गल 1

गलतीया देचेतेरूग

पोलूस लिकूरान चिट्टी

जुवारतानो

1 पोरबू नीतीकतानेड एर्रान पोद्दीन आन पोलूसूग आरोई लोग ओपीक चियारी, चिलाड एके एड आले ओकूरी मांजा बेले चियाडी एरोड ईसू चाय्यरान कान तीग जियोम पाटतीकतान बुवा मापोरबू आरू ईसू मसीयाल आय ई पोद्दीन चिञ्ञेड नाड; आ पोलूसीन टिटाक ले, 2 आरू आन्न चेंगे मेन्डान जाम्मा बिसवासी लोगीन टिटाक ले,

गलतीया देचे ती मेन्डान पोरबून बिसवात चाजूरान मान्देल तो लोगीन पिदीर ती लिकूरान चिट्टी इद आय:

3 आम्म बुवा मापोरबू आरू आम्म पोरबू ईसू मसीयाल टिटाक ले इमूंग माया पेम आरू चुक टोन्ड टोन्डी मेनको। 4 आम्म पापदेरोमूलीन चेत्तूग, बुवा मापोरबून उवाट तीग, एबेत ई एड़जाट जुग तीग आमीन चोड़ाक, ईसू मसीयाल तानीन तानी चाय्यीक एरू ओपीक एञ्ञेड। 5 लोग ओनूग जुग जुगूग इजीत तो मान चियकेर। आटनी एरको।

आरोई आवूर तो एडो पाटा चिल्ला

6 मसीयाल ईसून माया पेम तीग, इमीन कूयूरान मापोरबून ईम एटे ती इञ्ञोत जेटके नी चायी किली आवूर तो एडो पाटेन पातीयाक मुरीयाकतोर? एनी आन निक्के काबा एरमेन। 7 एरोड, आरोई आवूर तो चेत्त एडो पाटा चिल्ला। एरोड इमीन बुदी बुलकाकतानेर आरू मसीयालीन एडो पाटेन बादलू कानतानेर ओदेर मेन्डार। 8 एरोड, आम इमीन वेनपीक मेन्डान एडो पाटेन चायी आवूर तो पाटेन एडो पाटा आय एनी, आमी एरकोम चिलाड आरो सरग दूत बेले एरकेड, एड बेले, वेनपीकपोड, ओरूग चेराप काटोको। 9 एटे आम मुन्नी पोक्कोम नाम, आटनी आन एपोर मारी पोक्कूमेन: आरो एडो पाटेन ईम पातीयाकतोर नार, आदीन चायी आवूर तोन एड बेले इमीन वेनपीकपोड ओनूग चेराप काटोको।

10 एपोर, एटे आन मांजेग मेन्न ती वेर्रानोन पोक्कू कान्डूकमेन काय मापोरबूग मेन्न ती वेर्रानोन पोक्कू कान्डूकमेन? एटे आन मांजेन वेड़का एरीक कान्डूकमेन आदूग? आन एबेतार्रे मांजेनी वेड़का एरीक कानतीन एरोड, मसीयालीन कामीयाल मेनेनामीन।

पोलूस एटे तीग पोरबू नीतीकतानेड एञ्ञेड?

11 ए बिसवासी बायीयोवे आरू दादेरे! आन वेनपीकतेन जे? आ एडो पाटा मांजेनो एरा एनी ईम पुन्दानो आय एनी आन मेन्न चाजूमेन। 12 एटे एनोड आद आनूंग मांजेन टिटाक ले टोन्डाई, आरू आदीन एडी आनीन मेरचीकपारी बेले, एरोड ईसू मसीयाल आनीन पारगाकतानूग आद आनूंग टोन्डोतो।

13 एटे एनोड मुन्नी आन एऊदी देरोम ती चेलेक आन्न चेलनूकूड़ूल एट्टोव मेट्टोव आरू आन एटे मापोरबून बिसवात चाजूरान मान्देत लोगीन निक्के आबूच एरी किली सताकतीन आरू ओरीन नाचाक कानतीन। 14 आरू आन्न पुरकेतेर नियोमूलीन रेच्चा मेन्न लागाक किली मानूरानूग एऊदी देरोम ती, आन्न जुग तो आन्न एऊदी जातीत कुबे लोगीन ले आगेर आन चान्दारे चेन्डीन एनी ईम वेट्टोर नार। 15 एरोड मापोरबू एके आनीन जेनमूरान ले मुन्नीत ले आची किली तान्न माया पेम तीग आनीन कूयेड। 16 आरू ईसू मसीयालीन पाटेलीन आन एऊदीकूल चिला लोगीन वेनपीकपेकेन एनी, मापोरबू ईसू मसीयालीन तान्न चिन्ड आय एनी आनूंग पारगाक मेन्न चाजेड। आन आतोड तुरते आरो बेले मांजा आनूंग चुवाल चियकेड एनी ओरेल चेनेना। 17 आरू आन्न ले मुन्नी तान्न काबेरीन पोक्कू नीतीक मेन्डान पोरबू नीतीकतानेरीन लेग्गाट एरूसेलेम ती बेले चेनेना। एरोड आन अरब देचे ती चेन्डेन आरू आना तीग दमीसक गेड़े ती मारी मेलेरनेन। 18 आनातले मुकपोकाल मेन्नी किली केपा एन्डान पतरसीनोड बेट गाट एरू एरूसेलेम ती चेन्डेन, आरू ओन चेंगे पोन्दरा दिना आर्रे मेट्टेन। 19 एरोड, पोरबू नीतीकतानेरीन कान तीग, पोरबून तोल्लेड याकूबीन चायी एरोडी बेट गाट एरेना। 20 आन इमीन लिकूरान पाटे ती आन टेगाना एनी आन मापोरबून मुन्देल किरीया तिन्नी किली पोक्कूमेन।

21 आदीन ले पिटतेल आन सूरीया आरू किलीकीया देचेल ती वेञ्ञेन। 22 एरोड एऊदीया देचे ती मसीयालीन चेंगे बिड़ी मेन्डान पोरबून बिसवात चाजूरान मान्देल तो लोग एबले बेले आनीन चूड़ाका मेन्डीर। 23 एरोड “मुन्नी बिसवासी लोगीन सताकतीड आरू नाचाकतीड जे? ओडी एपोर आयची बिसवात तो एडो पाटेन वेनपीकमेड” एनी वेनदीर। 24 आरू ओर आन्न चेत्तूग मापोरबून चाराकतेर।