मापोरबून कान तो काबेर आरू आवूर पाटेल ऊबूरानो
14
1 चोगीन पातीयाकपूर,
आरू मापोरबून जियोमीन इनामूलीन बेटू रेच्चा चेत्ते मेन्न चाजूर।
आरू आवीन ले बेले आगेर मापोरबून कान तो काबेरीन पोक चियरान इनामीन आगेर मेन्न चाजूर।
2 एटे एनोड एड एरको आवूर-आवूर पाटेल ती ऊबूरान इनामीन बेटूरानेड मांजेनोड एरा एरोड मापोरबूनोड ऊबूराड।
आरू ओड पाकीक मेन्डान पाटेल तो इसाबूलीन मापोरबून जियोमीन तीग पोकराड।
आदूगी आय ओन पाटेलीन एडी चोमजारा।
3 एरोड मापोरबून कान तो काबेरीन पोक चियरानेड एके,
मांजेन पोक्की किली ओरूग बिसवात ती बेरकेच चियराड,
केडीकताड आरू जियोम मान्डाकताड।
4 एड एरको आवूर-आवूर पाटेलीन ऊबूरानेड एके तानी बिसवात ती बेरकेच एर्राड;
एरोड मापोरबून कान तो काबेरीन पोक चियरानेड पोरबून बिसवात चाजूरान मान्देत लोगीन बिसवात ती बेरकेच एरीकताड।
5 आन ईम जाम्मा आवूर-आवूर पाटेल ती ऊबूर एनी मेन्न चाजूमेन एरोड इदूग ले बेले आगेर मापोरबून कान तो काबेरीन पोक चियूर एनी मेन्न चाजूमेन।
एटे एनोड आवूर-आवूर पाटेल ऊबूरानेड पोरबून बिसवात चाजूरान मान्देत लोगीन बिसवात ती बेरकेच एरीक आवीन चोमजाकपाकोड मापोरबून कान तो काबेरीन पोक चियरानेड ऊन ले आगेरतेड आय।
6 आदूगी एबे ए बिसवासी बायीयोवे आरू दादेरे!
आन इम लेग्गाट वेरी किली आवूर-आवूर पाटेल ती ऊबोड,
आरू आदीन पारगोड चोमजाकपाकोड चिलाड एके मापोरबून कान तीग काबेर वेन्नी किली लोगीन पोक चियाकोड चिलाड एके गियान तो पाटेल पोकाकोड चिलाड एके रेच्चाट पाटेल मेरचीकपाकोड इमूंग आना तीग नातो पायदा एर्रा?
7 आटनी पोल्ला पेतान जियोम चिला बानील,
वेरोट,
चारांगी,
ईव आर्रानो पुटा-पुटा चिलाकोड,
ऊन्दरानोन चिलाड कीचरानोन एटे चाजी किली चिताकतार?
8 आरू कोडीन पोल्ला रेच्चा आड़ाकोड,
एड लेड़ेय लेड़ू तायार एर्राड?
9 आटनी इम्मोत बेले एर्रा।
नेवान्डोड रेच्चा चोमजू एर्रान आकाट ऊबाकोड ईम नातीन-नातीन ऊबूरार आदीन एटे चोमजू एर्रा?
