लूका
लिकूरान एडो पाटा
1
1 आम्म नाड़बूल पूरा एर्रान पाटेल इसाब तो काटावूलीन लिकू कुबे लोग मुरीयाकतेर नार।a
2 ओर मुर तीग एर्रानोन चूड़ी किली मापोरबून पोद्दीन मेरचीकतानेर आमीन ओपीक चियरानोन लिकेर।
3 आदूग आन इजीत मानूरान ए सियान तियूपीलूसीने!
b आन बेले आ इसाबूलीन मुर तीग रेच्चा जाच आडरानूग,
आवीन तेरकूबाल ती इनूंग लिक चियरानो आनूंग रेच्चा बावोतो।
4 तेबे गो इनीन मेरचीक मेन्डान पाटेल चेत्तेतोव आय एनी ईन पुन्दात।
जकरीयेग मापोरबून काबेर एदोतो
5 एऊदीया देचेत कोस एरोदेसीन वादेक,
आबीय्या एन्डान पेलाचीन मान्दे ती जकरीया पिदीर तो ओकूर मापोरबून पेलाच मेन्डीड।
आरू ओन आयाल बेले पेलाच आरूनीन तेरान तो मेन्डू।
आदीन पिदीर इलीसीबा मेन्डू।
6 ओर इरूल मापोरबू पोकरान पाटेल तीग आरू नियोमूल इसाब तीग केचूर चिलाका पोरबून नेंजेर ती देरमीकूल मेट्टेर।
7 एरोड ओरूग मुरले चिन्डूल पापकूल चिला मेन्डूव।
एटे एनोड इलीसीबा बाँजी मेन्डू आरू ओर इरूल निक्के मुत्ताक मुरताल एरी मेन्डीर।
8 तान्न मान्दा सेवा चाजी मेनेक ओकेच मापोरबून मुन्देल सेवा चाजू पारी वेर्रानूग जकरीया यावे मापोरबून गुडी ती चेनी किली पेलाच काम चाजूरीड।
9 पेलाचकूल नियोमीन चेत्तूग,
गुडी ती चेनी किली दूप नेडीक ओन पिदीर ती चिटीc पेतो।
10 आरू ओड चेनी किली दूप नेडीकपेक आना उलजूरान जाम्मा लोग कोरी ती बिन्ती जोड़रीर।
11 आतोडी पोरबून ओक सरग दूत,
दूप नेडीकतान पाड ले वेला टिटाकd निलतानो ओनूग देका पाट्टो।
12 जकरीया ओनीन चूड़ी किली काबा एर चेन्डेड आरू ओनूग कुबे बेलकी चेपाकतो।
13 एरोड सरग दूत ओनीन,
“ए जकरीया!
नारचूमेन।
एटे एनोड,
इन बिन्तीन मापोरबू वेट्टेड नाड आरू इन आयाल इलीसीबेन तीग इनूंग ओक चिन्ड जेनोम एर्राड;
ओन पिदीर ईन एऊना इड।
14 आरू ओन चेत्तूग इनूंग कुबे रेच्चा बावूरा आरू वेड़का टोन्डूरा आरू कुबे लोग ओड जेनोम एर्रानूग वेड़का एर्रार।
15 एटे एनोड ओड पोरबून नेंजेर ती बेड़तेड एर्राड।
ओड आंगूर मेलीन चिलाड नातो एरको निसेन एतोडी उना मेनकेड।
e आरू ओड आपला ईय्येन पोटे तीगी मापोरबून नाती केचूर चिला जियोम तीग कोप्पीक एर्राड।
16 आरू इसराएल लोगीन तीग कुबे लोगीन ताम्म यावे मापोरबून टिटाक मारी मेन्डची एन्देर्राड।
17 मारी एलीयेनf जियोम आरू ताकोत ती एरी किली पोरबून मुन्देल-मुन्देल चेनी किली जाम्मा बुवेर आपला पापकूल चेंगे चोर ती मेनूंग ओर मेन्नूलीन मेन्डतेर्राड आरू पाटेल पाता लोगीन देरोम आरू गियान तो चोमजूरानेल मेन्डतेर्राड।
आटनी चाजी किली पोरबूग ओक मान्दा लोगीन तायार चाजूराड” एट्टेड।
18 तेबे जकरीया सरग दूतीन,
“इदीन आन एटे चेत्त पातीयाकतान?
