इसराएल लोगीन काटाव तीग चोमजाकतानो
10
1 ए बिसवासी बायीयोवे आरू दादेरे!
आम्म बुवेर दादीलेर जाम्मा बादोर किड़ी मेट्टेर आरू सोमून्द नाड़बूलोड आड़ञेर;
आदीन आन ईम पुन्दानो आय एनमेन।a
2 ओर जाम्मा ई बादोर तीग,
आरू सोमून्द तीग बपतीसमा पातीक एञ्ञेर आरू मूसालीन पातीयाकतानेर एञ्ञेर।
3 आरू जाम्मा ई लोग सरग तीग चोटतेर्रान ओकती बोकतीत बोजीन तिन्दीर;
4 आरू जाम्मा ई सरग तीग चोटतेर्रान ओकती बोकतीत नीरीन उन्डेर;
एटे एनोड ओर ताम्म चेंगे-चेंगे चेन्डान आयची सरग तीग चोटतेर्रान गाडार तो नीरीन उन्डीर;
आ गाडार मसीयाल मेट्टेड।b
5 एरोड बेले ओर कान तीग कुबे लोगीनोड मापोरबू वेड़का एरेडा।
आदूगी ओर मोड़ील चिड़ा बाट ती नी गुलाय वीती एरी मेन्डूव।
6 ओर एटे लालेच चाजेर,
आटनी आम्मोर कियाल तो बानीलूग लालेच चाजूमोर एनी ईव जाम्मा आमूंग काटाव एञ्ञोव।
7 “लोग तिनूंग उनूंग उन्डेर आरू दोस पाडरान कामूल चाजू चुलतेर”d एनी लिका मेन्डान आकाट ओर कान तीग एंगोटा लोग मुरीतूलीन मानूरानेर एरी मेन्डीर,
c आटे ईम मुरीतूलीन मोड़कूरानोर एरमोर।
8 ओर कान तीग एंगोटा लोग दोस पाडरान कामूलीन चाजेर,
आटनी दोस पाडरान कामूलीन आम्मोर चाजूमोर।
ओर ओकेची कोड़ेक तीन आजार लोग चाञ्ञेर।e
9 ओर कान तीग एंगोटा लोग पोरबून पोरकेर,
आटे आम्मोर मसीयालीन पोरकूमोर।
ओर बाम्बूल तीग मुरजाक एञ्ञेर।f
10 ओर कान तीग एंगोटा लोग गुर-मुराकतेर आटे आम्मोर गुर-मुराकमोर।
आरू मुरजाकतान दूत ओरीन मुरजाकतेड।
11 एरोड ओर का एरी मेन्डूव आ इसाब ती ई जाम्मा पाटेल,
काटावीन आकाट मेन्डाव।
मोंजीपूर चेरा चेरी एर्रान बेरा एदूरान वादेक ती पीयरान आम नारची किली ईटो कामूलीन चाजा मेनकोम एनी ईव जाम्मा आम्म चेत्तूग लिकूरानोव मेन्डाव।
12 आदूगी एड एरको आपलेनी “आन बेरकेच मेन्डान” एनी चोमजूरानेर उरकू बेले एर्रा एनी लेक ती मेनूर।
13 आवूर लोगूग एर्रान पोरकूरानोन गो ईम बेले बेटूमोर।
मापोरबू बिसवात चाजू एर्रान बातेरतेड आय आरू ओड इमीन सामालूक ओड़ा कियाल तो पोरकूरान कान बिड़ाकपाडा।
एरोड ईम सामालूक नाम्बीकपोकोर एनी पोरकूरान कान तीग पेक पाव पुचराड बेले।
मुरीतूलीन मानूरान इसाब आरू पोरबू बोजी
14 आदूगी,
ए आन्न लाडरालेरे!
मुरीतूलीन मानूरान तीग बाची किली मेनूर।
15 आन इमीन बुदीतोर आय एनी चोमजी किली,
आन नातीन पोक्कूमेन आदीन ईम ताड़ूर एनी पोक्कूमेन।
16 पोरबू बोजी ती आम आंगूर रेस तो बेटकीन पात्ती किली मापोरबून जुवारूकमोम जे?
