रोमी 7

नियोम तीग चोड़ाक एर्रानो

1 ए बिसवासी बायीयोवे आरू दादेरे! मांजा एत्ती दिनेत्तार्रे जियोम मेन्डाड, आत्ती दिनेत्तार्रे गो नियोम ओनीन पान्न चेलाकता एन्डानोन ईम पूनार काय एटे? एनी आन नियोमीन पुन्दान एऊदीकूलीन पोकूमेन। 2 आन आदीन चुरचा नियोमीनोड काटारची किली चोमजाकतान। चुरचा एरी मेन्डान आयाल तान्न माईड जियोम मेन्नारे ओन चेंगे नी पीयरानो आय एनी नियोम मेन्डा। ओड चाय्यारे आ नियोम चेला। एरोड माईड चाय्य चेनोड आद चुरचा नियोम तो बान्देन तीग बाचूरा। 3 आटनी माईड जियोम मेनेक-मेनेक आद आवूर माईडूग चेनोड आदीन दारीयाट एन्डार। एरोड माईड चाय्य चेनोड आद चुरचा एरी मेन्डान नियोम तीग बाचूरा। आरू मारी गेर एरोड बेले आद दारीयाट एराया। 4 आटनी ए आन्न बिसवासी बायीयोवे आरू दादेरे! चाय्येक ओन मेनीन कान तीग ईम बेले नियोमीन बान्देन तीग चोड़ाक एञ्ञोर। तेबे केटाल मारी गेर एरू नाम्बीकतान आकाट एपोर ईम चाय्यरान कान तीग जियोम पाटतीक एर्रान मसीयाल एन्डानेडीन लोग एञ्ञोर। आम मापोरबूग आकाट तो रेच्चाट कामूल चाजोकोम एनी आय आटनी एञ्ञोम। 5 एटे एनोड आम आम्म मेन्न के लागेन तो कामूलीन काबजे ती पीयेक, नियोमीन पुन्दान तीग उपजूरान पापदेरोम तो लालेचूल आम्म मेन तो बागूलीन जुग-जुग तो चाय्यकूडीन एन्देर्रान पालकूल आकाट तो कामूलीन चाजपीकतूव। 6 एरोड एबे आम मसीयालीन चाय्यकूड ती मीसूरानूग नियोमीन काबजे तीग चोड़ाक एञ्ञोम। आदूग आम मुन्नीत नियोम ती लिकी मेन्डान रीती ती मापोरबून सेवा चाजामा, एरोड नाती केचूर चिला जियोमीन तीग एर्रान पुन्न जियोम तो रीती तीग सेवा चाजूमोम।

नियोम आरू पापदेरोम

7 आटेकोड आम नान एन्डाम? नियोम पापदेरोम तो आय एन्डाम आदूग? आटे मुरले एरा। एरोड बेले नियोम चिलाकोड आन पापदेरोम नाताय एनी पूनेनमीन। नियोम “जिवड़ेय एर्रानो एरा” एनी पोकाकोड आन जिवड़ेय एर्रानो पापदेरोम ती बिड़रा एनी पूनेनमीन। 8 एरोड पापदेरोम एके पोलोंग चूड़ी, मापोरबून तियारनी पाटे तीग आन्न कान जाम्मा बानील तो जिवड़ेय एर्रान इसाबूलीन उपजाकतो। एटे एनोड नियोम चिलाकोड पापदेरोम चाय्यरानो आय। 9 मुन्नी नियोम चिला वादेक आन जियोम मेन्डीन; एरोड मापोरबून तियारनी पाटा टोन्डूरानूग पापदेरोम जियोम पाट्टो, आरू आन चाय्यरानेडीन आकाट एञ्ञेन। 10 आरू जुग-जुग तो जियोमीन एन्देर्रा एनी पाटा चियी मेन्डान मापोरबून तियारनी पाटा ई आनूंग जुग-जुग तो चाय्यकूडीन एन्देर्रान आकाट तो एर चेन्डो। 11 एटे एनोड आन मापोरबून तियारनी पाटेन वेनेक पापदेरोम पोलोंग चूड़ी आनीन टेगी किली चाय्यकूड तो डेन्ड ती बेटाकतो। 12 आदूगी नियोम नाती केचूर चिलायो आय; मापोरबू तियारतान पाटा बेले नाती केचूर चिलायो आय। आद देरोम नाताय एनी टोटीकता आरू आद रेच्चाट आय। 13 आटेकोड रेच्चाट मेन्डान नियोम आनूंग चाय्यकूडीन एटे एन्देर्रा गाट? आटे मुरले एरा। एरोड पापदेरोमीन पापदेरोम आय एनी टोटीक रेच्चाट मेन्डान नियोमीन कान तीग पापदेरोम आन्न कान चाय्यकूडीन उपजाकतो आरू मापोरबू तियारतान पाटा पापदेरोम निरबे कियाल तो आय एनी टोटीकमो।

