पोलूस आरू मापोरबू नीतीकतानेर आय एनी टेगरानेर
11
1 आन आटे काबाल आकाट ऊबूरानोन ईम माप चाजोड रेच्चा एर्रूमीन।
आटनी ईम मुन्नीत ले बेले चाजूमोर।
2 माल आडूरान मांजेग कुंवारा मालीन चियरान बुवेन आकाट आन इमीन मसीयालूग ओपीक चियू पाटा चिञ्ञेन नान।
आदूग मापोरबू इमीन चाकली मेन्डान आकाट आन बेले इमीन चाकलूमेन।
3 एरोड एपोर,
बाम्ब वेरी किली आव्वेन बूलकाकतान आकाट,
ईम मसीयालीन चेत्ते आरू केचूर चिला मेन्न तीग पातीयाकतान कान तीग गूचू एड बेले इमीन बुलकाताड एनी नारचूमेन।
4 एटे एनोड एड बेले,
“आम इमीन केडीकतान ईसून चायी आवूर ईसून ईम मानूरानो आय चिलाड ईम पात्ती मेन्डान मसीयालीन जियोमीन चायी आवूर जियोमीन पातरानो आय चिलाड ईम बिसवात चाजूरान एडो पाटेन चायी आवूर तोन बिसवात चाजूरानो आय” एनी केडीकपेक ईम आवीन टोक्कायी गो पातीयाकमोर।
5 एरोड एर तामीन पोरबू नीतीकतान बेड़कूल लोग एनी चोमजूमेर,
ओर कान तीग ले आन आनीन किन्डीक बेले इनमानतेन मानाना।
6 आन रेच्चा ऊबू पूनाकोड बेले आनूंग बुदी मेन्डा।
आम इदीन जाम्मा इसाबूल ती ईम पुन्नारे रेच्चा पारगाकतोम नाम।
7 ईम इजीत्तोर एरकोर एनी आन कुदे इनमानतेन एञ्ञेन आरू मापोरबून एडो पाटेन पोयसेल पाताका इमीन मेरचीकतेन।
आटे चाजी किली आन मुरले नाती गेलती चाजेना।a
8 आन पोरबून बिसवात चाजूरान आवूर मान्देल तो लोगीन जूरेन;
आद मारी आन इमूंग एडो पाटेन पोक चियरान सेवा चाजू ओर तीग आन्न बूतीन पात्तेन।
9 आरू आन इम चेंगे मेनेक,
आनूंग नातो एरको कोम पाडोड आदीन इमीन आडेना।
एटे एनोड मकीदूनीये तीग वेर्रान ओदो बिसवासी तोल्लेर आनूंग लागूरानोन एन्दरेर।
आरू आन इमीन आडी किली इम पोडे एतोडी बोजा टेंगड़ेना आरू इनेत आर्रेत ले बेले आटनी टेंगड़ाना।
10 एबे,
ई इसाब ती मसीयालीन चेत्त आन्न कान मेन्डानूगी गो,
आकाया पेरगेन ती मेन्डानेर एडी बेले आन ईटे बोड़पान एर्रानोन आटकाक ओड़ार।
11 एटे आन इमीन चोग चाजा कान्डूग इम पोडे बोजा टेंगड़ाना एनमेन आदूग?
आन इमीन एदरा चोग चाजूमेन आदीन मापोरबू पुट्टेड।
12 एरोड ओदेर आम्म आकाट ताम बेले पोरबू नीतीकतानेरीन काम चाजूमोम एनी बोड़पान एरू दांव कातेर नार।
ओरूग बोड़पान एरू दांव टोन्डा मेनको एनी आन मुन्नीत ले काम चाजूरीन आरू आवीन एबे बेले चाज चाजी मेन्डानी एनी उवाट चाजूमेन।
13 एटे एनोड आटनीतेर नकली पोरबू नीतीकतानेर आय।
ओर मसीयाल नीतीकतानेर आकाट आपलेनी पोबाक किली टेगरान कामूल चाजूमेर।
14 आदीन ती काबा एर्रान आकाट नाती चिल्ला।
एटे एनोड चेयतान बेले गो आटनी मेडूरान सरग दूतीन आकाट आपलेनी पोबाकमो।
15 तेबे गो आदीन चेलालेर बेले देरमीकूल आकाट देका पाडूमेर।
आदीन ती काबा एर्रान आकाट नाती चिल्ला।
ओर चाजूरान कामूल इसाब ती नी ओर मुरजूरार।
पोलूस आबोड़ एर्रानो
16 आन मारी बेले पोक्कूमेन;
आनीन एडी काबाल आय एनी चोमजूमोर।
आटनी चोमजोड बेले ईम काबालेरोन सामालतान आकाट आन्नोन बेले सामालपारा नांग?
