पोरबू 27

पोलूस रोमी गेड़ा चेनूंग पेतेड

1 आमूंग इतालीया देचेकेल चेनूंग सोमून्दीन आड़ञूरानो आय एनी बिचार एर्रानूग, ओर पोलूस आरू ओदो केयदीकूलीन सोव गोटा पालटेनकूल मान्देन मुकीयाल यूलीयूसीन केय्य ती ओपीक चिञ्ञेर। यूलीयूस, आगूसतूस केसर कोसीन पालटेनकूल मान्दा एन्डान मान्देत मुकीयाल मेट्टेड। 2 अदरमूत्तीयूम गेड़े तीग वेर्रान नीर-जाज ती आम चोक्कोम। आद आसीया देचेत कुडी-कुडी मेन्डान गेड़ेल तो पावोड चेन्डो। आरू मकीदूनीया देचेत तिसलूनीकीयो पोलूब तो आरीसतरकूस आम्म चेंगे मेन्डीड।

3 पिटतेल तो चिरीक आम सयदा गेड़ा एदोम। यूलीयूस, पोलूसूग जियोम नोयपीक किली ओनीन आना मेन्डान तान्न चेगा लोगीन बेट गाट एरू चेनूंग इट्टेड। ओर ओनूग लागूरानोन चियरार एनी ओड आटनी चाजेड। 4 आम आना तीग मारी पेतोम आरू वाल्ली उलटा आटरानूग कुपरूस एन्डान डिपकेत मारकाडेनोड आकला टिटाक नीर-जाज ती आड़ञोम। 5 आरू आम किलीकीया, पम्पूलीया लेग्गेत सोमून्द पावोड चेनी लुसीया देचेत मीरा एन्डान पाड ती इड़ोम। 6 आना इतालीया चेन्डान सिकन्दरीयेत नीर-जाजीन यूलीयूस बेटेड आरू ओड आमीन आना चोत्तीकतेड। 7 आम दीरे-दीरे कुबे दिनेल सोमून्दीन आड़ञी किली, निक्के आबोड़ एरी किली कनीदूस गेड़ा लेग्गे एदोम। आ टिटाक वाल्ली आमीन टिट्टे चेनूंग इडा कान्डूग आम सलमोने गेड़ा लेग्गेत पावोड करेते डिपकेत मारकाडेनोड गाटोम। 8 आरू आम सोमून्द कुडी-कुडी निक्के आबोड़ एर एरी चेन्डोम आरू रेच्चाट पाड एन्डान गेड़े ती एदोम। आद नीर-जाजूल तेबूरान पाड आय। आना तीग लसया गेड़ा लेग्गे मेन्डू। 9 आटनी कुबे कोम्बेर पोका चेन्डो। नीवता मेन्डान दिना जीती मेन्डू। आदूग सोमून्दीन आड़ञोड निक्के केट-केट आय एनी किली पोलूस ओरीन, 10 “ए, मांजाकूले! एबे आड़ञोड आमान नीर-जाजूगी आरू जामूकूलूगी नोकसान एरा, एरोड आम जाम्मा लोग बेले नाचराम बे आकाट बावूमो” एनी केडीकतेड। 11 एरोड सोव गोटा पालटेनकूल मुकीयाल पोलूस पोकरान ले आगेर गाटवारीकूलीन मुकीयाल आरू नीर-जाजीन मालीकीनोन मानेड। 12 नीर जाजूल तेबूरान आ गेड़ा पाञ्ञील काटाक रेच्चाट एरा। आदूग नीर जाज ती मेन्डान लोगीन कान तीग कुबे लोग एटे बेले पोकाल पाडरान टिटाक गाटार आरू सोमून्द कुडी-कुडी चेनी किली पिनीकीस गेड़े ती एदार आरू आन्नी पाञ्ञील काटाकपार एनी उवाट चाजूरीर। आद करेते डिपकेत ओक नीर-जाजूल तेबूरान पाड आय। आद पोकाल पाडरान टिटाक ले वेला टिटाक आरू पोकाल पाडरान टिटाक ले डेबरा टिटाक मेन्डानूग पाञ्ञील वादेक आना तेबू रेच्चाट आय।