आटनी एरोड ईम आमान वाल्ली ती ऊबूरानोर एर्रार।
10 मोंजीपूर ती एंगोटा पाटेल मेनोड बेले आवीन तीग आरोती बेले इसाब चिलायो एराया।
11 एरोड आन एड बेले ऊबूरानोन चोमजाकोड,
ऊबूरान लोगीन नेंजेर ती पोर देचेतेन एर्रान आरू ऊबूरानेड एके आन्न नेंजेर ती पोर देचेतेड एर्राड।
12 आटनी इम्मोत बेले एर्रा।
ईम मापोरबून जियोमीन इसाब तो इनामूलीन बेटू रेच्चा मेन्न लागाकतानूग पोरबून बिसवात चाजूरान मान्देत लोगीन बिसवात ती बेरकेच एरीकतान इनामूलीन बेटू मेन्न चाजूर।
13 आदूगी एड बेले आवूर-आवूर पाटेल ऊबूरानेर,
तान ऊबूरानोन चोमजाक नाम्बीकपेकेर एनी बिन्ती जोड़ूर।
14 एटे एनोड आन आवूर-आवूर पाटेल ती बिन्ती जोड़ोड,
आन्न जियोम बिन्ती जोड़रा,
एरोड आन्न मेन्न नाती काम चियाया।
15 आदूग एटे चाजूरानो आय एनोड,
आन जियोम तीग बेले बिन्ती जोड़रान आरू मेन्न तीग बेले बिन्ती जोड़रान;
आन जियोम तीग बेले पाडूरान आरू मेन्न तीग बेले पाडूरान।
16 ईन जियोम तीग मापोरबून चाराकपेक इम कान मेन्डान आदीन चोमजायेर एड बेले ईन चाराकतान इसाबूल आटनी एरको (आमीन) एनी एटे पोकराड गो?
एटे एनोड ओड ईन नान एनमोत एनी पूनाड।
17 ईन गो रेच्चा चाराकमोत,
एरोड आवूरतेर बिसवात ती बेरकेच एरारा।
18 आन ईम जाम्मेन ले आगेर आवूर-आवूर पाटेल ती ऊबूरान एनी आन आन्न मापोरबून जुवार पोकरान।
19 एरोड पोरबून बिसवात चाजूरान मान्देत लोगीन कान आवूर-आवूर पाटेल ती देस आजार पोद्दूल ऊबूरान ले ओरीन मेरचीक चेन्डू पोद्दूल चोमजूरान पाटे ती ऊबोड रेच्चा बावूरूमीन।
20 ए बिसवासी बायीयोवे आरू दादेरे!
ईम बिचार चाजूरान ती पापकूल आकाट मेन्डानोन चायूर।
कियाल तो कामूलूग एके पापकूल आकाट मेनूर एरोड बिचार चाजूरान कान सियानकूल एरूर।
21 नियोम ती ईटे लिका मेन्डा:
“पूना पाटेल ऊबूरानेर तीग
आरू पोर देचेत लोगीन चोन्डूल तीग
ई लोगोड आन ऊबूरान
एरोड बेले ओर आन्नोन वेनारा”a
एनी पोरबू पोक्कूमेड।
22 आदूगी आवूर-आवूर पाटेल ऊबूरानो बिसवासी लोगूग एरा,
एरोड मापोरबून कान बिसवात चाजा लोगूग चिना आय।
आरू मापोरबून कान तो काबेरीन पोक चियरानो एके मापोरबून कान बिसवात चाजायेरूग एरा एरोड बिसवात चाजूरानेरूग चिना आय।
23 आदूगी पोरबून बिसवात चाजूरान मान्देत लोग उलजूरान कान आरू जाम्मा ई आवूर-आवूर पाटेल ती ऊबोड एड बेले एलगातेर चिलाड एके मापोरबून कान बिसवात चाजायेर बीतराम वेरोड एटे ओर इमीन बाय्यालेर आय एनी पोकारा आदूग?
24 एरोड जाम्मा ई मापोरबून कान तो काबेरीन पोक चियेक मापोरबून कान बिसवात चाजायेड एड बेले चिलाड एके एलगातेड बीतराम वेरोड,
जाम्मा लोग पोकरान मापोरबून पाटेन तीग ओड तान पापीयाल आय एनी चोमजूराड आरू जाम्मा पाटेल ओनीन नियाव चाजूराव।
25 आरू ओन मेन्न तो इसाबूल बेले पाता चेल्लाव।
तेबे ओड मुड़दील उरकी किली “चेत्तेगी मापोरबू इम नाड़बूल मेन्डाड” एनी मापोरबून मोड़कूराड।
मापोरबून मोड़कूरान इसाब तो पाटेल
26 आदूगी ए बिसवासी बायीयोवे आरू दादेरे!