तेबे गो आनूंग बेले किन्डीकेच बोड़पान एरू एर्रा।
17 आटनी आन बोड़पान एरी नातीन एरको ऊबूरान,
आदीन पोरबू मेन्न चाजूरान आकाट ऊबाना।
एरोड काबालीन आकाट ऊबूमेन।
18 कुबे लोग ई मोंजीपूर तो इसाबूलूग बोड़पान एरमेर।
आटनी आन बेले बोड़पान एर्रान।
19 ईम बुदीतोर मेन्नी बेले काबालेरोन आदरा वेड़के ती टोक्कायी गो सामालूकमोर।
आद रेच्चाट आय आदूग?
20 एटे एनोड इमीन एड बेले आपला काबजे ती पाटतीकपोड बेले,
चिलाड इम तीग तामूंग कामाकपोड बेले,
चिलाड इमीन टेगी तिनोड बेले,
चिलाड एड एरको तानीन तानी बेड़तेड एरीकपोड बेले,
एड एरको इम मोकोम ती तापोड बेले,
ओरोन जाम्मेनी ईम टोक्कायी गो सामालूकमोर।
आद रेच्चाट आय आदूग?
21 आटनी चाजू आम निक्के कोमजोरतेर आय एनी पोक्कू एटे तीग आनूंग लाज पेपाया?
आन लाज एर्रानी।
ओर बोड़पान ऊबू नाम्बीकतार एरोड आन बेले ओर आकाट बोड़पान ऊबू नाम्बीकतान।
एरोड आटनी चाजोड आन काबाल आय।
22 ओर इबरानीकूल आय एनोड आन बेले इबरानी आय।
ओर इसराएलीकूल आय एनोड आन बेले इसराएली आय।
ओर इबराईमीन तेरानतेर आय एनोड आन बेले इबराईमीन तेरानतेन आय।
23 ओर मसीयालीन काम चाजूरानेर आय एनोड आन ओर ले बेले आगेरतेन आय।
(आन काबाल आकाट पोक्कूमेन)।
आन ओर ले आगेर आदीक मोसागत चाजेन नान।
ओर ले आगेर गेन-गेन जेल ती केटपीक एञ्ञेन,
ओर ले आगेर कोड़ेनोड चाटपीक एञ्ञेन,
गेन-गेन चाय्यीक बेटाक एञ्ञेन।
24 चेंबोट एऊदीकूल केय्य तीग कोड़ेक उन्नीस गोटा गुबोड़ूल कोड़ेनोड मार तिन्देन।
25 मुप्पोट बाड़येनोड मार तिन्देन,
ओपोट केलकूलोड ताप्पेर,
मुप्पोट आन चोक्की मेन्डान नीर जाज पिनोतो।
ओक चित्ता विलोमी पाकटा पोकाली सोमून्द तो नीर ती मेट्टेन।
26 आन गेन-गेन पाव ताकेक पेरेड तीग वेर्रान आबोड़ूल,
डोंगालेरीन तीग वेर्रान आबोड़ूल,
आन्न लोगीन कान तीग वेर्रान आबोड़ूल,
एऊदीकूल चिला लोगीन कान तीग वेर्रान आबोड़ूल ती मेन्डीन।
गेड़े ती,
चिड़ा बाट ती,
सोमून्द ती नातेक आबोड़ूल बेटेन।
बिसवासी तोल्लेनकूल एनी टेगरान लोगीन कान तीग वेर्रान आबोड़ूलीन बेटेन।
27 आन मोसागत चाजी किली आबोड़ एरी किली मुरले तुञ्ञू ओड़ा कियाल ती गेन-गेन मेट्टेन।
बोजीग आन्डरानो आरू नीरूग आन्डरानो एट्टोत आय एनी पुट्टेन आरू गेन-गेन तिनूंग नाती चिल्ला कियालूग मुरानी मेट्टेन।
पाञ्ञील वादेक मूयू गान्डेल चिला कान्डूग किटूकनाय चीड चीडी मेट्टेन।
28 ई पाटेलीन चायी,
पोरबून बिसवात चाजूरान जाम्मा मान्देल तो लोगीन किसी रोजे आनीन चेपाकमो।
29 ओर ले ओकूर बिसवात ती कोमजोर मेनोड आन्न जियोमूग किसी चुमरा।
एड बेले एरीन बेले बिसवात ती चेल्लान तीग उट तिरीकपोड आन निक्के रिच एर्रान।
30 आन बोड़पान ऊबूरान एनोड,
आन एदरा कोमजोर मेन्डान एनी बोड़पान ऊबूरान।
31-33 आन दमीसक ती मेनेक आरीतास कोसीन राजपाल आनीन चुमीक गेड़ेत कापाट ती पारीयालेरीन नीतीक मेन्डीड।
एरोड लोग आनीन पूने ती तुन्दीकतेर आरू गेड़ेत डेंगाट बीतीत किड़कीनोड किड़ी इड़कीकतेर आरू आन कुचनाय बाचेन।
एतोड नांग लोग जुवार चाज चाजी मेन्डान पोरबू ईसून बुवा मापोरबू आन टेगरान पाटा पोकाना एनी पुट्टेड।