पोरबू 19

पोलूस इपीसूस गेड़े ती चेन्डानो

1 आपूल्लोस कुरीन्तूस गेड़े ती मेनेक, पोलूस सेड़ेक पावोड पोडेड टिटाक तो जाम्मा देचेल ती चुल्ली किली इपीसूस गेड़े ती वेञ्ञेड। आना बिसवासी लोगीन ओदेरीन बेटी किली 2 ओरीन, “ईम बिसवात चाजेक नाती केचूर चिला जियोमीन बेटोर काय एटे?” एट्टेड। आदूग ओर, “आम, नाती केचूर चिला जियोम मेन्डाड एनी वेनामी बेले” एट्टेर। 3 आदूग पोलूस, “आटे तीग ईम एट्टो बपतीसमा पात्तोर गो?” एट्टेड। ओर एके “एऊना चियरान बपतीसमा” एट्टेर। 4 तेबे पोलूस ओरीन, “एऊना लोग पापदेरोम तीग मेन्नीन उजराकतानूग बपतीसमा चिञ्ञेड। ओड लोगीन आन्न ले पिटतेल ओकूर वेर्राड। ओनीन बिसवात चाजूर एनी पोक्की मेन्डीड जे? ओड ईसू आय” एट्टेड। 5 ओर आदीन वेन्नी किली पोरबू ईसून पिदीर पात्ती किली बपतीसमा एतेर। 6 आरू पोलूस ओर पोडे तान्न केय्यीन इडरानूग नाती केचूर चिला जियोम ओर पोडे इड़ेड आरू ओर जार-जार पाटेल ऊबू आरू मापोरबून कान तीग काबेर वेन्नी किली ओन काटावीन लोगीन पोक चियू मुरीयाकतेर। 7 ओर जाम्मा बारा जान माईंड चिन्ड आकाट मेन्डीर।

8 पोलूस एऊदीकूल बिन्ती जोड़रान ओलेक ती चेनी किली मून्डू नेलींगूल आकाट नाती नार चिलाका लोगीन मेरचीकतीड। आरू मापोरबू आंगरूरान इसाब ती पोका पोकी एर एरी ओर रेच्चा चोमजारे पोक चिञ्ञेड। 9 एरोड ओदेर एके ऊबागेरी एरी किली बिसवात चाजामा एनी जाम्मा लोगीन मुन्देल ईसू मेरचीक मेन्डान पावीन कियाल ऊबेर। आदूग पोलूस ओरीन चायी किली बिसवासी लोगीन ओर ले पुटा एलगाकतेड। आरू ओरीन तुरन्नूस एन्डान केडीकतान बेड़तो बाकरे ती उञ्ञेड आरू आना लोगूग मापोरबून इसाबीन रोजे पोक चियरीड। 10 ईरवोकाल आर्रे आटनी एर एरी मेट्टो। तेबे आसीया देचे ती मेन्डान, जाम्मा एऊदीकूल आरू एऊदीकूल चिला लोग बेले पोरबून पोद्दीन वेट्टेर।

इसकीवेन सात जान चिन्डूल

11 आरू मापोरबू पोलूसीन केय्य तीग निक्के पोरलेत कामूलीन चाजपीकतीड। 12 ओन मेनीन टोड्डी मेन्डान रूमालीन आरू मूयूरान गान्डेलीन उय्यी नोयकूड तो लोगीन टोड्डीकपोड बेले ओर नोयकूडूल चायूरूव आरू बूत डुमेल चुम्मी मेन्डानेरीन कान तीग आव बेले पेची किली तूल्लूव।

