गल 3

बिसवात आरू नियोम

1 ए गलतीयेत बाकवाट बिसवासी लोगीने! इमीन गो आन, ईसू कुरूस पारे ती नांग कूटील कोटीक एञ्ञेड एन्डान पाटेलीन ईम बोम्मेग चूड़रान आकाट चोमजाकतेन नान। इमूंग नातो पोड़ी मारोतो ना? आदूग ईम आ पाटेल तीग गूचोर। 2 आन इमीन ई ओकती पाटेन जाच आडूरान एनमेन: “ईम मापोरबून जियोमीन, नियोमूल ती चेल्लानूग बेटी मेन्डूर काय एडो पाटेन वेन्नी बिसवात चाजूरानूग बेटी मेन्डूर? 3 मापोरबून जियोमीन तीग पीयू मुरीयाकतान जियोमीन, एपोर ईम, इम ताकोत तीग नियोमूलीन मानी किली पूरा चाजूराम एनमोर काय एटे? एटे ईम आदरा बाकवालेर आय आदूग? 4 ईम पोरबून पातीयाकतानूग कुबे सताक एर्रूर जे? आव पोका एञ्ञोव आदूग? एरा, आव पोका एरावा एनी आचा मेन्डा। 5 इमूंग नाती केचूर चिला जियोमीन चियी किली, इम नाड़बूल पोरलेत कामूल चाजूरान मापोरबू, ईम नियोमूल ती चेल्लानूग, ई कामूलीन चाजेड नाड काय, ईम एडो पाटेन वेन्नी आदीन बिसवात चाजूरानूग ई कामूलीन चाजेड नाड?”

6 इबराईम मेनगेन चुरता चाजूर! ओन बीतेर ती “मापोरबून बिसवात चाजेड आरू आदूगी मापोरबू ओनीन देरमी आय एनी मानेड” एनी लिका मेन्डा। 7 आदूगी बिसवात चाजूरानेरी इबराईमीन तेरान तो पापकूल आय एनी पुनूर। 8 आरू एऊदीकूल चिला देचेल-देचेल तो लोगीन बेले, बिसवात चाजूरानूग मापोरबू देरमीकूल एरीकताड एन्डानोन मुन्नीत ले ई पुन्नी किली, ओड इबराईमीन “इन तीग जाम्मा जातीत लोगूग आसतीर टोन्डूरा” एनी एडो पाटेन मुन्नी की वेनपीक मेन्डीड एनी मापोरबून कागेत ती लिका मेन्डा। 9 आदूगी बिसवात चाजूरानेर, बिसवात चाजी मेन्डान इबराईमीन चेंगे आसतीरीन बेटूरार।

10 एरोड एंगोट लोग देरमीकूल एरीक एरू नियोमूलीन मानूरान कान आचा इड्डी मेन्डार ओर जाम्मा, चेरापीन काबजे ती मेन्डार। एटे एनोड, “नियोमूल तो कागेत ती लिकी मेन्डान जाम्मा पाटेलीन मानी किली आदीन ती चेलू मोंजीबूत मेनाकोड ओनूग चेराप काटूरा” एनी लिका मेन्डा। 11 एबे नियोमूलीन मानी किली एडी मापोरबून नेंजेर ती देरमी एरू ओड़ार एन्डानो रेच्चा पाता चेलूमो। एटे एनोड, “देरमी मांजा बिसवात चाजूरान चेत्तूग चेत्त जियोमीन बेटूराड” एनी बेले लिका मेन्डा। 12 एरोड नियोमूलीन मानू बिसवात चाजू लागाया। एरोड “एड आवीन मानूराड ओड आवीन तीग जियोम बेटूराड।” एनी बेले मापोरबून कागेत ती मेन्डा। 13-14 एरोड इबराईमूग चियरान आसतीरीन ईसू मसीयालीन तीग एऊदीकूल चिला लोग बेले बेटेकेर आरू आम, बिसवासी लोग बेले जुमान चिड़ाक मेन्डान नाती केचूर चिला जियोमीन बिसवात तीग बेटोकोम एनी आम्म चेत्तूग मसीयाल चेरापीत एरी किली आमीन नियोमूल तो चेराप तीग चोड़ाकतेड। एटे एनोड, “एरीन मेर ती ऊटीकतार ओनूग चेराप काटूरा” एनी लिका मेन्डा।

