजार-आजारतेर चेंगे, 15 जाम्मा लोगीन नियाव चिड़ाक वेरमेड। ओड मापोरबून माना लोग चाजी मेन्डान आरू मापोरबू गिन गिनाकतान जाम्मा कियाल तो कामूलीन नियाव चिड़ाकताड आरू ओदेरोम तो पापीयालेर मापोरबून विरूद ती पोकरान जाम्मा केर पोद्दूलीन बेले नियाव चाजूराड” एनी मापोरबून कान तीग काबेर वेन्नी किली पोक्केड नाड। 16 ऊर गुर मुरूरानेर, लोगीन का केचूर कानतानेर आरू आपला पापदेरोम तो लालेचूल ती चेलानेर आय। आरू आपला चोन्ड तीग आपलेन बोड़पान एरीकतान पाटेल ऊबूरार आरू तामूंग लाब एरको एनी आवूर लोगीन चोड़ीयाकतान पाटेल ऊबूरार।

बिसवातीन चान्दीक केडीकतानो

17 एरोड ए लाडरालेरे! आम्म पोरबू ईसू मसीयाल नीतीकतानेर पिटतेल एर्रानोन मुन्नीत ले पोक्की मेन्डानोन चुरता चाजूरानो आय। 18 ओर इमीन, “चेरा चेरी वादेक मापोरबून पाटेन आँसी डेकली चाजी किली मापोरबूग मेन्न ती वेरा आपला बिचारूल ती चेल्लान लोग वेर्रार” एनी पोक्केर नार। 19 आटनीतेर इमीन कावडी उय्यीक किली पुटा-पुटा चाजूरान लोग आय। ओर ई मोंजीपूर तो बिचारूल ती चेल्लार आरू ओर कान मापोरबून जियोम चिल्लाड।

20 एरोड ए लाडरालेरे! ईम आपला निक्के रेच्चाट नाती केचूर चिला बिसवातीन चान्दीकपूर। आरू नाती केचूर चिला जियोमीन तीग बिन्ती जोड़ जोड़ी मेनूर। 21 मापोरबून चोग ती बिड़ी मेनूर। आरू जुग-जुग तो जियोमीन बेटू आम्म पोरबू ईसू मसीयाल जियोम नोयपीकतानोन आचा चाजूर। 22 आरू बिसवात ती कोमजोर मेन्डान लोगूग जियोम नोयपीकपूर। 23 आरू ईम बेले आटे एरा मेनकोर एनी नारची किली आवूर लोगीन किच तो डेन्ड तीग टान्डी किली आरू नारची किली आवूर लोगूग जियोम नोयपीकपूर। ओर गान्डेल ताम चाजूरान दारीयाट कामूल तीग चूत पाडरानूग आ गान्डेलीन बेले गिन गिनाकपूर।

चेरा चेरीत पाटेल

24-25 मापोरबू इमीन पापदेरोम ती बिड़रान कान तीग बाचाक नाम्बीकताड। आरू आपला मेडूरान रेगीन मुन्देल इमीन नाती केचूर चिलायेर आरू ऊदीम एर्रानेर नीतीक नाम्बीकताड। ओडी आमीन बाचाकतानेड आरू आम्म ओकूरी मापोरबू आय। एपोर आम्म पोरबू ईसू मसीयालीन टिटाक ले ओनूग इजीत तो मान एरको। ताकोत, आंगरूरानो आरू पान्न ओनोती आय। एटे मुन्नीत जाम्मा जुग ती मेन्डू आटनी एबे आरू जुग जुगूग बेले एरको। (आटनी एरको) आमीन।