एऊना 19

पिलातूस ईसून कूटील कोटीक बेटाकतानो

(मत्ती 27:15-31; मरकू 15:6-20; लूका 23:13-25)

1 आनातले पिलातूस ईसून उय्यी किली कोडे़नोड चाडूक इट्टेड। 2 आरू पालटेनकूल चाकेल तो तुरेयीन आन्डी किली, ईसून तेल्ल ती तुन्दीकतेर आरू ओक नेतरो रेंग तो कुड़तेन तुन्दीकतेर। 3 आरू ओर ओन लेग्गे वेरी किली, “एऊदीकूल कोसूग जुवार एरको” एनी गेन-गेन पोक्केर, आरू ओनीन मोकोम ती ताप्पेर। 4 तेबे पिलातूस मारी ओपोट बाटतेल पेची किली जोप तो लोगीन, “चूड़ूर, आन ओन का नाती केचूर बेले बेटेना एन्डानोन ईम पुनकोर, आन ओनीन इना इम मुन्देल एबे एन्देर्रान” एट्टेड। 5 तेबे ईसू चाकेल तो तुरेय आरू नेतरो रेंग तो कुड़ता तुन्दी किली बाटतेल पेतेड; पिलातूस ओरीन “चूड़ूर, ई मांजेन” एट्टेड। 6 बेड़कूल पेलाचकूल आरू गुडीत पारा वालीयालेर ओनीन चूड़ी किली, “ओनीन कुरूस पारे ती कोटीक। ओनीन कुरूस पारे ती कोटीक” एनी कोलार एञ्ञेर। आदूग पिलातूस, “आन ओन का नातीन केचूर बेटेना; आदूग ईमी उय्यूर आरू ओनीन कुरूस पारे ती कोट्टूर” एट्टेड। 7 एऊदीकूल एके, “आमूंग ओक नीती मेन्डा; ओड तानीन तानी मापोरबून चिन्ड एरीकतानूग, आ नीती ती ओड चाय्यरानो आय एनी मेन्डा” एट्टेर। 8 आदूग पिलातूस आटे एन्डानोन वेन्नी किली मुन्नीत ले बेले आगेर नारचेड। 9 आरू ओड मारी ईसून माल बीतराम उय्यी किली ओनीन, “ईन आरेतोत आय?” एट्टेड। एरोड ईसू एके मुर्रे एनेडा। 10 आदूग पिलातूस ओनीन, “ईन आन्नोड ऊबाता आदूग? एटे आनूंग इनीन चोड़ाकतान आरू कुरूस पारे ती कोटीकतान पान्न मेन्डा एनी पूनात आदूग?” एट्टेड। 11 आदूग ईसू, “इनूंग पोडी तीग मापोरबू, ई पान्नीन चियाका मेनोड, आन्न पोडे इनूंग पान्न मेनोयामीन; आदूग आनीन इनूंग बेटाकतानेड जाम्मेन ले बेड़तो पापदेरोम चाजूरानेड आय” एट्टेड।

12 आतीत ले पिलातूस ओनीन चोड़ाक कानतीड, एरोड एऊदीकूल एके, “ईन ई मांजेन चोड़ाकपोड, ईन केसर कोसीन चेंगा एराता। एटे एनोड एड एरको तानीन कोस एरीकतानेड, केसर कोसीन विरूदतेड आय” एनी कोलार एञ्ञेर। 13 आ पोद्दूलीन वेन्नी पिलातूस ईसून बाटतेल एन्दरी किली, केलकूल पारची मेन्डान बीती एन्डान ओक पाड ती तान्न नियाव चिड़ाकतान गाद्दी ती उन्डेड। आ पाडीन इबरानी पाटे ती गब्बाता एन्डार। 14 आद मारी तियारूग ले मुन्नीत चिरीक मेन्डू, आरू आतोड टिट्टे देलकूल एरी मेन्डू। तेबे पिलातूस एऊदीकूलीन, “चूड़ूर, इम कोसीन” एट्टेड। 15 एरोड ओर, “ओनीन आनकीक, ओनीन आनकीक, ओनीन कुरूस पारे ती कूटील कोट्टू इड” एनी कोलार एर्रीर। पिलातूस ओरीन, “आन इम कोसीन कूटील कोटीकतान काय एटे?” एट्टेड। आदूग बेड़कूल पेलाचकूल, “केसर कोसीन चायी आमूंग आवूर एडी कोस चिल्लाड” एट्टेर। 16 आदूग पिलातूस ईसून कुरूस पारे ती कोटीक बेटाकतेड।