एटे एनोड आन मुत्ताक एञ्ञेन नान आरू आन्न आयाल बेले मुरताल एञ्ञो ना” एनी जाच आडेड।
19 आदूग सरग दूत ओनीन,
“आन जिबराईल आय आरू आन मापोरबून मुन्देल निलची मेन्डानेन आय आरू आन इन्नोड ऊबू आरू इनूंग ई रेच्चाट काबेरीन वेनपीक चोटतेर्रानेन आय।
20 आरू चूड़,
आन्न पाटेलीन ईन बिसवात चाजा कान्डूग एबे ईन ऊबू ओड़ात।
इदूगी एत्ती दिनेत्तार्रे ई पाटेल पूरा एरोवा आ दिनेत्तार्रे ईन कोन्दाल मेन्डात।
ई पाटेल आदीन बेरा एदोड पूरा एर्राव” एट्टेड।
21 आतोड कोरीत लोग जकरीयेन पाव चूड़ चूड़ी मेन्डानेर ओनूग गुडी ती इञ्ञोत कोम्बेर नातेग लागूमो एनी काबा एरू मुरीयाकतेर।
22 ओड वाल वेर्रानूग ऊबू ओड़ेड।
तेबे ओर ऊड गुडी ती देरसेनg चूड़ेड एनी चोमजेर।
आरू ओड ओरीन चायगा चाजूरीड आरू कोन्दाल एरी मेन्डीड।
23 ओन सेवा चाजूरान दिनेल पूराh एर्रानूग ओड आपला ओलेक चेन्डेड।
24 आनातले ओन आयाल इलीसीबा मेन ती तेबोतो आरू चेन्डू नेलींगूल आर्रे आपला ओलेक तीग वाल पेपा मेन्डू।
25 आरू,
“मांजेन कान तीग इजीतीन बाचाक पोरबू ई दिनेल ती जियोम नोयपीक किली आनूंग ईटे चाजेड” एनी पोकोतो।
ईसू जेनोम एर्राड एनी सरग दूत काबेर पोकरानो
26 चोय गोटा नेलींगूल ती मापोरबून टिटाक तीग जिबराईल एन्डान सरग दूतीन गलील तो नासरत गेड़े ती ओक वाटा मालीन लेग्गाट चोटतेरनेड।
27 आदीन यूसूप पिदीर तो दाऊदीन कुटूम तो ओक चेपालूग आडी मेन्डीर।
आ वाटा मालीन पिदीर मरीयम आय।
28 सरग दूत आदीन लेग्गाट वेरी किली,
“जुवार!
इनीन मापोरबू देया चाजूमेड।
पोरबू इन चेंगे मेन्डाड” एनी पोक्केड।
29 आरू मरीयम ओन पोद्दूल तीग निक्के काबा एर चेन्डो आरू ई आसतीर तो पाटा एट्टोत आय एनी बिचार चाजोतो।
30 सरग दूत आदीन,
“ए,
मरीयम चूड़!
नारचूमेन।
एटे एनोड मापोरबून देया इन कान एञ्ञो ना।
31 आरू चूड़!
ईन मेन ती तेबूरात आरू इनूंग ओक चेपाल जेनोम एर्राड।
ईन ओन पिदीर ईसू इड।
32 ओड जाम्मा लोगीन ले मुकीयाल एर्राड आरू ओनीन पोडीत बेड़तो मापोरबून चिन्ड एन्डार आरू यावे मापोरबू ओन पेपा दादी दाऊदीन राज गाद्दीन ओनूग चियराड।
33 आरू ओड याकूबीन तेरानीन जुग जुगूग आंगरूराड आरू ओड आंगरूरानो एतोडी पोलाया” एट्टेड।
34 तेबे मरीयम सरग दूतीन,
“इद एटे तीग एरू नाम्बीकता?
आन गो वाटा माल आय” एट्टो।
35 मारी सरग दूत आदीन,
“इन कान नाती केचूर चिला जियोम इड़ूराड आरू पोडीत बेड़तो मापोरबून ताकोत इन कान नीड़ा चाजूरा आरू जेनोम एर्रान मापोरबू तानूंग एलगाक मेन्डान आ पापीन मापोरबून चिन्ड एनी पोकरार।
36 इद!
इन कुटूम तो इलीसीबेग बेले मुरताल मेनेक ओक चेपाल जेनोम एर्राड।
आदीन बाँजी एन्डीर।
एबे आदूग चोय गोटा नेलींगूल एरमोव।
37 चूड़ एटे एनोड मापोरबूग एराया एन्डान पाटा नाती बेले चिल्ला” एट्टेड।
38 तेबे मरीयम,
“चूड़!