आम नान एन्डाम?
एतोड एरको ईम उलजूरान कान,
जाम्मा लोगीन मेन्न ती पाटेल चिलाड मेरचीकतानोव चिलाड पारगाकतान पोद्दूल,
आवूर-आवूर पाटेल चिलाड आवूर-आवूर पाटेल तो इसाबीन चोमजाकतानोव मेन्डाव,
ईव जाम्मा पोरबून बिसवात चाजूरान मान्देत लोगीन बिसवात ती बेरकेच एरीक एरकोव।
27 आवूर-आवूर पाटेल ती ऊबूरानेर एरोड इरूल चिलाड कुबे मेनोड मूवीर पारी-पारी ती पोकेकेर,
आरू ओकूर आदीन चोमजाकपेकेड।
28 एरोड आवीन चोमजाकतानेड चिलाकोड आवूर-आवूर पाटेल ती ऊबूरानेर पोरबून बिसवात चाजूरान मान्देत लोग उलजूरान कान किटूकनाय मेन्नी किली ताम्म मेन्न ती नी मापोरबूनोड ऊबेकेर।
29 मापोरबून कान तीग काबेर वेन्नी किली लोगीन पोक चियरान गुरूकूल कान तीग इरूल चिलाड मूवीर पोकेकेर,
आरू बाकी लोग ओर पाटेलीन रेच्चा ताड़ेकेर।
30 एरोड उन्डी मेन्डान आवूरीन कान मापोरबू नातीन बेले पारगाकपोड पोईलतेड किटूक मेनकेड।
31 एटे एनोड ईम जाम्मा पारी-पारी ती मापोरबून कान तो काबेरीन पोक चियू नाम्बीकतार।
तेबे ओकूर पाटे तीग ओकूरूग मेरीयू आरू बेरकेच बेटू एर्रा।
32 आरू मापोरबून कान तो काबेरीन पोक चियरानेरीन जियोमूल,
मापोरबून कान तीग काबेर वेन्नी किली लोगीन पोक चियरान गुरूकूलीन काबजे ती मेन्डाव।
33 एटे एनोड मापोरबू बामरी एरीकतानेड एरा,
एरोड चुक तो मापोरबू आय।
गुलाय पोरबून बिसवात चाजूरान मान्देल तो एलगाक मेन्डानेरूग एर्रान आकाट,
34 आयचील पोरबून बिसवात चाजूरान मान्देलतेर उलजूरान कान किटूकनाय मेन्डानो आय।
आव ऊबूरानो बानाया।
एरोड नियोम ती लिकी मेन्डान आकाट आव किड़ी पाड्डी मेन्डानो आय।
35 आरू आव नातीन बेले जाच आडू कानपोड,
आव ओलेक तान्न माईडीन जाच आडोकोव।
एटे एनोड आयाल पोरबून बिसवात चाजूरान मान्देत लोग उलजूरान कान ऊबूरानो इजीत बूड़रान पाटा आय।
36 एटे मापोरबून पोद्दूल इम कान तीगी पेतोव नाव आदूग?
चिलाड एके इमकानी एदेरनोव नाव आदूग?
37 आरो बेले मांजा तानीन तानी मापोरबून कान तीग काबेर वेन्नी किली लोगीन पोक चियरान गुरू चिलाड मापोरबून जियोम चियरान इनामूलीन बेटूरानेड एनी चोमजोड आन लिकूरान पाटेल पोरबू तियारतान पाटेल आय एनी मानूर।
38 एरोड एड बेले ईवीन बाकनोड ओड बेले बाकनीक एर्राड।b
39 आदूगी ए बिसवासी बायीयोवे आरू दादेरे!
मापोरबून कान तो काबेरीन पोक चियरान गुरूकूल एरू निक्के मेन्न चाजूर आरू आवूर-आवूर पाटेल ऊबूरानोन तेबाकमोर।
40 एरोड जाम्मा पाटेलीन चेर चेरा आरू दाड़का दाड़ी तीग चाजूर।