सोमून्द ती निक्के वाल्ली आटरानो

13 किड़ेड टिटाक तीग वाल्ली दीरे आट्टू मुरीयाकतो। आदूग ओर ताम उवाट चाजूरान आकाट चाजू एर्रा एनी किली, नीर-जाजीन आटकाकतान लोवेत बोजेन पोडी एतीक किली करेते डिपकेत कुडी-कुडी चेनूंग मुरीयाकतेर 14 एरोड डेन्डीक ले डिपके तीग पोकाल पेतानेल तीग पोडेड टिटाक तीग आटरान ओक बेड़तो वाल्ली चुलतो। 15 आ वाल्ली नीर-जाजीन निक्के आटरानूग आद ताम्बू ओड़ो। आम वाल्ली आटरान टिटाक नीर-जाजीन गाटू ओड़ा कान्डूग आदीन वाल्ली आरेकेल उयरू आना उय्यू इट्टोम। 16 आम कोदा एन्डान डिपका लेग्गे चेनेक, आम चोक्की मेन्डान नीर-जाज टान्ड टान्डी एन्देर्रान पिटीत ओडेन निक्के आबोड़ एरी किली बाचाक नाम्बीकतोम। 17 आनातले गाटवारीकूल आदीन टान्डी किली नीर-जाज पोडी इड काट्टेर। नीर-जाज पिना मेनको एनी आदीन टोडूनोड काटकेर। सुरतीस कुडी ती, नीर किड़ी मेन्डान मान्न कूड़े ती नीर-जाज चोंगूरा एनी ओर नारचेर। आदूग ओर नीर-जाज तो जान्डेन किड़ी इड़कीकतेर आरू वाल्लीन नीर-जाजीन ऊचीक इट्टेर। 18 वाल्ली निक्के नीर जाज ती आट आट्टी मेन्डानूग पिटतेल तो चिरीक ओर नीर-जाज तो बोजेन कोम चाजू नीर-जाज ती मेन्डान मूटेलीन नीर ती तीन्डूक मुरीयाकतेर। 19 आरू पिटतेल तो चिरीक नीर-जाज तो केलनेलीन बेले तामी तीनतेर। 20 कुबे दिनेल आर्रे पोकाल आरू चुक्केल टोन्डा कान्डूग आरू वाल्ली निक्के आटरानो बेले तेबाकानूग आम चाय्यरामी बे एनी चुरता चाजूरूम।

21 आरू नीर-जाज ती मेन्डानेर कुबे कोम्बेर ले मुरानी मेन्डान पिटतेल पोलूस ओर मुन्देल निलची किली, “ए दादेरे! ईम आन्नोन मानी किली करेते तीग पेपाकोड ई डेन्ड बेले वेरोयामीन आरू आमूंग नोकसान बेले एरोयामीन। 22 एरोड आन एपोर इमीन डाडू चाजी मेनूर एनी चोमजाकमेन। एटे एनोड आमान नीर-जाजीन चायी, इम कान तीग एर जियोमी चेनाया। 23 एटे एनोड आन सेवा चाजूरान आरू आनीन आंगरूरान आन्न मापोरबून ओक सरग दूत ओरी चित्ता आन्न लेग्गे वेञ्ञेड। 24 आरू, ‘ए पोलूस, मुरले नारचूमेन। इनूंग केसर कोसीन मुन्देल नियाव एरू निलतानोई आय। आरू मापोरबू तानूंग केरमा गोटोक बावूरानूग, इन चेंगे नीर-जाज ती मेन्डान जाम्मेन जियोमीन इन चेत्तूग बाचाकताड’ एट्टेड। 25 आदूगी ए दादेरे! डाडू चाजी मेनूर। ओड आनीन एटे पोक्केड नाड आटनी एर्रा ई, एनी आन मापोरबून बिसवात चाजूमेन। 26 एरोड नीर-जाज आरे बेले ओक डिपकेत कुडी, नीर किड़ीत मान्न कूड़े ती चोंगूरा ई” एट्टेड।

