तिमूतीयूसीन चोटतानो
3
1 आदूगी जियोम मान्डा कान्डूग,
आन आरू सिलास एतेन्स गेड़े ती तेबूरान उवाट चाजोम।a
2 आरू आम्म बिसवासी तोल्लेड आरू आम्म चेंगे मसीयालीन एडो पाटेन वेनपीक किली मापोरबूग सेवा चाजूरान तिमूतीयूसीन,
ऊड इमीन उचांग चियी किली बिसवात ती बेरकेच चाजेकेड एनी किली आय चोटतोम।
3 तेबे इम कान तीग एडी,
ई आबोड़ूलीन चेत्तूग बिसवात ती कोमजोर एरा मेनकेर एनी ओनीन चोटतोम।
एटे एनोड मापोरबू आमीन ईटे आबोड़ूल एरू नीतीकतेड नाड एनी ईम कुदे पुट्टोर।
4 एटे एनोड आम इम लेग्गाट मेनेक,
आमूंग सताव एरू लागूरा एनी मुन्नी की इमीन पोक्कारे चेन्डूम आरू ईम पुन्दान आकाट आटनीची एञ्ञो।
5 आदूगी आन्न जियोम मान्डा कान्डूग इम बिसवातीन इसाबीन पुनूंग ओनीन चोटतेन।
एटे एनोड पोरकूरान चेयतान इमीन एटे बेले पुसीयाकतेड नाड बे आरू आम्म मोयमोत पोका चेन्डा बेले एनी आन नारचूरीन।
तिमूतीयूसीन तीग काबेर टोन्डूरानो
6 एरोड एबे तिमूतीयूस,
इम लेग्गाट तीग आम्म लेग्गाट मेल्ली किली,
इम बिसवात तो आरू चोग तो रेच्चाट काबेरीन एन्दरेड नाड आरू ईम एतोड नांग आमीन चोग तीग चुरता चाजी किली,
आम इमीन चूड़ू एटे जियोम उकराकमोम आटनी ईम बेले आमीन चूड़ू जियोम उकराकमोर एन्डान पाटेन बेले वेनपीकतेड।
7 आदूगी ए बिसवासी बायीयोवे आरू दादेरे!
आम आम्म जाम्मा आबोड़ूल आरू सतावूल ती मेनेक,
इम बिसवातीन बीतेर ती वेन्नी किली जियोम मान्डाकमोम।
8 एटे एनोड एपोर ईम पोरबून कान बेरकेच मेन्डानूग पेची चेन्डान आम्म जियोम मारी वेञ्ञो एन्डान आकाट एञ्ञोम।
9 आरू मापोरबून मुन्देल,
इम चेत्तूग आम कुबे वेड़का एर्रानूग,
इम इसाब ती एटे चाजी मापोरबून जुवारपोड बेले,
आद तोडे ई आय।
10 इमीन बेट गाट एरू एरको आरू वेरी किली इम बिसवात ती कोमी मेन्डानोन पूरा चाजू एरको एनी आम चित्ता विलोमी आरू पाकटा पोकाली चेत्त मेन्न तीग बिन्ती जोड़ जोड़ी मेन्डाम।
11 एपोर,
कुदे आम्म बुवा मापोरबू आरू आम्म पोरबू ईसू इम लेग्गाट वेरू आमूंग पाव पुच्चेकेड।
12 आरू आम एटे इम्मोड चोग चाजूराम आटनी,
ईम बेले ओकूर ओकूरीनोड आरू जाम्मा लोगीनोड चोग चाजूरान ती चान्दू आरू आगे बोड़ू पोरबू चेंग चियकेड।
13 आम्म पोरबू ईसू तानूंग एलगाक मेन्डान जाम्मा लोगीनोड वेरेक,
b आम्म बुवा मापोरबून मुन्देल ईम बोदी चिलायोर आरू नाती केचूर चिलायोर एरकोर एनी,
ओड इम मेन्नूलीन बेरकेच चाजेकेड।
आटनी एरको।