आद आम मसीयालीन नेतीरीन तीग ओन चेंगे मिसी मेन्डानोन टोटीकमो।
आरू आम तिन्दान रोटी आम मसीयालीन मेनीन तीग ओन चेंगे मिसी मेन्डानोन टोटीकमो।
17 पोरबू बोजी ती आम कुबे लोग ओकती रोटीन तिनमोम।
आदीन आकाट मसीयाल ओकूरीन चेंगे बिड़रानूग आम कुबे लोग मेनोड बेले ओकती मेनीन आकाटतोम आय।
18 इसराएली लोगीन चूड़ूर।
जेतरा पाड ती कुड़रानोन तिन्दानेर चेंगे मिसी किली तिन्दार।
आटनी मुरीतूग कुड़रानेर मुरीतीन चेंगे बिड़रार।
19 मुरीतूलूग चोत्तीकतान बानी ती नातो एरको मुकीयाट इसाब मेन्डा चिलाड एके मुरीत ती नातो एरको मुकीयाट इसाब मेन्डा एनी आन पोक्कूमेन आदूग?
20 एरा।
एरोड मापोरबून माना लोग कुड़रानोन ओर मापोरबूग एरा;
एरोड ओर बूत डुमेलूग आय कुडरार आरू ईम बूत डुमेल चेंग बीड़ा मेनकोर एनी आन मेन्न चाजूमेन।
21 ईम पोरबून बेटकी तोन आरू बूत डुमेलीन बेटकी तोन इरडूकीनी उनूंग ओड़ार।
ईम पोरबून बोजीन आरू बूत डुमेलीन बोजीन इरडूकीनी तिनूंग बिड़ू ओड़ार।
22 एटे आम पोरबून रिच एरीक कान्डूकमोम काय एटे?
आरू आम ओन ले लावतोम आय आदूग?
जाम्मा बानीन मापोरबून पिदीर एरीक चाजूर
23 “जाम्मा बानीन चाजू बान्दा”,
एरोड जाम्मा ई बानील पायदेतोव एरावा।
“जाम्मा बानीन चाजू बान्दा”,
एरोड जाम्मा ई बानील आमीन बिसवात्ती बेरकेच चाजावा।
24 एड एरको आनूंगी रेच्चा एरको एन्डानोन कान्डूकमोर।
एरोड आवूरतेरूग रेच्चा एरको एन्डानोन कानपूर।
25 आटूल ती वीड़रान चेप्पूलीन नातोन एरको इम बीतराम तो मेन्नीन गोवाईन चेत्तूग जाच आडाका तिनूर।
26 एटे एनोड “मोंजीपूर आरू आना मेन्डानोव जाम्मा पोरबूनोवी आय।”g
27 मापोरबून कान बिसवात चाजायेड एड बेले इमीन बोजी ती नीवतोड,
आरू ईम चेनूंग मेन्न चाजोड,
इमूंग नातीन चियोड आदीन इम बीतराम तो मेन्नीन गोवाईन चेत्तूग नाती जाच आडाका तिनूर।
28 एरोड एड बेले,
“इद गो मुरीतूग कुडरान बानी आय” एनी पोकोड,
आ पोकरानेडीन चेत्तूग आरू इम बीतराम तो मेन्नीन गोवाईन चेत्तूग तिनमोर।
29 आन पोकरानोन इम बीतराम तो मेन्नीन गोवाईग एरा,
एरोड आवूर लोगीन रेच्चाटूग पोक्कूमेन।
आन बान्देन ती चिला मेन्डानो,
आवूर लोगीन बीतराम तो मेन्नीन पोरका मेनको।
30 आन जुवार पोक्की तिनोड,
आन गो मापोरबून जुवार पोक्की तिनमेन।
आदीन चेत्तूग आनूंग नांग बोदी एरमो गो?
31 आदूगी ईम तिनूर,
चिलाड उनूर,
चिलाड नातो एरको चाजूर,
आ जाम्मा बानीलीन मापोरबूग इजीत तो मान एरीक चाजूर।
32-33 एटे आन जाम्मा पाटेल तीग जाम्मेनी वेड़का एरीक कान्डूकमेन आटनी,
ईम एऊदीकूल चिलाड एऊदीकूल चिलायेर चिलाड पोरबून बिसवात चाजूरान मापोरबून मान्देत लोगूग बिसवात ती चान्दू टोकोरना तितीकतानोर एरमोर।
आनूंग लाब एरको एनी आन कानपाना।
एरोड कुबे लोग बाचेकेर एनी ओरूग लाब एरको एनी कान्डूकमेन।