कुरूस पारे ती कूटील कोटरानो

(मत्ती 27:32-44; मरकू 15:21-32; लूका 23:26-43)

आदूग पालटेनकूल ओनीन उञ्ञेर। 17 तेबे ओड तान्न कुरूस पारेन काञी किली बाटतेल पेतेड आरू तेल्ल कापरा एन्डान पाड ती वेञ्ञेड। इबरानी पाटे ती आ पाड्डीन गुलगूता एन्डार। 18 आना ओर ओनीन आरू आवूर इरूलीन ओन चेंगे, ओकूरीन वेला टिटाक आरू ओकूरीन डेबरा टिटाक कुरूस पारे ती कूटील कोट्टेर। 19 पिलातूस नासरत तो ईसू, एऊदीकूलीन कोस आय एनी ओक पिटीत पारे ती लिकू इड्डी किली आ कुरूस पारे ती ऊटीक इट्टेड। 20 लोग ईसून कूटील कोटरान पाड गेड़े तीग लेग्गेनी मेन्डानूग, आरू आ लिका इबरानी, लतीनी आरू युनानी पाटे ती लिकूरानो मेन्डानूग, कुबे एऊदीकूल आदीन पोडे़र। 21 आदूग एऊदीकूलीन बेड़कूल पेलाचकूल पिलातूसीन, “‘एऊदीकूल कोस’ एनी लिकूमेन, एरोड ‘ओड तानीन आन एऊदीकूल कोस आय’ एट्टेड एनी लिक” एट्टेर। 22 आदूग पिलातूस, “आन लिकूरानो आटनीची मेन्डा, आदीन बादलू एराया” एट्टेड।

23 आनातले पालटेनकूल ईसून कुरूस पारे ती कूटील कोट्टू पोलान पिटतेल, ओर ईसून गान्डेलीन पात्ती किली आदीन नालू बाटेल पायतेर आरू ओकूर ओकूरूग ओक-ओक बाटा पात्तेर; आरू ओन कुड़तेन बेले पायतेर। आ कुड़ता एके किड़ी तीग पोडीत आर्रे कुटायो, आमान आन्डरानोयी ओकती गोन्दा मेन्डू। 24 आदूग पालटेनकूल ओकूरीन ओकूर, “आम्मोर इदीन चीकूमोर; चिटील लिकी किली तीनपार; एर पिदीर ती पेता ओनूग एर्रा” एट्टेर।

“ओर आन्न गान्डेन तामूंग पायतेर

आरू आन्न कुड़तेग चिटील तीनतेर”

एनी मापोरबून कागेत ती लिकी मेन्डानो पूरा एरू गो आय, ईटे एञ्ञो। आदूग पालटेनकूल आटे चाजेर।

25 ईसून कोटरान कुरूस लेग्गे ओन ईय्या, ईय्येन तोड़ो, कोलोपासीन आयाल मरीयम आरू मगदलीत मरीयम निलची मेन्डूव। 26 ईसू ताम्म ईय्येन आरू तान्न लाडराल चेलालीन, आना निलची मेन्डानोन चूड़ेड, आरू ओड ताम्म ईय्येन, “ए ईय्या, चूड़, ऊड इन चिन्ड आय” एट्टेड। 27 मारी ओड तान्न चेलालीन, “चूड़, इद इम ईय्या आय” एट्टेड। आतीत ले आ चेलाल आदीन तान्न ओलेक उञ्ञेड आरू आन्नी मेनूंग इट्टेड।

ईसू चाय्यरानो

(मत्ती 27:45-56; मरकू 15:33-41; लूका 23:44-49)

28 आदीन ले पिटतेल, ईसू एपोर जाम्मा एञ्ञो एनी ताड़ी किली (मापोरबून कागेत ती मेन्डान लिका पूरा एरको एनी), “आनूंग नीर आन्डूमो” एट्टेड। 29 आना टिर टिराट आंगूर रेस तीग कोप्पी मेन्डान ओक बेड़तो बेटकी मेन्डू, आदूग ओर लुस लूसाट मेन्डान इसपाँच एन्डानोन बेटकी ती तुरबी जुपा एन्डान पोर्रेत चेल्लेन तीप ती आलची किली पोडी एतीकतेर आरू ईसून चोन्ड ती टेकाकतेर। 30 ईसू टिर टिराट आंगूर रेसीन चूवकी किली, “पूरा एञ्ञो” एट्टेड, आरू चिंगरू जीती किली तान्न जियोमीन चाय काट्टेड।

