पोरबू 21

पोलूस एरूसेलेम ती चेन्डानो

1 इपीसूस तो सियानकूल आमूंग पाव चियरानूग आम आर्र तीग पेतोम आरू सोमून्दीन टिट्टे आड़ञी किली कोस डिपके ती वेञ्ञोम। पिटतेल तो चिरीक रुदूस डिपके ती एदोम आरू आना तीग पतरा डिपके ती चेन्डोम। 2 आना पिनीके देचा चेन्डान ओक नीर-जाज बेटोम। आदूग आम आना चोक्की किली आड़ञोम। 3 आनातले कुपरूस डिपका देका पाडरानूग, आम आदीन किड़ेड टिटाक चेनी किली सूरीये ती चेन्डोम आरू सूर गेड़े ती नीर-जाज तीग जामूकूलीन इड़कीकतानो मेट्टो; आदूग आम इड़ोम। 4 आरू आना ओदो बिसवासी लोगीन बेट गाट एरी किली ओर चेंगे सात दिनेत आर्रे मेट्टोम। ओर मापोरबून जियोम तामीन पोक्की मेन्डानूग पोलूसीन “ईन एरूसेलेम ती चेनमेन” एनी माना चाजेर। 5 एरोड ओर चेंगे मेन्डान दिनेल पूर्रानूग, आम आना तीग पेची किली पाव आत्तोम। बिसवासी लोग जाम्मा ताम्म आयचील पापकूल चेंगे आमीन गेड़ेग ले वाल आर्रे एपीक चिञ्ञेर। आरू आम सोमून्द कुडी माटीकूटा चियी किली बिन्ती जोड़ोम। 6 तेबे ओर पाव चियरानूग, आम नीर-जाज ती चोक्कोम। आरू ओर ताम्म-ताम्म ओलेकूल ती मेल्लेर।

7 आनातले आम सूर गेड़े तीग नीर-जाज ती आड़ञी किली पतूलीमयीस गेड़ा एदोम, आरू आनात बिसवासी लोगीन जुवारची किली ओर चेंगे ओकेच तेबोम। 8 पिटतेल तो चिरीक आम आना तीग पेची किली केसरीया गेड़े ती वेञ्ञोम। आना पिलीपूस एन्डान पिदीर तो एडो पाटेन पोक चियरानेडीन ओलेक चेनी किली ओन कान मेट्टोम। ओड एरूसेलेम ती केटाचीलूग बोजी पायूक नीतीक मेन्डान सात जानीन तीग ओकूर आय। 9 ओनूग नेल्लाल वाटा माचील मेन्डूव। आव मापोरबून कान तीग काबेर वेन्नी किली लोगीन पोक चियरान गुरूकूल मेन्डूव।

10 आम आना कुबे दिनेल मेन्डान पिटतेल, मापोरबून कान तीग काबेर वेन्नी किली लोगीन पोक चियरान गुरू आगबूस एन्डान पिदीरतेड एऊदी देचे तीग वेञ्ञेड। 11 ओड आम्म लेग्गाट वेरी किली पोलूसीन केरदेनीन पेट्टेड आरू तान्न केलूल केय्यूलीन काटकी किली, “नाती केचूर चिला जियोम ईटे पोक्कूमेड: ई केरदेन एरोत आय आ मांजेन एरूसेलेम ती एऊदीकूल इटनी काटकूरार, आरू ओनीन एऊदीकूल चिला लोगीन केय्य ती बेटाकतार” एट्टेड।

12 आदीन वेन्नी किली आम आरू आनात लोग पोलूसीन एरूसेलेम ती चेनमेन एनी गुवारतोम। 13 एरोड पोलूस “ईम एटे आड़ आड़ी आन्न जियोमीन केरीकमोर? आन गो पोरबू ईसून पिदीरीन चेत्तूग एरूसेलेम ती, लोग आनीन आमान काटकीक एरा एरोड चाय्यू बेले तायार मेन्डान” एट्टेड। 14 आम ओन मेन्नीन बादलाक ओड़ा कान्डूग “पोरबून उवाट पूरा एरको” एनी किटूक पाट्टोम।

