नाती केचूर चिला जियोमीन इनामूल
12
1 ए बिसवासी बायीयोवे आरू दादेरे!
ईम मापोरबून जियोमीन इनामूलीन इसाबीन पूनाका मेन्डानो आय एनी आनूंग मेन्न चिल्ला।
2 ईम आवूर देरोमीन मानेक,
इमीन कोन्दाट मुरीतूल बूलकाक किली बुरलाकतूव एनी पुट्टोर।
3 आदूगी आन इमीन चोमजाक किली पोकूमेन:
एड एरको मापोरबून जियोमीन चेंग तीग पोकराड,
ओड ईसू चेरापतेड आय एनी पोकाडा।
आरू नाती केचूर चिला जियोम चिलाका एडी बेले ईसू ई पोरबू आय एनूंग ओड़ाड।
4 इनामूल गो बानीग-बानीग तोव मेन्डाव।
एरोड ओकती मापोरबून जियोम आय आवीन पायताड।
5 आरू पोरबूग चाजूरान सेवेल बेले बानीग-बानीग तोव मेन्डाव।
एरोड आदीन एतान पोरबू ओकूरी आय।
6 आरू मापोरबू आम ओनूग सेवा चाजू आमूंग चियरान इनामूल बानीग-बानीग तोव मेन्डाव।
एरोड ओकूरी मापोरबू गो जाम्मेन कान जाम्मा बानीत बेरकेच तो कामूलीन उपजाकताड।
7 एबे ओक-ओक बिसवासी लोगीन मापोरबून जियोम लाव एरीक किली आदीन तीग जाम्मा बिसवासीकूलीन पायदा एरीकताड।
8 एटे एनोड ओकूरूग मापोरबून जियोमीन तीग बुदीत पाटेल टोन्डूराव।
आरू आवूरूग आयची जियोमीन तीग गियान तो पाटेल टोन्डूराव।
9 आरू एरूग एके आयची ओकती मापोरबून जियोमीन तीग बिसवात चाजूरानो आरू एरूग एके लोगीन उजराकतान इनाम टोन्डूरा।
10 आरू एरूग एके एडी चाजू ओड़ा पोरलेत कामूलीन चाजूरान ताकोत,
आरू एरूग एके मापोरबून कान तो काबेर पोकरानो,
आरू एरूग एके जियोमूलीन चिताकतानो,
आरू एरूग एके बानीग-बानीग तो पाटेल ऊबूरान इनाम आरू एरूग एके बानीग-बानीग तो पाटेलीन चोमजाकतान गियान टोन्डूरा।
11 एरोड ई जाम्मा ताकोत तो कामूलीन आयची ओकती मापोरबून जियोम चाजपीकताड आरू आम्म कान तीग ओकूर ओकूरूग नातो चियू मेन्न लागोड आदीन पायची चियराड।
मेन ओकती आदीन बागूल आवूर-आवूर
12 एटे एनोड एटे मेन ओकती आय,
एरोड आदीन बागूल कुबे मेन्डाव।
आव कुबे बागूल मेनोड बेले जाम्मा बिड़ी किली ओकती मेन आय।
आटनी मसीयालीन पातीयाकतानेर बेले मेन्डाम।
13 आम्म कान तीग एड एऊदी एरकोम चिलाड युनानी,
चिलाड कामीयालेर एरकोम,
चिलाड नाती बान्देन ती चिलायोम एरकोम,
आम जाम्मा ई ओकती मापोरबून जियोमीन तीग ओकती मेन एरू बपतीसमा एतोम।
आरू आम्म जाम्मेन मेन्न ती ओकती जियोमीन मापोरबू चिञ्ञेड।
14 आरू मारी मेन ओकती बाग तीग गो बानरानो एरा,
एरोड आना कुबे बागूल मेन्डाव।
15 एबे केल एके,
आन केय्य एरा कान्डूग आन मेन तो बाग एरान एनी पोकोड,
एटे आद इदीन चेत्तूग मेन तो बाग एराया आदूग?
