मत्ती 23

मूसाल नीतीन मेरचीकतानेर आरू परीसीकूल

(मरकू 12:38-39; लूका 11:43, 46; 20:45-46)

1 आनातले मारी ईसू जोप तो लोगीन आरू चेलालेरीन, 2 “मूसाल नीतीन मेरचीकतानेर आरू , मूसालीन पाड ती उन्डी किली ओड चियरान नियोमूलीन चोमजाकमेर। 3 आदूग ईम ओरीन मानूर आरू ओर इमीन नान एनोड आदीन चाजूर। एरोड ओर चाजूरान आकाट चाजूमोर, एटे एनोड ओर ताम मेरचीकतान आकाट तामी चाजारा। 4 एरोड एतीक एरा कियाल तो निक्के बोजेन काञपीकतान आकाट ओर नियोमूलीन मानूरान चेत्तूग लोगीन केट-केट तो कामूलीन चाजपीकमेर। एरोड ओरूग चेंग चियू, तामी एके आदीन एतीक आपला ओक वान्देन बेले नीकीक मेन्न चाजारा। 5 ओर चाजूरान जाम्मा कामूलीन लोग चूड़ेकेर एनी चाजूमेर। मापोरबून ओदो पोद्दूल तो कागेतूल इड्डी मेन्डान पिटीलेक तो डाबीन ओसार तो चाजी किली, आदीन केय्य ती आरू कापार ती काट्टी मेन्डार। आरू आपला गान्डा देड़ीन चान्दीक किली लोग देरमीकूल आय एनकेर एनी पोबाकतार। 6 ओर मान दान चाजूरान कान बेड़कूल-बेड़कूल पाटकूल ती आरू एऊदीकूल बिन्ती जोड़रान ओलेकूल ती रेच्चाट-रेच्चाट पाडकूल ती उन्डू मेन्न चाजूरार। 7 आरू आटूल ती लोग तामीन जुवारतानोन आरू लोग तामीन गुरू एनी कूयूरानोन मेन्न चाजूरार।”

8 “ईम एके गुरू एनीक एरू मेन्न चाजूमोर। एटे एनोड इमूंग ओकूरी गुरू मेन्डाड; ईम जाम्मा तोल्लेनकूल आरू चालाचील आकाटतोर आय। 9 मोंजीपूर ती एरीनी बुवा एनी पोक्कूमोर; एटे एनोड इमूंग ओकूरी बुवा आय, ओड सरग ती मेन्डाड। 10 ईम मेरचीकतानेर बेले एनीक एरू मेन्न चाजूमोर; एटे एनोड इमूंग ओकूरी मेरचीकतानेड मेन्डाड, ओड आय । 11 एड इम कान तीग बेड़तेड आय ओड इम कामीयाल एर्रानो आय। 12 एटे एनोड एड एरको तामीन तामी बेड़तेड एरीकतानेर इनमानतेर एर्रार। आरू एड एरको तामीन तामी इनमानतेर एरीकतानेर बेड़तेड एर्रार।”

पोबाक एर्रानोन ईसू कियाल पोक्केड

(मरकू 12:40; लूका 11:39-42, 44, 52; 20:47)

13 ए मूसाल नीतीन मेरचीकतानोरे! आरू परीसीकूले! ईम पोबाक एर्रान लोग आय। ओ! ओ! इमूंग बेड़तो गेरा एर्रा। ईम मापोरबू जाम्मेनी आंगरूरानोन लोग पातीयाकपा मेनकेर एनी ओरूग आड्डोम एरमोर। ईम बेले आदीन पातीयाकपारा आरू आदीन बेटू मेन्न चाजूरान लोगीन बेले पातीयाक इडारा। 14 

15 ए मूसाल नीतीन मेरचीकतानोरे! आरू परीसीकूले! ईम पोबाक एर्रान लोग आय। ओ! ओ! इमूंग बेड़तो गेरा एर्रा। ओकूरीन एऊदी देरोम ती बिड़ाक, गुलाय सोमून्द आरू नेन्दील ती चुरलूरार एरोड ओड इम देरोमीन पातीयाकपोड ओनीन आपलेन ले इरडू बागूल आगेर नरक कून्ड तो डेन्ड बेटूरानेड चाजूरार।

