पतरस आरू एऊनेन पोँच उन्डतीकतेर।
4
1 पतरस आरू एऊना लोगोड ऊब ऊबी मेन्डीर,
आरू पेलाचकूल,
गुडीत पारा वालीयालेरीन सियान आरू ओदो सदूकीकूल आना वेञ्ञेर।
2 पतरस आरू एऊना एके ईसू चाय्यरान कान तीग मारी जियोम पाड्डी चुलतेड एनी मेरचीकतानूग,
आद मेनगेर मारी जियोम पाड्डी चुलतानोन चेत्त टोटीकतो।
(सदूकीकूल मेनगेर जियोम पाड्डी चुलतानोन चेत्त चाजारा।)
आदीन वेन्नी ओर निक्के रिच एञ्ञेर।
3 आरू ओर ओरीन चुम्मेर।
आतोड आन्डी मेन्डू।
आदूग ओरीन जेल ती केटची,
तोल्ली ओरोन वेनदाम एट्टेर।
4 एरोड ओर मेरचीकतानोन वेनदानेर कुबे लोग ईसून बिसवात चाजेर आरू बिसवासी लोग पाँच आजार माईंड चिन्ड आकाट एञ्ञेर।
5 पिटतेल तो चिरीक एऊदीकूलीन आंगरूरानेर,
सियानकूल,
आरू मूसाल नीतीन मेरचीकतानेर एरूसेलेम ती उलजेर।
6 आरू ओर चेंगे मुकीयाल पेलाच आन्ना,
कायपा,
एऊना आरू सिकन्दर आरू मुकीयाल पेलाचीन कुटूमतेर ओदेर उलजेर।
7 आरू ओर पतरस आरू एऊनेन ताम्म नाड़बूल नीतीक किली,
“ईम ई कामीन आरो ताकोत तीग आरू एर पिदीर तीग चाजोर?”
एनी जाच आडू मुरीयाकतीर।
8 तेबे पतरसीन पोडे नाती केचूर चिला जियोमीन ताकोत इड़ोतो आरू ओड ओरीन,
“ए लोगीन आंगरूरानोरे!
आरू सियानकूले!
9 ईम एके आम मुन्नीत माटलालूग रेच्चा चाजी चियरानूग,
इने ओड एटे तीग उजरेड एनी जाच आडूमोर।
10 एरोड गो,
इमूंग जाम्मेगी आरू इसराएली लोगूग जाम्मेगी इदीन पुनूंग लागूरा।
आम इदीन नासरत तो ईसू मसीयालीन पिदीर तीग चाजूमोम।
ओनीन ईम कुरूस ती कोट्टीकतोर,
एरोड मापोरबू एके ओनीन चाय्यरान कान तीग जियोम पाटतीकतेड।
ऊड ओन तीगी आय,
इम मुन्देल रेच्चा चुकनाय निलतेड नाड।
11 ईसून बीतेर ती नी मापोरबून कागेत ती बेले,
‘ओलेक काटरान ईम,
एराया एनी बाकनूरान केल्ल,
टोक तीग काम पाडरान आञ केल्ल एञ्ञो ना’a एनी लिका मेन्डा।
आ केल्ल ईसू ई आय।
12 आरू बाचाक एर्रानो आवूर एर तीगी एराया;
एटे एनोड बादोर किड़ी मांजेन नाड़बूल बाचाक एनी ओन पिदीरीन चायी आवूर एर पिदीरीनी बेले आमूंग मापोरबू चियाडी” एट्टेड।
13 पतरस आरू एऊना डाडू तीग ऊबूरानोन चूड़ी पोँच ती उन्डरानेर,
ऊर गो पोड़ा सादा मांजाकूल आय एनी पुन्नी किली काबा एञ्ञेर;
आरू ऊर गो ईसून चेंगे मेन्डानेर आय एनी चिताकतेर।
14 आरू उजरूरान माटलालीन पतरस आरू एऊनेन चेंगे निलची मेन्डानोन चूड़रानूग,
ओर नाती पोक्कू ओड़ेर।
15-16 एरोड ओरीन पोँच तीग बाटतेल चेनूंग पोक्की किली,
ओर ताम-ताम,
“आम ऊरीन एटे चाजूराम?
ओर ईटे पोरलेत काम तो चिनेल चाजेर एनी एरूसेलेम ती मेन्डान जाम्मा लोगूग पाता चेलोतो ना।
आम बेले इदीन आटे एरोया एनी पोक्कू ओड़ाम।
17 एरोड ई पाटा लोगीन का मारी आगेर वेला मेनको ओर मारी ई पिदीर ती आरोई मांजेनोड ऊबूरानो एरा एनी आम्मोर ओरीन दामकाकपार” एनी ऊबा ऊबी एञ्ञेर।
18 तेबे ओरीन मारी बीतराम कूयी किली,
“ईम ईसून पिदीर ती नाती नी मुरले पोक्कूमोर आरू मेरचीकमोर बेले” एनी तियारतेर।
19 एरोड पतरस आरू एऊना ओरीन,
“मापोरबून नेंजेर ती नातो रेच्चा आय?