आन पोरबून कामीयाट आय।
आनूंग इन पाटेन आकाटी एरको” एट्टो।
तेबे सरग दूत आदीन लेग्गाट तीग चेन्डेड।
मरीयम इलीसीबेन चूड़ू चेन्डो
39 आतोड मरीयम चुलची किली जेटके नी कोप्पेल टिटाक तो एऊदीया देचेत ओक गेड़े ती चेन्डो।
40 आरू जकरीया ओलेक ती चेनी किली इलीसीबेन जुवार चाजोतो।
41 इलीसीबा मरीयमीन जुवारीन वेनदानूगी आदीन पोटेत पाप डोगाकतो आरू इलीसीबा नाती केचूर चिला जियोम तीग कोप चेन्डो।
42 आरू आद निक्के जोड़ ती कूयी किली,
“जाम्मा आयचील कान तीग इनूंग मापोरबू आसतीर चिञ्ञेड नाड आरू इन पोट्टेत पापूग बेले मापोरबू आसतीर चिञ्ञेड नाड।
43 मापोरबून पेम आन्न पोडे एटे एञ्ञो?
आदूग आन्न पोरबून ईय्या आन्न लेग्गाट वेञ्ञो ना।
44 आरू चूड़ ईन आनीन जुवारतान पाटा आन्न केकोल ती एदूके आन्न पाप आन्न पोटे ती वेड़के ती डोगाकतो।
45 आरू पोरबून टिटाक तीग तानूंग पोक्कीक एर्रान पाटेल चेत्ते एर्रा एनी बिसवात चाजूरान मालूग आसतीर एरको” एट्टो।
मापोरबून मरीयम जुवार चाजूरानो
46 तेबे मरीयम,
“आन्न जियोम पोरबू जाम्मेन ले बेड़तेड आय एनी जुवार चाजूमो।
47 आरू आन्न जियोम आनीन बाचाकतान मापोरबून तीग वेड़का एञ्ञो।
48 एटे एनोड ओड आपला कामीयाटीन चुचारूतोन नेंजराकतेड।
चूड़ूर!
एबे तीग जाम्मा जुग तो लोग आनीन आसतीर तो एन्डार।
49 एटे एनोड कुबे ताकोत्तेड आनूंग बेड़कूल-बेड़कूल कामूल चाजेड नाड।
ओन पिदीर नाती केचूर चिलायो आय।
50 आरू ओनूग नारचूरान लोगीन कान तेरानूल तेरान आर्रे
ओड जियोम नोयपीक-नोयपीक मेन्डाड।
51 ओड तान्न लाव तो केय्यूल तीग ताकोतीन टोटीकतान कामूल चाजूराड
आरू आपला मेन्न ती तामी बेड़तेड एनी बिचार चाजूरानेरीन बुरलाकतेड।
52 ओड आंगरूरानेरीन गाद्दी तीग गुचाकतेड
आरू चुचारू तो लोगीन पोडी एतीकतेड।
53 ओड मुरानी मेन्डान लोगीन रेच्चाट बानीलीन तित्तीकतेड
आरू सावकारकूलीन मेला केय्य पुच चिञ्ञेड
54-55 मापोरबू आम बुवेर दादीलेर इबराईम आरू ओन तेरानतेरीन
पाटा चियी मेन्डान आकाट
एतोड नांग जियोम नोयपीक चुरता चाजी किली
ओड आपला कामीयाल इसराएलीन चेंग चिञ्ञेड”
एनी किली पाटा पाडोतो।
56 आरू मरीयम मून्डू नेलींगूल आकाट इलीसीबेन चेंगे मेन्नी किली आपला ओलेक मेलेर्रानो।
बपतीसमा चियरान एऊना जेनोम एर्रानो
57 तेबे इलीसीबेग पाईंग एर्रान दिना पूरोतो आरू ओक चेपालीन जेनोम चिञ्ञो।
58 आदीन लेग्गेत लोग आरू कुटूम तो लोग पोरबू आदीन पोडे कुबे जियोम नोयपीकतानोन वेन्नी किली आदीन चेंगे वेड़का एञ्ञेर।
59 आरू ओर आँट दिनेल एर्रानूग पापीन जियोम पाड तो तीप तोलीन कुडीकi वेञ्ञेर आरू ताम्म बुवेन पिदीर ती जकरीया इड्डू कानतीर।
60 आरू ओन ईय्या,
“एरा,
ओन पिदीर एऊना इडरानो आय” एट्टो।
61 आदूग ओर,
“इन कुटूम ती गो एडी बेले ई पिदीरतेड चिल्ला मेट्टेड” एट्टेर।
62 तेबे ओर ओन बुवेन चायगा चाजी किली “इन चिन्डीन नातो पिदीर इडू इनूंग मेन्न लागूमो?”