16 ए कानालेर मेन्नी पाव टोटीकतानोरे! ओ! ओ! इमूंग बेड़तो गेरा एर्रा। एटे एनोड ईम, “एड बेले मापोरबून गुडीत किरीया तिनोड बेले नाती एराया, एरोड गुडीत सोनीन किरीया तिनोड ओनूगी किरीया काटूरा” एनमोर। 17 ए बाकवालेर आरू कानालेरे! सोन बेड़तोत आय काय आ सोनीन मापोरबूग एलगाकतान गुडी बेड़तोत आय? 18 मारी एड बेले मापोरबून गुडीत जेतरा पाडीन किरीया तिनोड बेले नाती एराया, एरोड गुडीत जेतरा पाड ती चोत्तीक मेन्डान बोदनेन किरीया तिनोड ओनूगी किरीया काटूरा एनमोर। 19 ए कानालेरे! बोदना बेड़तोत आय काय, आ बोदनेन मापोरबूग एलगाकतान गुडीत जेतरा पाड बेड़तोत आय? 20 आदूगी एड एरको जेतरा पाडीन किरीया तिनोडेल, ओड आदीन आरू आना नातो मेन्डा आदीनो बेले किरीया तिनमेड। 21 मापोरबून गुडीन किरीया तिन्दानेड आ गुडीन आरू आना मेन्डान मापोरबून किरीया बेले तिन्दाड। 22 एड एरको सरगीन किरीया तिन्दानेड मापोरबून राज गाद्दीन आरू आना उन्डी मेन्डानेडीन किरीया बेले तिनमेड।

23 ए मूसाल नीतीन मेरचीकतानोरे! आरू परीसीकूले! ईम पोबाक एर्रान लोग आय। ओ! ओ! इमूंग बेड़तो गेरा एर्रा। ईम पोदीना, सोँप आरू जीरेन देस गोटा बाटेल तीग ओक बाटेन मापोरबूग चियरार। एरोड नियोमीन तीग मुकीयाट इसाबूल आकाट तोन चाजारा। आव नातोव आय एनोड: एरीनी चेकी एराका चेत्त नियाव चाजूरानो; लोगूग जियोम नोयपीकतानो आरू बिसवात चाजू एर्रान बातेरतेड मेन्डानो एन्डानोव आय। ईम ईवीन बेले चाजूरानो आय; आरू आवीन बेले चायूरानो एरा।

24 ए कानालेर मेन्नी पाव टोटीकतानोरे! ईम पिटीलेक तो गून्डीन आकाट तोन गो चेनाकतार, एरोड बेड़तो ऊँटीन आकाट तोन तार्र काडरार। 25 ए मूसाल नीतीन मेरचीकतानोरे! आरू परीसीकूले! ईम पोबाक एर्रान लोग आय। ओ! ओ! इमूंग बेड़तो गेरा एर्रा। ईम ओगराकतान इसाबूग बेटकीन आरू तारीन बाटतेल गो नोडरार। एरोड बीतराम इम मेन्न ती लालेच एर्रानो आरू जिवड़ेय एर्रानो नातेक कोप्पोतोना। 26 ए कानाल परीसीने! पोईल इन का मेन्डान लालेच एर्रान आरू जिवड़ेय एर्रान बिचारूलीन गुचाक। तेबे देरोम तो कामूल चाजू नाम्बीकतात। आटनी एरोड आद बेटकीन आरू तारीन बीतराम तीग मांजूरानूग वाल-वाल बेले चेक चेका एर्रान आकाट एर्रा।

27 ए मूसाल नीतीन मेरचीकतानोरे! आरू परीसीकूले! ईम पोबाक एर्रान लोग आय। ओ! ओ! इमूंग बेड़तो गेरा एर्रा। ईम चूना ओटतान मोटीन आकाटतोर आय। आव वाल-वाल गो जेग जेगाचील टोन्डूराव। एरोड बीतराम एके चाय्यरान मांजेन बूलेल आरू जाम्मा किच किचाट बानील कोप्पी मेन्डाव। 28 आटनी ईम बेले वाल-वाल मांजेन नेंजेर ती देरमीकूल आकाट टोन्डूरार; इम मेन्नूल एके पोबाक एर्रानोव तीग आरू ओदेरोमूल तो कामूल तीग कोप्पी मेन्डाव।

पोबाकतानेरूग एटे एर्रा?