नीर-जाज पिनरानो

27 आटनी इरडू आटूल पोलोतो बेले। नीर-जाज आदरीया सोमून्द ती चुल्लूरू। नेनदूनाल ती आकाट नीर जाजीन चेलाकतानेर आम आरो देचा लेग्गाट आले एदूमोम एनी आन्ताज चूड़ेर। 28 ओर काटारची चूड़ेर तेबे, नालू कोड़ आतूल आकाट गिड़ीया मेन्डू। आदूग मारी किन्डीक मुन्देल उय्यी किली काटारतेर; गिड़ीया मून्डू कोड़ आतूल आकाट मेन्डू। 29 तेबे नीर-जाज गाडार ती कुटीक एर्रा एनी नारची किली, नीर-जाजीन पोटतेल मेन्डान, नीर-जाजीन आटकाक इड़कीकतान लोवेत बोजेल नालूकीन नीर ती इड़कीकतेर। आरू ओर पोका वेवोको एनी बिन्ती जोड़रीर। 30 एरोड गाटवारीकूल नीर-जाज तीग इड़ी किली पिटीत ओडे ती चोक्की तूलू कानतीर। आदूग ओर नीर-जाजीन आटकाक इड़कीकतान लोवेत बोजेन नीर-जाजीन मुन्देल तीग, नीर ती इड़कीकतान आकाट पोबाक किली ओडेन सोमून्द ती इड़कीकतेर। 31 आदूग पोलूस सोव गोटा पालटेनकूल मुकीयालीन आरू पालटेनकूलीन, “गाटवारीकूल नीर-जाज ती मेनाकोड ईम बेले बाचारा” एट्टेड। 32 तेबे पालटेनकूल पिटीत ओडेन पात्ती मेन्डान टोडून कुड्डी किली आदीन उरकीकतेर। 33 वेवू कानतू; आतोड पोलूस, “ईम वाल्ली आटरानो पोल्ला एनी काच काची मेन्नी इनेतोड जाम्मा सोवदा दिनेल एञ्ञोव। इम मुरानी मेन्डार। 34 आदूग इमीन किन्डीकेच तिनूर एनी आन गुवारूकमेन। तेबे गो इम जियोम बाचूरा। एटे एनोड इम तेल्ल तो ओक तेलताक बेले उरकाया” एट्टेड। 35 आटनी एनी किली पिटतेल ओड ओदो रोटीलीन पात्ती किली ओर मुन्देल मापोरबून जुवारची किली पुटकीकतेड आरू तिनूंग मुरीयाकतेड। 36 तेबे ओर जाम्मा लोग बेले उचांग एरी किली तिनूंग मुरीयाकतेर। 37 आनातले आम जाम्मा लोग नीर-जाज ती दुय सोव मून्डू कोड़ सोला जान मेन्डूम। 38 आ जाम्मा लोग पोटा पाञारे तिन्दान पिटतेल गोंगकूलीन सोमून्द ती तीनची किली नीर-जाज तो बोजेन कोम चाजू मुरीयाकतेर।

नीर जाज गोन्देल एर चेन्डानो

39 पोका वेवूरानूग ओर आ देचेन चिताक ओड़ेर। एरोड मान्न नेन्दील तो कुडीन चूड़ेर आरू आ लेग्गे नीर-जाजीन तेबाक कानतीर। 40 आदूग ओर नीर-जाजीन आटकाक इड़कीकतान लोवेत बोजेन काट्टी मेन्डान टोडूलीन चिट्टी किली आवीन नीर ती बूडू इट्टेर। आरू आतोडी ओर नीर-जाजीन मोड़ीयाकतान पिटीत केलनेन काटकी मेन्डान टोडून कुयकीकतेर। जान्डेन नीर-जाज तो मुन्देल पोडी एतीक किली वाल्ली नीर-जाजीन मुन्देल उय्यू इड्डी किली कुडी-कुडी चेन्डेर। 41 एरोड इरडू सोमून्दूल तो सांगोम ती नीर-जाज नीर किड़ीत मान्न कूड़े ती कुटोतो आरू नीर-जाजीन मुन्देल टिटाक तो चोंगी किली मेलू ओड़ा कियाल एञ्ञो। निक्के एलका आटरानूग नीर-जाजीन पोटतेल तो बाग गोन्देल-गोन्देल एञ्ञोव।

42 तेबे पालटेनकूल, केयदीकूल एडी ऊम ऊमी चेनी किली बाचा मेनकेर एनी ओरीन आनकीकतान उवाट चाजेर। 43 एरोड सोव गोटा पालटेनकूल मुकीयाल एके पोलूसीन उवाट चाजी किली ओरीन आटे चाजू इडेडा। ऊमू नाम्बीकतानेर जाज तीग तिरी किली कुडी एदेकेर एनी तियारतेड। 44 बाचूरान लोग नीर-जाज तो पिन्नी मेन्डान पारेलीन चिलाड गोन्देलीन पात्ती किली कुडी पेपेकेर एनी तियारतेड। आटनी तीग जाम्मा बाची किली कुडी एदेर।