एट्टेर।
63 ओड ओक लिकूरान पोटी चिलेट आडी किली ओन पिदीर एऊना आय एनी लिकेड आरू जाम्मा लोग काबा एञ्ञेर।
64 तेबे ओन ऊबाल पुटोतो आरू नेवान्ड तुरते एनकू मुरीयाकतो आरू ओड ऊबू आरू मापोरबून जुवार चाजू मुरीयाकतेड।
65 आरू ओन लेग्गे मेन्डानेर जाम्मेन का नार चेपाकतो आरू आ जाम्मा पाटेल तो काबेर गुलाय कोप्पेल तो एऊदीया देचेल ती वेलोतो।
66 आरू वेनदान लोग जाम्मा आपला-आपला मेन्न ती बिचार चाजी किली,
“ई चेपाल मुकीयाल एर्राड” एट्टेर।
एटे एनोड पोरबू ओन चेंगे मेन्डीड।
जकरीया मापोरबून जुवार पोकरानो
67 आरू ओन बुवा जकरीया नाती केचूर चिला जियोम तीग कोप चेन्डेड,
आरू मापोरबून कान तीग काबेर वेन्नी किली लोगीन पोक चिञ्ञेड।
68 “इसराएल तो मापोरबू यावेग जुवार एरको।
ओड आपला लोगीन बेट गाट एरू वेञ्ञेड
आरू ओरीन ताम्म विरूदी लोगीन केय्य तीग चोड़ाकतेड।
69-70 ओड आपलेग एलगाक मेन्डान मापोरबून कान तीग काबेर वेन्नी किली लोगीन पोक चियरान गुरूकूलीन टिटाक तीग
मुन्नीत ले जुमान चिड़ाक मेन्डान आकाटी,
आपला कामीयाल दाऊदीन तेरान ती आमूंग ओक कोडीनjk आकाट तो
निरबे लाव तो बाचाकतानेडीन चिञ्ञेड नाड।
71 आञ्ञोती एरा,
आम्म कुचरेय तो लोगीन केय्य तीग
आरू आमीन गिन-गिनाकतान लोगीन केय्य तीग आमीन बाचाकताड।
72 आटनी आम्म बुवेर दादीलेर पोडे जियोम नोयपीक किली
चिड़ाक मेन्डान आपला नाती केचूर चिला जुमानीन चुरता चाजूराड।
73 आ जुमानीन ओड आम्म पुरकेत बुवा इबराईमोड चिड़ाक मेन्डीड।
74-75 एटे एनोड आमीन कुचरेयकूल केय्य तीग चान्डाक किली
ओन मुन्देल नाती केचूर चिलाका आरू देरोम तीग
आरू नार चिलाका आम जियोम मेन्नारे
ओनीन सेवा चाज चाजी मेनकोम”
एनी आमीन बाचाकतेड।
76 आरू “ईन ए पापीने!
इनीन मापोरबून कान तीग काबेर वेन्नी किली लोगीन पोक चियरान पोडीत बेड़तो मापोरबून गुरू आय एनी पोकरार।
एटे एनोड ईन यावेन पाव तायार चाजू ओन मुन्देल-मुन्देल चेन्डात।
77 आरू ओन लोगूग ताम्म पापदेरोमीन मापी बेटी किली बाचाकतान इसाब तो गियानीन चियरात।
78 इद आम्म मापोरबू रेच्चा जियोम नोयपीकतानूग एर्रा;
आमूंग विलीज चियू पोकाल पेतान आकाट मापोरबू सरग तीग वेरी किली बेट गाट एर्राड।
79 आरू मापोरबून पूनाका चीकोड ती आरू चाय्यकूडीन नीड़े ती उन्डरान लोगूग विलीज चियराड
आरू आम्म केलूलीन चुक तो पाव ती ताकीकताड” एट्टेड।
80 आरू आ चेपाल चान्दी किली जियोम ती बेरकेच एञ्ञेड आरू इसराएल लोगीन मुन्देल देका पाड्डारे चिड़ा बाट ती मेट्टेड।