(लूका 11:47-51)

29 ए मूसाल नीतीन मेरचीकतानोरे! आरू परीसीकूले! ईम पोबाक एर्रान लोग आय। ओ! ओ! इमूंग बेड़तो गेरा एर्रा। ईम मापोरबून कान तीग काबेर वेन्नी किली लोगीन पोक चियरान गुरूकूलूग मोट पेडरार आरू देरमीकूलीन मोटीन चिंगारची किली, 30 “आम आम्म बुवेर दादीलेर वादेक मेनोड, मापोरबून कान तीग काबेर वेन्नी किली लोगीन पोक चियरान गुरूकूलीन नेतीर ओटीकतान कान बिड़ोमामीन” एनी पोकरार। 31 ईटे पोकरान तीग, ईम मापोरबून कान तीग काबेर वेन्नी किली लोगीन पोक चियरान गुरूकूलीन चाय्यारे तापरान लोगीन चिन्डूल आमी आय एनी आपलेगी गोवाई एञ्ञोर नार। (ईम बेले गो आटनीत बिचारतोर आय।) 32 ईम आपला बुवेर दादीलेर मुरीयाकतान ओदेरोमूलीन पूराकपूर गाट। 33  ए बाम्बूल आरू किरीच बाम्बूल पापकूल आकाटतोरे! ईम नरक कून्ड तो डेन्ड बेटूरान बातेरतोर आय एनी चिड़ाक मेन्डान तीग एटे बाचूरार आले? 34 आदूगी चूड़ूर, आन इम लेग्गाट मापोरबून कान तीग काबेर वेन्नी किली लोगीन पोक चियरान गुरूकूल आरू बुदीमानकूल आरू मूसाल नीतीन मेरचीकतानेरीन चोटतान। ईम ओर कान तीग एंगोटा लोगीन चाय्यारे तापरार आरू एंगोटा लोगीन एके कुरूस ती कूटील कोटरार, एंगोटा लोगीन ईम एऊदीकूल बिन्ती जोड़रान ओलेक ती कोड़ेलोड चाटची किली ओक गेड़े तीग आवूर तो गेड़ा एदारे वालीकतार। 35 आरू आदूगी देरमी आबीलीन नेतीर तीग पात्ती मापोरबून गुडीन आरू जेतरा पाडीन नाड़बूल चाय्यारे ताप्पी मेन्डान बिरीकीयालीन चिन्ड जकरीयाल आर्रे मोंजीपूर ती एंगोट देरमी लोगीन नेतीर ओटीकतोर नार, आदीन जाम्मा बोदी इम पोडे पाडरा। 36 ई जुग तो लोग, ई जाम्मा पाटेल तो बोदीन बेटूरारी एनी आन इमीन चेत्ते पोक्कूमेन।

एरूसेलेमीन बीतेर ती पोकरानो

(लूका 13:34-35)

37 “ए एरूसेलेम! ए एरूसेलेम! ईन इन लेग्गाट चोटतान मापोरबून कान तीग काबेर वेन्नी किली लोगीन पोक चियरान गुरूकूलीन केलकूलोड चाय्यारे तापरानोत आय। कोर्र तान पापकूलीन आपला वेरबूल किड़ी पोड़दीकतान आकाट, आन बेले इन पापकूलीन एंगोटा गुबोड़ूल रुन्डाकतान एट्टेन; एरोड ईम एके रुन्डाक इडोरा। 38 चूड़ूर! मापोरबू इम कान तो गुडी तीग गूचूरानूग, आद मेला पाडरा। 39 एटे एनोड, एबे तीग पात्ती किली ‘यावेन पिदीर ती वेर्रानेड आसतीरतेड आय’ एनी ईम पोकरान दिनेत आर्रे, ईम आनीन मारी एतोडी चूड़ारा एनी आन इमीन पोक्कूमेन” एट्टेड।