नियोम आरू चियी मेन्डान पाटा

15 ए बिसवासी बायीयोवे आरू दादेरे! एपोर आन इमीन मांजेन नियोम तीग ओक पाटा पोक्कूमेन। मांजा बेले नातो इसाब ती बेले जुमान चिड़ाकपोड, चिड़ाकतान पिटतेल एडी आदीन बादलारा आरू आना आगेर जोड़ारा जे? 16 आटनी इबराईमीनोड आरू ओन तेरानतेडीनोड मापोरबू जुमान चिड़ाकतेड। आरू आना ओन तेरानतेर एनी पोकाया। आटे एरोड कुबे लोग एनी चोमजू एर्रूमीन। एरोड तेरानतेड एनी ओकूरीन पोक्कूमो। आयची तेरानतेड आय मसीयाल। 17 आन पोकरानो इद आय: मापोरबू मुन्नीत ले इबराईमूग जुमान चिड़ाक मेन्डीड। आदीन ले चार सोव तीस बेरेकूल पिटतेल वेर्रान नियोमीन चेत्तूग, ओड तान चियी मेन्डान पाटेन पोका चेनीकपेडा। 18 एटे एनोड आम नियोमूलीन मानी किली इबराईमूग चियी मेन्डान आसतीर तो काबजेतेर एर्राम एनमोम एरोड, काबजेतेर एर्रानो मापोरबू चिड़ाक मेन्डान जुमानीन इसाब ती एञ्ञो एनी पोक्कू ओड़ाम। एरोड मापोरबू आपला माया पेम तीग, आसतीरीन जुमान चिड़ाक किली गो आय इबराईमूग चिञ्ञेड।

19 मारी नांग पिटतेल नियोमूलीन चिञ्ञेड? एनी एड बेले जाच आडूरार। आन ईटे जवाब चियूमेन: आरो तेरानतेडीन बीतेर ती जुमान चिड़ाक मेन्डीड, ओड वेर्रारे आम पापीकूल आय एनी पुन्नी मेनकोम एनी, नियोमूलीन चिञ्ञेड। ओड आवीन सरग दूतकूलीन तीग बाडी मुत्ताकीन आकाट तो मूसाल केय्य तीग नीतीकतेड। 20 एपोर चूड़ूर! इरडू कुदेलतेर एरोड गो बाडी मुत्ताकीन आकाटतेड लागूराड। एरोड मापोरबू ओकूरी मेन्नी किली कुदे तानी आय जुमान चिड़ाक किली पाटा चिञ्ञेड।

मूसाल नियोमूलीन इसाब

21 आटेकोड, एटे नियोमूल मापोरबू चिड़ाक मेन्डान जुमानीन विरूद ती मेन्डाव आदूग? आटे मुरले एरा। एटे एनोड नियोम जियोम चियरानो मेट्टो एरोड, देरमी एरीक एर्रानो बेले नियोम तीग चेत्तेगी एर्रूमीन। 22 एरोड, मापोरबून कागेत ती मेन्डान आकाट बिसवास चाजूरान लोग, ईसू मसीयाल कानी बिसवात चाजी किली चिड़ाक मेन्डान जुमानीन बेटेकेर एनी जाम्मा ई पापदेरोमीन काबजे ती मेन्डार।

23 एपोर, ईसू मसीयालीन बिसवात चाजूरान इसाब वेर्रान ले मुन्नी आम नियोमूल तो काबजे ती नी मेट्टोम आरू आ बिसवात चाजूरान इसाब वेर्रारे आम जेल ती केटची एर्रान केयदालेरीन आकाट मेट्टोम। 24 आटेकोड आम बिसवात तीग देरमीकूल एरीक एरकोम एनी मसीयालीन वादेक आर्रे नियोमूल पिटीलेक पापकूलीन पोरीकतानेडीन आकाट मेन्नी किली आमीन चाकली-चाकली मेट्टोव। 25 एरोड एपोर ईसू मसीयालीन बिसवात चाजूरान इसाब वेर्रानूग, एबेत ले आम आमीन पोरीक मेन्डान आ नियोमूलीन काबजे ती चिल्लाम। 26 एटे एनोड ईम जाम्मा मसीयाल ईसून कान बिड़ी मेन्डानूग बिसवात तीग मापोरबून बेड़कूल चिन्डूल एञ्ञोर नार। 27 आरू इम कान तीग एंगोट लोग बपतीसमा पात्ती किली मसीयालीन कान बिड़ोर नार आरू ईम जाम्मा मसीयालीन चेला बूलेल ती मिसोर नार। 28 आरू एपोर ईम जाम्मा ईसू मसीयालीन चेंगे बिड़ी मेन्डानूग ओकती सामानतोर आय। आदूगी एऊदीकूल आरू एऊदीकूल चिलायेर, कामीयाल आरू चोड़ाक एर्रानेर, माईल आरू आयचील एनी आवूर आवूरतोर चिल्लार। 29 आरू ईम मसीयालीनोर मेन्डानूग, इबराईमीन तेरानतोर आरू मापोरबू चिड़ाक मेन्डान जुमानीन इसाब ती काबजेतोर बेले आय।