15 आनातले आम तायार एरी किली एरूसेलेम ती चेन्डोम। 16 केसरीया गेड़े तीग बेले ओदो बिसवासी लोग आम्म चेंगे वेञ्ञेर। ओर आमीन कुपरूस तो मनासोन पिदीर तो कुबे मुन्नीत ले बिसवात चाजूरानेडीन कान आम आन्नी तेबोकोम एनी एन्दरेर।

पोलूस याकूबीनोड बेट गाट एर्रानो

17 आनातले आम एरूसेलेम ती एदूरानूग, बिसवासी लोग वेड़के ती आम्मोड बेट गाट एञ्ञेर। 18 पिटतेल तो चिरीक पोलूस आमीन चेंग पात्ती किली याकूबीन चूड़ू चेन्डेड। आना बिसवात चाजूरान मान्देत जाम्मा सियानकूल उलजी मेन्डीर। 19 तेबे पोलूस ओरीन जुवारची किली तान सेवा चाजूरान इसाब ती एऊदीकूल चिला लोगीन कान मापोरबू चाजपीक मेन्डीड, आ जाम्मा बानीन पोक चिञ्ञेड।

20 आदूग ओर ओनोन वेनी किली मापोरबून चाराकतेर। आनातले ओर पोलूसीन, “ए दादा, एंगोटा आजारूल एऊदीकूल बिसवासी लोग मेन्डार, एरोड ओर जाम्मा मूसाल नीतीन रेच्चा मेन्न लागाक किली मानूरार एन्डानोन ईन चूड़ूमोत। 21 ओरीन इन इसाब ती लोग, ‘ईन एऊदीकूल चिला लोगीन नाड़बूल मेन्डान एऊदीकूलीन ईम मूसाल नीती ती चेलूरानोन चायूर आरू आपला पापकूलीन जियोम पाड तो तीप तोलीन बेले कुडीकमोर आरू आम्म नियोमूलीन मानूमोर एनी केडीकमोत’ एनी जुजाकतेर नार। 22 एपोर एटे चाजूराम आले? लोग गो ईन वेञ्ञोत नात एनी वेनदारी। 23 आदूगी आम इनीन एटे पोकोड, आटे चाज। आम्म नाड़बूल मापोरबूग बोदना पोक्की मेन्डानेर नेलवीर मेन्डार। 24 ईन ओर चेंगे चेन आरू ओगराक एरीक एर आरू ओरूग तेल्ल केचू इड्डू, लागूरान केरचेन चिय। आटनी चाजोड ओर इन बीतेर ती वेट्टेर नार, आ पोकरानो ओकूत बेले चेत्त चिल्ला आरू ईनी मूसाल नीती ती चेलूमोत एनी जाम्मा लोग पुन्दार। 25 एरोड एऊदीकूल चिला लोगीन तीग बिसवासी लोगूग आम, ‘ईम मुरीतूलूग चोत्तीकतान बानील नाती नी तिनमोर; नेतीरीन तिनमोर। चार्र आलटाक किली चाय्यीकतान जियादूल तो चेप्पूलीन तिनमोर आरू दारीयाट कामूल ती बीड़ूमोर’ एनी आम्म उवाटीन चिट्टी लिकोम नाम” एट्टेर। 26 तेबे पिटतेल तो चिरीक पोलूस आ बोदना ऊबी मेन्डान लोगीन चेंग पातेड, ओर चेंगे ओगराक एञ्ञेड, आरू ओर ओगराक एर्रान चिरीक एतोड पोल्ला आरू ओर कान तीग जाम्मा लोगूग एतोड कुडरानो पूर्रा एनी पोक्कू गुडी ती चेन्डेड।

गुडी ती पोलूसीन चुमरानो

27 आ चात दिनेल पूरी वेरेके, ओदो आसीया देचेत एऊदीकूल पोलूसीन मापोरबून गुडी ती चूड़ी किली जोप तो लोगीन उच उचाक किली पोलूसीन चुम्मेर। 28 आरू “ए इसराएली लोगीने! वेरूर आम्म चेंगे बिड़ूर। इयची मांजा आय आम्म लोगीन विरूद ती, आम्म नियोमीन विरूद ती आरू ई पाड्डीन विरूद ती आरे एरको जाम्मा लोगीन मेरचीकमेड। आरू आमान आटनी एरा, एऊदीकूल चिला लोगीन बेले मापोरबून गुडी ती एन्दरी किली मापोरबू आची मेन्डान पाड्डीन चूत चाजेड” एट्टेर। 29 (ओर इदूग ले मुन्नी इपीसूस तो तुरूपीमूसीन पोलूसीन चेंगे गेड़े ती चूड़ी मेन्डीर। आदूग पोलूस एऊदी चिला आ मांजेन मापोरबून गुडी बीतराम एन्दरेड नाड एनी ओर तामूंग तामी चोमजूरीर।)

30 तेबे गुलाय गेड़ेत लोग रिच एरी, तूलेरी किली उलजेर आरू पोलूसीन चुम्मी किली मापोरबून गुडी तीग वाल ओड़गोड़ाक-ओड़गोड़ाक एन्दरेर। आरू तुरते नी मापोरबून गुडी बीतराम, लोग आबूच एरी किली आदीन चूत पाटतीकतार एनी आदीन कापाटीन केटची काट्टेर। 31 जोप तो लोग पोलूसीन आनकीक कानतीर, आतोड रोमी देचेत पालटेनकूल मुकीयालीन गुलाय एरूसेलेम गेड़े ती कावडी उयूमेर एनी काबेर पोक्केर। 32 तेबे ओड तुरते नी पालटेनकूलीन चेलाकतान ओदेरीन आरू ओदो पालटेनकूलीन उसकाक किली जोप लेग्गाट तूलेरनेड। कुरलाकतानेर एके पालटेनकूल मुकीयालीन आरू पालटेनकूलीन चूड़ी किली पोलूसीन चाडूक चाय काट्टेर।

33 तेबे पालटेनकूल मुकीयाल लेग्गे वेरी किली पोलूसीन मोटीयाकतेड आरू इरडू चिकरीलोड काटकू तियारची किली, “ऊड एड आय? आरू ऊड नातीन एटे चाजेड नाड?” एनी जाच आडू मुरीयाकतेड। 34 तेबे जोप तो लोग ओदेर ओकूत पोक्की किली कोलार एर्रीर आरू मारी आवूरतेर आवूर तोन पोक्की किली कोलार एर्रीर। आना आदरा कोलार एर्रान चेत्तूग ओड नातो चेत्त आय एनी चोमजू ओड़ेड। आदूग पोलूसीन पालटेनकूल ओलेकूलेल ती उय्यू तान्न लोगीन तियारतेड। 35 ओर ओनीन पायटील आर्रे उञ्ञेर आरू जोप तो लोग निक्के रिच ती मेन्डानूग पालटेनकूलूग ओनीन, एतीक किली उय्यू पाट्टो। 36 एटे एनोड जोप तो लोग “ओनीन आनकीकपूर” एनी पोक पोकी ओन पोटतेल कोलार एरी वेर्रीर।

पोलूस जोप तो लोगीन पोकरानो

37 पालटेनकूल पोलूसीन बीतराम उय्यू कानपेक, पोलूस पालटेनकूल मुकीयालीन, “आन इनीन ओक बानीन पोक्कू नाम्बीकतान काय एटे?” एट्टेड। आदूग पालटेनकूल मुकीयाल, “एटे ईन युनानी पाटा पुट्टोत आदूग? 38 एटे इदूग ले मुन्नी लोगीन आबूच एरीक किली, चार आजार ऊबागेरीकूलीन चिड़ा बाटतेल उयरान मिसर देचेत मांजा ईनी एरात आदूग?” एट्टेड। 39 आदूग पोलूस, “आन गो किलीकीया देचेत बेड़तो गेड़ा तरसूस ती जेनोम एर्रान एऊदी मांजा आय। आनीन लोगीनोड ऊबू इड एनी आन गुवारूकमेन” एट्टेड। 40 तेबे पालटेनकूल मुकीयाल ऊब एन्डानूग पोलूस पायटील ती निलची किली केय्योड चायगा चिञ्ञेड। आनातले ओर किटूक पाडरानूग पोलूस ओरोड इबरानी पाटे ती ऊबू मुरीयाकतेड।