बालेनोड ओन काकचीपे ती उचरानो

31 आद पाबूरान चिरीक ले मुन्नीत चिरीक मेन्डानूग, पाबूरान चिरीक मोड़ी कुरूस पारे ती मेन्डानो एरा। (एटे एनोड मापोरबू आड़ञूरान तियार इसाब तो, आ पाबूरान चिरीक निक्के मुकीयाट मेन्डू।) आदूग एऊदीकूल सियानकूल पिलातूसीन ताम कुरूस ती कूटील कोट्टी मेन्डीर जे? ओर केलूलीन पिन्डूक इड्डी किली ओर मोड़ीलीन उय्यू इडेकेड एनी पोक्केर। 32 आदूग पालटेनकूल वेरी किली, ईसून चेंगे कूटील कोट्टी मेन्डान पोईलातेडीन केलूलीन पिनतेर, आरू मारी आवूर दुसेर मांजेन केलूलीन बेले पिनतेर। 33 एरोड ओर ईसून लेग्गे वेरी किली ओड चाय्यी मेन्डानोन चूड़ेर आरू ओर ओन केलूलीन पिनपेरा। 34 एरोड पालटेनकूल कान तीग ओकूर एके बालेनोड ओन काकचीपे ती उच्चेड आरू आना तीग तुरते नेतीर आरू नीर पेतो। 35 इना लिकी मेन्डानोन पोड़रान ईम बेले बिसवात चाजोकोर एनी ईटे एर्रानोन चूड़रानेड, आ इसाबीन गोवाई पोक्केड नाड। ऊन गोवाई चेत्ते तो आय आरू तान चेत्त-चेत्त पोक्कूमेड एनी ऊड पुट्टेड। 36 “ओन बूलेन ओकतीन बेले पिनपारा” एनी मापोरबून कागेत ती मेन्डान लिका पूरा एरू आय, ईव जाम्मा एञ्ञो। 37 आरू मापोरबून कागेत तो मारी ओक पोद्द ती, “ओर, ताम कूटील कोट्टी मेन्डानेडीन चूड़रार” एनी लिका मेन्डा।

ईसून मोड़ीन मोट ती इडरानो

(मत्ती 27:57-61; मरकू 15:42-47; लूका 23:50-56)

38 ईवीन ले पिटतेल अरमीती गेड़ेत यूसूप पिलातूसीन तान ईसून मोड़ीन उय्यू नाम्बीकताड काय एटे एनी जाच आडेड। यूसूप ईसून चेलाल मेन्डीड। एरोड ओड एऊदीकूलीन सियानकूलूग नारची किली तान बेले ओन चेलाल आय एनी पारगाकपाका मेन्डीड। पिलातूस ओनीन ईसून मोड़ीन उय्यू इट्टेड। आदूग ओड चेनी किली मोड़ीन उञ्ञेड। 39 ईसून लेग्गे ओपोट चित्ता चेनी किली बेट गाट एरी मेन्डीड जे? आ निकूदेमूस बेले मोड़ी ती बुरीयाकतान केम्बूर आरू गन्दरस एन्डान दूप मिसाक मेन्डान बास आटरान बानील, ओक कोड़ेक पोन्दरा किलो आत्ती पात्ती वेञ्ञेड। 40 तेबे ओर इरूल ईसून मोड़ीन उय्यी किली, एऊदीकूल नीती ती चेल्लान आकाट मोड़ीन बास आटरान केम्बूरूल चेंगे मोल्लेत पोटी गान्डे ती गुड़ीयाकतेर। 41 ईसून कूटील कोटरान पाड ती ओक पार्र मेन्डू; आना एतोडी एरीनी इडाका मेन्डान चाटरे ती मेन्डान पुन मोट कोलकी मेन्डू। 42 आ चिरीक पाबूरान चिरीकीन ले मुन्नीत चिरीक मेन्डानूग, आरू आ मोट लेग्गे मेन्डानूग, ईसून मोड़ीन आन्नी इट्टेर।