मांजा पापदेरोम चाजाना एनी आलवाल एर्रानो

14 एटे एनोड नियोम मापोरबून जियोमीन कान तो आय एनी आम पुनमोम; एरोड आन पापदेरोमीन काबजे ती वीडपीक एरी किली आन्न मेन्न के लागेन तो कामूल ती चेलूमेन। 15 आरू आन चाजूरानोन आनी चोमजाना। एटे एनोड आन मेन्न लागूरानोन गो चाजाना, एरोड मेन्न लागायोनी चाजूरान। 16 एपोर आन आनूंग मेन्न लागा कियाल तोन चाजेक आन्न मेन्न आनीन माना चाजूरा एरोड आद आन नियोमीन रेच्चाट आय एनी मानूमेन एन्डान बीतेर ती बिड़रा। 17 आदूग एबे आन मेन्न चाजूरानूग कियाल चाजूरान एन्डानो एरा, एरोड आन्न गेरोब ती कोप्पी मेन्डान पापदेरोम आनीन आदीन चाजपीकमो। 18 एटे एनोड, रेच्चाट नाताय आदीन चाजू आनूंग मेन्न मेन्डा, एरोड आदीन आन चाजू ओड़ा कान्डूग आन्न गेरोब ती, चिलाड एके आन्न मेन्न के लागेन तो चेलनूकूड़ूल ती रेच्चाट चाजूरान एन्डान बिचार मुरले चिल्ला एनी आन पुनमेन। 19 एटे एनोड आन गो नातो रेच्चाट आय आदीन चाजूरान एनी मेन्न चाजूरान, आदीन चाजाना। एरोड नातो कियाल तो आय आदीन चाजाना एनी मेन्न चाजूमेन आरू आदीनी चाज चाजी मेनमेन। 20 एपोर आन नातीन चाजाना एनी मेन्न चाजूमेन आरू आदीनी चाजूमेन एरोड आदीन चाजूरानेन आन एरा, एरोड आन्न गेरोब ती कोप्पी मेन्डान पापदेरोम आय आदीन चाजपीकमो।

21 आटनी तीग आनूंग ओक पाटा पाता चेलूमो। आद नाताय एनोड आन रेच्चाटीन चाजू मेन्न चाजेक आन्न कान मेन्डान कियाल तो आनूंग रेच्चाटीन चाजू आड्डोम एरमो। 22 एटे एनोड आन आन्न मेन्न तीग मापोरबून नियोमीन मानू निक्के वेड़का एरमेन। 23 एरोड आन्न मेन तो बागूल ती आवूर तो ओक नियोम देका पाड्डूमो। आद आन्न मेन्न तो नियोमीनोड जिकाटाना एरमो, आरू आनीन आन्न मेन तो बागूल ती बेदी मेन्डान पापदेरोमीन काबजे ती बेटाकमो। 24 ओ, ओ, आन नाचेन रे। चाय्यकूड ती चेन्डान ई मेन तीग आनीन एड बाचाकताड? 25 आनीन मापोरबू, आम्म पोरबू ईसू मसीयालीन तीग बाचाक नाम्बीकताड; ओनूग जुवार एरको। आदूग आन कुदे मेन्न तीग मापोरबून नियोमीन मानूमेन, एरोड आन्न मेन्न के लागेन तो चेलनूकूड़ूल तीग एके पापदेरोमीन बान्देन ती मेन्डान।