13 एरोड, चुल चुल्ली पेरकूल आची किली आरू केय्यूल टोड्डी किली बूत डुमेलीन पुचरान ओदो एऊदीकूल बेले पोरबू ईसून पिदीरीन पात्ती किली बूत डुमेलीन “पोलूस केडीकतान पोरबू ईसून पिदीर तो ताकोत ती वाल पेक” एनी वालीक चूड़ेर। 14 आरू एऊदीकूल बेड़तो पेलाच इसकीवेन सात जान चिन्डूल बेले आटनी चाजूरीर। 15 एरोड बूत डुमा ओकेच ओरीन, “आन ईसून पुट्टेन आरू पोलूसीन बेले पुट्टेन। एरोड ईम एड आय?” एट्टो। 16 आरू आ बूत डुमा चुम्मी मेन्डानेड, ओर पोडे वेरी किली ओरीन आराकतेड आरू ओरीन निक्के चाटतानूग ओर डुमड़ेल आरू गावेल एरीक एरी किली आ ओलेक तीग तूलेर।

17 आरू ई पाटेल इपीसूस गेड़े ती मेन्डान जाम्मा एऊदीकूलूग आरू एऊदीकूल चिलायेरूग पाता चेलोतो। आरू ओरूग बेलकी चेपाकतानूग ओर पोरबू ईसून पिदीरीन इजीत मानेर। 18 पाटेन पातीयाकतानेर कुबे लोग वेरी ताम चाजूरान कियाल तो कामूलीन पारगाक किली टिट्टे-टिट्टे पोक्केर। 19 आरू कुबे सिरालेर गुनीयालेर बेले ताम्म पोती पुरानूल तो कागेतूलीन एन्दरी किली जाम्मा लोगीन मुन्देल किच टुट्टेर आरू आ पोती पुरानूल मोल्लेन एजा चाजूरानूग पोचास आजार रूप तो पोयसेलतोव एञ्ञोव। 20 ईटे कुबे ताकोत तीग पोरबून पोद्द चान्द चान्दी मेट्टो आरू वेलारे चेन्डो।

21 ई पाटेल एर्रान पिटतेल, नाती केचूर चिला जियोम पोलूसीन एरूसेलेम ती चेन्डान ले मुन्नी, मकीदूनीया आरू आकाया देचेल ती चेनूंग इट्टेड। आनातले पोलूस “आनूंग आना चेन्डान पिटतेल, रोमी गेड़े ती बेले चेन्डानो आय” एनी पोक्केड। 22 आदूगी ओड तान्न चेंगे काम चाजूरान तिमूतीयूसीन आरू इरासतूसीन मकीदूनीये ती चोटची किली तान कुदे आसीया देचे ती ओदो दिनेल आर्रे मेट्टेड।

इपीसूस ती लोग आबूच एर्रानो

23 आ वादेक इपीसूस गेड़े ती ईसू मेरचीक मेन्डान पाव तो इसाब ती लोग निक्के आबूच एञ्ञेर। 24 एटे एनोड देमेतरीयूस एन्डान पिदीर तो ओक सोनार, अरतीमीस एन्डान वेन्दीडीन गुडीन चान्दी तीग चाजी किली वीड़ेड। आदीन चेत्तूग ओन चेंगे मेन्डान गोदूरानेरूग निक्के पोयसेल टोन्डूरूव। 25 ओड आटनीत काम चाजूरान जाम्मेनी उड़चीक किली ओरीन, “ए दादेरे! ई काम ती आम कुबे कामाकमोम एनी ईम पुनमोर। 26 एरोड पोलूस इपीसूस ती नी एरा, एरोड जाम्मा आसीया देचे ती, केय्योड चाजूरान मुरीतूल ती मापोरबू मेनाडा एनी कुबे लोगीन चोमजाक किली बुरलाकतानोन ईम वेनमोर आरू चूड़ूमोर बेले। 27 ईटे तीग एपोर गो आमान आम्म कामेय एराया एन्डान पाटा ई एरा, एरोड अरतीमीस एन्डान वेन्दीड गुडीन बेले एडी इजीत चाजारा। गुलाय आसीयेत लोग आरू मोंजीपूर तो लोग आदीन मानूरीर। एपोर एडी माना कियाल एर्रा” एट्टेड। 28 आदूग जोप तो लोग आदीन वेन्नी किली निक्के रिच एञ्ञेर आरू “इपीसूसतेरीन अरतीमीस बेड़तो वेन्दीड आय” एनी कोलार एञ्ञेर। 29 आरू तुरते नी गुलाय गेड़े ती ऊबागेरी एर्रानेरीन जोप चान्दोतो। लोग पोलूसीन चेंगे मकीदूनीये तीग वेर्रान इरूल, गयूस आरू आरीसतरकूसीन चुम्मेर। आरू इरूलीन चेंगे नी जेटके गेड़ेत लोग उलजूरान ओक बेड़तो बाकरे ती उञ्ञेर। 30 पोलूस जोप तो लोगीन लेग्गाट बीतराम चेनूंग कानतीड। एरोड बिसवासी लोग ओनीन चेनूंग इडेरा। 31 आसीया देचेत ओदो पोलूसीन चेंगेत आदीकारीकूल बेले लोग उलजी मेन्डान बाकरे ती चेनमेन एनी गुवारची किली काबेर चोटतेर।