16 आरू केकोल एके,
आन बोम्मा एरा कान्डूग आन मेन तो बाग एरान एनी पोकोड,
एटे आद इदीन चेत्तूग मेन तो बाग एराया आदूग?
17 जाम्मा मेन बोम्मा ई एरोड एटे ती वेनूंग एर्रूमीन?
आरू जाम्मा मेन केकोली एरोड,
एटे ती मुञ्ञकू एर्रूमीन?
18 एरोड चेत्तेगी मापोरबू आपला मेन्न तो बिचार तीग ओक-ओक बागीन मेन ती दाड़का दाड़ी इट्टेड नाड।
19 एबे आव जाम्मा ओकती बाग एरोड,
मेन आरे मेन्डूमीन?
20 एरोड एपोर बागूल गो कुबे मेन्डाव,
एरोड मेन ओकती आय।
21 बोम्मा केय्यीन,
आनूंग ईन लागाता एनी पोक्कू ओड़ा;
आरू तेल्ल बेले केलूलीन,
आनूंग ईन लागाता एनी पोक्कू ओड़ा।
22 एरोड मेन तो कोमजोर बागूल आकाट टोन्डूरानोवी,
निक्के कामतोव आय।
23 आरू मेन तो आरो बागूलीन आम इनमान तोव चोमजूमोम,
आवीनी आम आगेर इजीत चाजूमोम;
आरू आम लोग चूड़ू बानाया एनी मानूरान बागूलीन गो गान्डा नूड़ी पाकीकमोम।
24 आरू लोग चूड़ू बान्दान बागूलीन पाकीक लागाया।
एरोड आरो बागूलूग इनमान तोव एर्रूव आवूग इजीत टोन्डोको एनी मापोरबू जाम्मा मेन तो बागूलीन बिड़ाकतेड नाड।
25 तेबे मेन पुटा-पुटा एलगाका,
बागूल एके एक दुसरेन सामान बिचार चाजोकोव एनी आटनी चाजेड नाड।
26 मेन तो ओक बाग डेन्ड बेटोड,
जाम्मा बागूल आदीन चेंगे डेन्ड बेटूराव।
आरू ओक बागीन जाम्मेग ले बेड़तो आय एनी मानोड,
आदीन चेंगे जाम्मा बागूल वेड़का एर्राव।
27 आटनी ईम जाम्मा लोग मसीयालीन मेनीन आकाट मेन्डार।
आरू ईम जाम्मा बिड़ी किली ओन मेन तो आवूर-आवूर बागूल आय।
28 आरू पोरबून बिसवात चाजूरान मान्देत लोगीन कान मापोरबू पोईल-पोईल पोरबू नीतीकतानेरीन नीतीकतेड;
पिटतेल मापोरबून कान तीग काबेर वेन्नी किली लोगीन पोक चियरान गुरूकूलीन नीतीकतेड;
आदीन ले पिटतेल मेरचीकतानेरीन आनातले मारी पोरलेत कामूल चाजूरानेरीन,
उजराकतान इनामूल बेटूरानेरीन,
आरू लोगूग चेकी चियू नाम्बीकतानेरीन आरू चेलाकतानेरीन आरू आवूर-आवूर पाटेल ऊबूरानेरीन नीतीकतेड।
29 एटे जाम्मा ई पोरबू नीतीकतानेर आय?
चिलाड एटे जाम्मा ई मापोरबून कान तीग काबेर वेन्नी किली लोगीन पोक चियरान गुरूकूल आय?
चिलाड एटे जाम्मा ई मेरचीकतानेरी आय?
काय जाम्मा ई पोरलेत कामूल चाजूरानेर आय?
30 एटे जाम्मेगी उजराकतान इनाम टोन्डोतोना?
एटे जाम्मा ई आवूर-आवूर तो पाटेल ऊबूरार?
एटे जाम्मा ई आ पाटेलीन चोमजाकतार?
31 ईम चेत्तेगी बेड़तोत ले बेड़तो इनामीन बेटूरान आचा चाजूर।
एरोड बेले आन इमीन आ जाम्मेन ले बेले रेच्चाट पावीन टोटीकतान: