एऊना 17

ईसू बिन्ती जोड़रानो

1-2 ईसू ई पाटेलीन पोक्की पोलान पिटतेल, सरग टिटाक चूड़ी किली, “ए बुवा, बेरा एदोतो ना; इन चिन्डीन केय्य ती, ईन बेटाक मेन्डान जुग-जुग तो जियोमीन, ओड लोगूग चियकेड एनी, ईन ओनूग जाम्मा लोगीन पोडे पान्न चिञ्ञोत। आदूग ओड इनीन जाम्मेग ले बेड़तेड आय एनी टोटीकपेकेड एनी, ईन आपला चिन्डीन जाम्मेग ले बेड़तेड आय एनी टोटीक। 3 आरू लोग ओकूरी चेत्त मापोरबू मेन्डान इनीन, आरू ईन चोटतेर्रान ईसू पुन्दानो ई, जुग-जुग तो जियोम आय। 4 ईन आनूंग ओपीक मेन्डूत जे? आन आ कामूलीन चाजी पोली किली इनीन ई मोंजीपूर ती ईन जाम्मेग ले बेड़तोत आय एनी टोटीकतेन नान। 5 एपोर ए बुवा, ई गुलाय मोंजीपूर उपजाका मेनेक ले, आनूंग इन चेंगे इजीत तो मान मेन्डू जे? आटनीत इजीत तो मान इन मुन्देल एबे आनूंग एर्रान आकाट चाजू।

6 आनूंग बेटाक मेन्डान ई मोंजीपूर तो लोगूग आन इन पिदीर तो ताकोतीन पारगाकतेन नान। ओर इन लोग मेट्टेर आरू ओरीन ईन आनूंग बेटाकतोत आरू ओर इन पोद्दीन मानेर नार। 7 एपोर, ईन एंगोट बानीलीन आनूंग बेटाकतोत, आव जाम्मा इन टिटाकतोव आय एनी ओर चिताकतेर। 8 एटे एनोड ईन आनीन पोकरान पोद्दूलीन आन ओरीन पोक्केन; आरू ओर आवीन पातीयाकतेर, आरू आन इन टिटाक ले वेञ्ञेन नान एन्डान चेत्तीन चिताकतेर, आरू ईनी आनीन चोटतोत नात एनी, ओर बिसवात चाजेर नार। 9 आन ओरूग बिन्ती जोड़ूमेन। ई मोंजीपूर ती इनीन बाकनूरान लोगूग बिन्ती जोड़ाना, एरोड ईन आनूंग बेटाकतानेरूगी आय, बिन्ती जोड़ूमेन; एटे एनोड ओर इन लोग आय। 10 आरू एड आन्न लोग आय ओर जाम्मा ई इन लोग बेले आय आरू एड इन लोग आय ओर जाम्मा ई आन्न लोग बेले आय; आरू ओर आन जाम्मेग ले बेड़तेन आय एनी मानूरार। 11 आन इनात ले ई मोंजीपूर ती मेनाना, एरोड ओर ई मोंजीपूर ती मेन्डार बे, आरू आन इन लेग्गे वेरमेन। ए नाती केचूर चिला बुवेने, आन आरू ईन ओकती चोर ती मेन्डान आकाट, ओर बेले ओकूर ओकूरीनोड ओकती चोर ती मेनूंग, ईनी आनूंग चियी मेन्डान इन पिदीर तो ताकोत तीग, ओरीन राका चाज। 12 आन ओर चेंगे मेनेक, ईन आनूंग चियी मेन्डान इन पिदीर तो ताकोत तीग, ओरीन चाकलेन नान आरू ओरीन राका चाजेन नान। आरू मापोरबून कागेत ती लिकी मेन्डानो पूरा एरको एनी, ओकूर, एड नाचरानो मेट्टो, ओनीन चायी एडी बेले जूकेरा। 13 एरोड एपोर आन इन लेग्गे वेरमेन, आरू ओर आन्न वेड़केन चेड़ीगेन बेटेकेर एनी, आन ई पाटेलीन मोंजीपूर ती मेनेकी पोक्कूमेन। 14 आन इन पोद्दीन ओरूग पोक चिञ्ञेन नान; एरोड आन मोंजीपूरतेन एरान, आटनी ओर बेले मोंजीपूरतेर एरा कान्डूग, मोंजीपूर तो लोग एके ओरोड कुचेर एञ्ञेर। 15 आन ओरीन मोंजीपूर तीग उय एनी पोकाना, एरोड ईन ओरीन एड़जाट चेयतानीन तीग बाचाक एनी आय, बिन्ती जोड़ूमेन। 16 एटे आन ई मोंजीपूरतेन एरान, आटनी ओर बेले मोंजीपूरतेर एरार। 17 ईन, इन चेत्त इसाबूलीन पारगाक किली ओरीन इनूंग एलगाक। इन पोद्द चेत्ते तो आय। 18 ईन आनीन एटे ई मोंजीपूर ती चोटतोत, आटनी आन बेले ओरीन मोंजीपूर तो लोगीन लेग्गे चोटतेन नान। 19 ओर पूरा इनूंग एलगाकतानेर एरकेर एनी, ओर चेत्तूगी, आन आपलेनी इनूंग सेवा चाजू एलगाकमेन।

20 आन आमान ओरूगी बिन्ती जोड़ाना, एरोड ओर पोद्द तीग आनीन बिसवात चाजूरानेरूग बेले बिन्ती जोड़ूमेन। 21 ए बुवा, ईन आन्न कान आरू आन इन कान मेन्डान आकाट ओर जाम्मा ओकती चोर ती मेनकेर। आरू ईन आनीन चोटतोत नात एनी, मोंजीपूर तो लोग बिसवात चाजेकेर एनी ओर आम्म चेंगे बेले ओकती चोर ती मेनकेर एनी बिन्ती जोड़ूमेन। 22 आम इरूली ओकती चोर ती मेन्डान आकाट, ओर बेले ओकती चोर ती मेनकेर एनी, ईन आनूंग चियरान इजीत तो मानीन, आन ओरूग चिञ्ञेन नान। 23 आन ओर चेंगे मेन्डान, आरू ईन आन्न चेंगे मेन्डात। आदूग ई मोंजीपूर तो लोग, ईन आनीन चोटतोत, आरू ईन आन्न चेंगे चोग ती मेन्डान आकाट, ओर चेंगे बेले चोग ती मेन्डात एनी, चिताक, ओर ओकूर ओकूरीनोड पूरा चोर ती मेनकेर। 24 ए बुवा, ई मोंजीपूर उपजाका मेनेक ले ई, ईन आन्न चेंगे चोग ती मेन्डानूग, ईन आनूंग इजीत तो मान चिञ्ञोत नात। ईन आनूंग चियी मेन्डान आन्न इजीत तो मानीन, ईन आनूंग बेटाकतानेर चूड़ू, ओर आन मेन्डान पाड ती मेनकेर एनी, आन मेन्न चाजूमेन। 25 ए देरमी बुवा, ई मोंजीपूर ती इनीन बाकनूरानेर, इनीन पूनेर नार, आन एके इनीन पुट्टेन, आरू ईनी आनीन चोटतोत एनी आन्न चेलालेर पुट्टेर। 26 ईन आन्न चेंगे चाजूरान चोग ओर चेंगे मेनूंग आरू आनी कुदे ओर चेंगे मेनूंग, इन पिदीरीन आन ओरूग पारगाकतेन नान; आरू पारगाक-पारगाक मेन्डान” एनी बिन्ती जोड़ेड।