32 उलजी मेन्डान लोगीन तीग ओदेर ओक पाटा पोक्की किली कोलार एर्रीर आरू मारी ओदेर आवूर-आवूर कोलार एर्रीर। आदूग उलजूरान कान निक्के कियाल एर्रू। आना तीग कुबे लोग ताम नांग उलजोम नाम एनी बेले पूना मेन्डीर। 33 तेबे एऊदीकूल बेरपेला सिकन्दरीन लोगीन मुन्देल ऊबू टेगलाक मुरीयाकतेर आरू ओदेर जोप तीग ओनीन एटे-एटे ऊबूरानो आय एनी जोड़ ती पोक चिञ्ञेर। सिकन्दर लोगीन किटूक पाटतीक केय्योड चायगा चियी किली ओरीन पोक्कू कानतीड। 34 एरोड ओर ऊड एऊदी मांजा आय एनी पुन्दानूग, जाम्मा लोग, “इपीसूसतेरीन अरतीमीस सोब ले बेड़तो वेन्दीड आय” एनी ओकती चोर ती इरडू गेन्टेल आत्ती कोलार एर एरी मेट्टेर। 35 तेबे गेड़ेत बेड़तो आदीकारी लोगीन किटूक पाडीक किली, “ए इपीसूसतेरीने, बेड़तो अरतीमीसीन मुरीत आरू पोडी सरग तीग उरकूरान आरू मानूरान केल्लीन इपीसूस गेड़ेत गुडी ती इड्डी किली इपीसीकूल राका चाजूमेर एनी एड पूनार आदूग? 36 आरू आटे एरा एनी एडी पोक्कू ओड़ार। आदूगी ईम किटूकनाय मेनूर आरू ऊबागेरी एरी किली नाती नी चाजूमोर। 37 एटे एनोड ईम एन्दरोर नार जे? ई मांजाकूल गुडीतोन बेले डोंगारी आरू आम्म वेन्दीडीन बेले गो निन्दरारी। 38 एबे देमेतरीयूसूग आरू ओन चेंगे मेन्डान मुरीतूल गोदूरान लोगूग नातो एरको रिच मेनोड नियाव चाजूरान पाड आरू नियाव चिड़ाकतानेड मेन्डाड। ओर आना चेनी किली सिकीयात चियेकेर। 39 एरोड ईम एके आवूर आगेर नातो एरको पाटा जाच आडू कान्डूकमोर एरोड, आदीन पोँच उन्डी किली नियाव चाजूरानो आय। 40 एटे एनोड इनेत आबूच एर्रान चेत्तूग रोमी सरकार आमीन केचूर लागाकतान नार्र मेन्डा। इने नाती इसाब चिलाका जेगड़ा एञ्ञो ना आरू ई जोप उलजूरान इसाबूग नाती जवाब चियू ओड़ाम” एट्टेड। 41 ओड ईवीन पोकरान पिटतेल उलजूरान लोगीन बागाकतेड।