बिन्ती जोड़ू गुवारतानो
3
1 चेरा चेरी,
ए बायीयोवे आरू दादेरे!
इम कान एटे एञ्ञो आटनी पोरबून पोद्द जेटके वेलोको आरू चाराक एरको एनी आमूंग बिन्ती जोड़ूर।
2 आम एड़जालेर आरू आबूचकूल तीग बाची मेनकोम एनी बेले बिन्ती जोड़ूर।
एटे एनोड जाम्मा लोग बिसवात चाजारा।
3 एरोड पोरबू,
बिसवात चाजू एर्रान बातेरतेड आय;
ओड इमीन बेरकेच चाजी किली एड़जाट चेयतानीन तीग राका चाजूराड।
4 आम इमीन तियारतान पाटेलीन ईम मानूमोर,
आरू मान मानी बेले मेन्डार एनी आमूंग पोरबून तीग इम पोडे आचा मेन्डा।
5 ईम मापोरबून चोगीन पुनूंग आरू मसीयाल सामालतान आकाट सामालूक पोरबू इम मेन्नीन चेलाकपेकेड।
टेगरालेर मेनमोर
6 ए बिसवासी बायीयोवे आरू दादेरे!
ईम टेगरालेर ले आरू आम्म तीग मेरीयूरान चेत्त पाटेल ती चेलायेर ले,
पुटा मेनूर एनी आम आम्म पोरबू ईसू मसीयालीन पिदीर ती तियारूकमोम।
7 एटे एनोड आम्म आकाट तो चेला बूलेल ती ईम चेल्लानो आय एनी ईम कुदे पुट्टोर।
आम इम नाड़बूल टेगरालेर मेनाका,
मोयमोत चाजरूम।
8 आरू आरो लोगीन कान तो ई बोजीन,
पोयसेल चियाका तिनोमा;
एरोड मोसागेत आरू दान्दा चाजी किली इमूंग एरूगी बोजा एरा मेनकोम एनी चित्ता पाकटा काम चाजूरूम।
9 आमूंग इम कान तीग तिनूंग पान्न चिल्ला एनी एरा,
एरोड ईम आम्म आकाट चेलोकोर एनी,
आम इमूंग गोवा एरकोम एनी आय आटनी चाजूरूम।
10 आरू आम इम नाड़बूल मेनेकी बेले,
एड एरको बूता चाजू मेन्न बावाकोड ओड तिन्दानो एरा एनी तियारची मेन्डूम।
11 एरोड इम नाड़बूल ओदेर-ओदेर टेगरीकूल मेनमेर,
आरू ओदेर एके बूता चाजाका आवूर लोग चाजूरान बूतेलीन बेले आटकाकमेर एनी वेनमोम।
12 आटेरीन आम पोरबू ईसू मसीयाल तीग ओर किटूक काटूकनाय काम चाजी किली ताम्म कामेयीन तिनकेर एनी तियारूकमोम आरू चोमजाकमोम।
13 आरू ए बायीयोवे आरू दादेरे!
ईम रेच्चाट चाजूरान ती एसकोट एरमोर।
14 एड बेले ई चिट्टीत आम्म पाटेन मानाकोड ओन कान नेंजेर इडूर,
आरू ओड लाज पाडेकेड एनी ओन चेंगे गेड़ी बीड़ूमोर।
15 एरोड बेले ओनीन कुचरेय आय एनी चोमजूमोर,
एरोड तोल्लेड आय एनी किली चोमजाकपूर।
चेरा चेरीत जुवार
16 एपोर चुक तो पोरबू तानी इमूंग एतोड बेले आरू जाम्मा इसाब तीग चुक चियकेड।
आरू पोरबू इम जाम्मेन चेंगे मेनकेड।