2
1 आदूगी आय आन इमीन मुर मुरा एरीक मारी वेराना एनी उवाट चाजेन।
2 एटे एनोड एबे आन इमीन मुर मुरा एरीकपोड,
इमीन चायी मारी एड आनीन वेड़का एरीकताड?
एनोड ओड,
आन एरीन आल मुर मुरा एरीकतेन नान ओडी आय।
3 आन वेड़के ती मेट्टेन एरोड ईम बेले वेड़के ती मेन्डार एनी आन्न आचा इम जाम्मेन का चेत्तेगी मेन्डा।
आदूगी आन वेरोड,
एर तीग आनूंग वेड़का टोन्डूरानो मेट्टो,
ओर तीग आन मुर-मुरा एरा मेनकेन एनी आय आ चिट्टीन इमूंग लिकेन।
4 आन निक्के मुर-मुरा एरी किसीयाक किली आरू आड़ आड़ी आ चिट्टीन लिकेन।
एरोड बेले आन इमीन मुर मुरा एरीक एरा,
एरोड आन इमीन एटे चोग चाजूमेन आदीन इमूंग पुनूंग एरको एनी आय आटे लिकेन नान।
मुर मुरा एरीकतानेडीन माप चाजूर
5 आरू आनीन मुर मुरा एरीकतानेड एके सोजे आनीनी एरा,
एरोड इम जाम्मा लोगीन बेले किन्डीकेच-किन्डीकेच मुर मुरा एरीकतेड नाड।
(आन इदीन जेतनी पोक्कूमेन)
6 आटे चाजूरानेड इम कान तीग ले कुबे लोगीन केय्य तीग डेन्ड बेटेड नाड।
आद्दी एर्रा बे।
7 आदूगी ईम ओनीन एबे माप चाजी किली ओन जियोमीन मान्डाकपूर।
चिलाड ओड निक्के मुर मुरा एरी बिसवात चाजूरानोन चाय काडराड बेले।
8 आदूगी आन इमीन,
ईम ओनीन चेत्ते चोग चाजूरानोन टोटीकपूर एनी गुवारूकमेन।
9 एटे एनोड आन पोकरान जाम्मा पाटेलीन ईम मानू तायार मेन्डार काय एटे एनी ताड़ू बेले आय आ चिट्टीन लिकेन नान।
10 ईम एरीन बेले माप चाजोड आन बेले ओनीन माप चाजूरान।
एटे एनोड आटनी माप चाजूरान आकाट नातो एरको मेनोड,
आन माप चाजूरानोन,
आन मसीयालीन नेंजेर ती,
इम चेत्तूग माप चाजेन नान।
11 चेयतान तान्न चेतूर तीग आमीन जीतू ओड़ा मेनको एनी आन आटनी चाजेन।
एटे एनोड आम आदीन चेतूर तो बिचारूलीन पुट्टोम।
तोरोआस ती पोलूस किसीयाकतानो
12 आन मसीयालीन एडो पाटेन वेनपीक तोरोआस गेड़े ती चेनी मेनेक,
आन आना पोरबू आनूंग तायार चाजी मेन्डान लोगीन चूड़ेन।
13 एरोड बेले आना आम्म बिसवासी तोल्लेड तितूस,
इम कान तीग काबेर एन्दरा कान्डूग आनूंग किसी चुम्मी मेन्डू।
आदूग आन ओरीन पाव चियी किली मकीदूनीया देचा एदेन।
एडो पाटेन पोक चियरानेर
14 एरोड,
मसीयालीन चेंगे आम बिड़ी मेन्डानूग ओड तान चेयतानीन जीती किली चुल्लान जुलूस ती आमीन बेले एतोड नांग चेंगे चुनताड।
आरू रेच्चाट बासीन आकाट तो,
ओनीन पुन्दान गियान तो एडो पाटेन आम्म तीग गुलाय वेलकीकतान मापोरबूग जुवार एरको।
15 एटे एनोड नाचरान पाव ती चेन्डान लोगूग आरू बाचूरान पाव ती चेन्डान लोगूग आम मापोरबून एडो पाटेन पोक चियमोम।
आदूग आम मसीयाल मापोरबूग नेडीकतान रेच्चाट बास तो दूपूल आकाटतोम मेन्डाम।
16 एरोड एडो पाटेन बाकनूरानेरूग आयची पाटा जुग-जुग तो चाय्यकूड तो बासीन आकाट मेन्डा।
आरू एडो पाटेन पातीयाकतानेरूग एके आयची पाटा चेत्त जियोम चियरान बासीन आकाट तो मेन्डा।
ईटो कामीन चाजू नाम्बीकतान बातेरतेड एड मेन्डाड?
17 एटे एनोड आम मसीयालीन चेंगे बिड़ी मेन्डानूग मापोरबून नेंजेर ती मेन्नी मापोरबू चोटतानेरीन आकाट एडो पाटेन चेत्ते-चेत्ते पोक्कूमोम।
मापोरबून पोद्दूल ती आवूर पाटेलीन मिसाक किली आपलेग पायदा उटाक मेरचीकतान आवूर लोग कुबे मेन्डार।
आम ओर आकाटतेर एरा।