आम मापोरबून पाटेन ले आगेर इम पाटेन पातरानो रेच्चाट आय काय एटे?
आदीन ईमी बिचार चाजूर।
20 एटे एनोड आम नातीन चूड़ोम नाम आरू वेट्टोम नाम आवीन पोकाका किटूकनाय मेनूंग ओड़ाम” एट्टेर।
21 तेबे पोँच उन्डरानेर ओरीन मारी बेले दामकाक किली चाय काट्टेर।
एटे एनोड जाम्मा लोग एर्रानोन चूड़ी मापोरबून चाराकतानूग ओरूग एटे चाजी डेन्ड चियराम एनी चिड़ाक ओड़ेर।
22 एटे एनोड पोरलेत काम तो चिनेन तीग उजराक एर्रान,
आ मांजा चालीस बेरेक ले आगेरतेड मेट्टेड।
बिसवासी लोगीन बिन्ती
23 पतरस आरू एऊना बाची किली ताम्म चेंगेत लोगीन लेग्गाट वेञ्ञेर आरू बेड़कूल पेलाचकूल आरू सियानकूल पोकरान जाम्मेन ओरीन वेनपीकतेर।
24 ओर आदीन वेनदानूग,
जाम्मा चेंगे बिड़ी ओकती चोर ती मापोरबून बिन्ती जोड़ेर।
“ए सावकार!
सरग आरू मोंजीपूरीन,
सोमून्दीन आरू एंगोट बानील आना मेन्डाव आवीन गेड़रानोत ईनी आय।
25 इन नाती केचूर चिला जियोम तीग इन कामीयाल,
आम्म पुरकेत दाऊद मेनगेन ऊबीकतानूग ओड ईटे पोक्केड:
‘जातूल-जातूल तो लोग नांग मापोरबून विरूद आदरा आबूच एरमेर?
आरू देचेल-देचेल तो लोग नांग पोका गात चुम्मूमेर?b
26 यावेन आरू ओड आची किली नीतीकतान कोसीनc विरूद ती
मोंजीपूर तो कोसकूल निलतेर,
आरू आंगरूरानेर ओकती चोर ती उलजेर।’d
27 एटे एनोड चेत्तेगी ईन मसीयाल एरू आचूरान आरू नाती केचूर चिला इन कामीयाल ईसून विरूद ती,
एरोदेस कोस आरू पोन्तीयूस पिलातूस,
एऊदीकूल चिला आवूर लोग आरू इसराएली लोगीन चेंगे इयची गेड़े ती उलजेर आरू गात चुम्मेर।
28 ईटे एर्रा एनी ईन मुन्नीत ले इन बेरकेच आरू उवाट तीग चिड़ाक मेन्डानोन ओर चाजेर।
29 एपोर ए पोरबू!
ओर दामकाकतानोन चूड़ आरू इन कामीयालेरूग,
इन पोद्दीन निक्के डाडू चाजी किली वेनपीक बेरकेच चिय।
30 आरू लोगीन उजराक आपला केय्यीन नीकीक।
आरू पोरलेत काम तो चिनेलीन आरू आचरूत एरीकतान कामूलीन,
इन नाती केचूर चिला कामीयाल ईसून पिदीर तो ताकोत तीग चाज” एनी बिन्ती जोड़ेर।
31 ओर बिन्ती जोड़ू पोलानूग,
ओर उलजी मेन्डान पाड ऊञोतो आरू ओर जाम्मेन पोडे नाती केचूर चिला जियोमीन ताकोत इड़ोतो आरू ओर मापोरबून पोद्दीन डाडू चाजी किली वेनपीक मुरीयाकतेर।
बिसवासी लोगीन जीवना
32 बिसवासी लोग ओकती चोर ती आरू ओकती बिचार ती मेन्डीर।
आरू एडी बेले तामूंग मेन्डान बानीलीन ईव आम्मोव आय एनी पोकेरा।
एरोड तामूंग मेन्डान जाम्मा बानीलीन ओकूरूग ओकूर पायची चिञ्ञेर।
33 आरू आ पोरबू नीतीकतानेर निक्के ताकोत तीग पोरबू ईसून चाय्यरान कान तीग मारी जियोम पाटतीकतानोन जाम्मा लोगूग वेनपीक-वेनपीक मेट्टेर।
आरू मापोरबून बेड़तो माया पेम ओर पोडे बान्नी मेट्टो।
34 आरू ओर नाड़बूल,
नातो एरको लागूरा एनोड आमूंग चिल्ला एन्डानेर एडी चिल्ला मेन्डीर।
एटे एनोड ओर कान तीग एरूग वायेल आरू ओलेकूल मेन्डूव ओर आवीन एतोड-एतोड वीड़ेर आरू वीड़रान पोयसेलीन एन्दरी किली,
35 आ पोयसेलीन पोरबू नीतीकतानेर केय्य ती ओपीक चिय काडरीर।
एरूग एरको नातो एरको लागोड ओरूग आ पोयसेलीन पायतीर।