पांजीयारकूल ईसून कानतानो
2
1 कोस एरोदेसीनa वादेक एऊदी देचेत बेतलेएम ती ईसून जेनोम एर्रानूग,
पोकाल पेतान टिटाक तीग पांजीयारकूल एरूसेलेम गेड़े ती वेरी किली
2 “जेनोम एर्रान एऊदी लोगीन कोस आरे मेन्डाड?
आम पोकाल पेतान टिटाक ओन जेनमूरान इसाब तो चुक्केन चूड़ोम आरू ओनीन कोस एनी मोड़कू वेञ्ञोम नाम” एनी जाच आडेर।
3 आदीन वेन्नी किली एरोदेस कोसूग आरू ओन चेंगे जाम्मा एरूसेलेमतेरूग बिचार चुम्मोतो।
4 आरू ओड जाम्मा बेड़कूल पेलाचकूलीन आरू मूसाल नीतीन मेरचीकतानेरीनb उड़चीक किली ओरीन “मसीयाल जेनोम आरे एर्रान इसाब मेन्डा?”
एनी जाच आडेड।
5 आदूग ओर ओनीन,
“एऊदी देचेत बेतलेएम ती जेनोम एर्राड।
6 एटे एनोड:
‘एऊदीया देचे ती मेन्डान ए बेतलेएमीने!
ईन एटनी एरोड बेले एऊदीया देचेन आंगरूरानेर तीग सोब ले इनमानतोत एरा।
एटे एनोड इन कान तीग ओक आंगरूरानेड जेनोम एर्राड;
आरू ओड आन्न इसराएल लोगूग गाडीडीन आकाट मेन्नी किली ओरीन चाकलूराड’c
एनी मापोरबून कान तीग काबेर वेन्नी किली लोगीन पोक चियरान गुरू लिकेड नाड” एट्टेर।
7 आदूग एरोदेस पांजीयारकूलीन कुचनाय कूयी किली “चुक्का आरो वादेक देका पाट्टो?”
एनी रेच्चा जाच आडेड।
8 आरू,
ओड ओरीन “चेनूर,
आ पापीन रेच्चा पाता चाजूर आरू ओनीन बेटोड आनीन बेले पोक्कूर।
तेबे आन बेले चेनी किली ओनीन मोड़कूरान” एनी बेतलेएम ती चोटतेड।
9 ओर कोसीन पाटेन वेन्नी किली आना तीग पेची चेनेक,
ओर पोकाल पेतान टिटाक चूड़रान आ चुक्का आ पाप मेन्डान पाड ती चेनी किली तेबूरान आर्रे ओर मुन्देल-मुन्देल चेन्डो।
10 तेबे ओर आ चुक्केन चूड़ी किली निक्के वेड़का एञ्ञेर।
11 आरू आ ओलेक ती चेनी किली पापीन ओन ईय्या मरीयमीन चेंगे चूड़ेर आरू मुड़दील-मुड़दील उरकी किली ओनीन मोड़केर।
आरू आपला-आपला जोरेल चानची किली ओनूग सोन आरू मोल्लेत विल दूप आरू गन्दरसd एन्डान दूप तो बेंट चोत्तीकतेर।
12 आरू केलायकूड ती एरोदेसीन लेग्गाट मारी चेनमोर एनी मापोरबू पोकरानोन वेन्नी किली ओर आवूर तो पावोड आपला देचे ती मेल्लेर।
ईसूलेर मिसर देचे ती चेन्डानो
13 ओर चेन्डान पिटतेल,
पोरबून सरग दूत यूसूपीन केलायकूड ती देका पाड्डी किली,
“कोस एरोदेस,
ई पापीन तुरते चाय्यीकतान एनी कान्डूकमेड।
आदूग ईन चुलूक;
आ चेपालीन आरू ओन ईय्येन पात्ती किली मिसर देचे ती तूल आरू एत्ती दिनेत्तार्रे आन इनीन पोकाना,
आत्ती दिनेत्तार्रे आन्नी मेन” एट्टेड।
14 आदूग ओड चित्ता नी चुलची किली पापीन आरू ओन ईय्येन पात्ती किली मिसर देचे ती चेन्डेड।
15 आरू एरोदेस चाय्यारे आन्नी मेट्टेर।
“आन्न चिन्डीन मिसर देचे तीग कूयूमेन”e एनी मापोरबून कान तीग काबेर वेन्नी किली लोगीन पोक चियरान गुरून तीग पोरबू पोकी मेन्डान पाटा पूरा एरू आटनी एञ्ञो।
पापकूलीन आनकीकतानो
16 आनातले एरोदेस,
पांजीयारकूल आनीन टेक्केर एनी किली निक्के रिच एञ्ञेड आरू लोगीन चोटची किली,
तान पांजीयारकूलीन रेच्चा-रेच्चा जाच आडूरान बेरेन चूड़ी किली बेतलेएम आरू आ लेग्गे मेन्डान ईरवोकाल तीग पात्ती किली पिटीलेक तो जाम्मा पापकूलीन आनकीक तियारतेड।
17 आतोड गो,
मापोरबून कान तीग काबेर वेन्नी किली लोगीन पोक चियरान गुरू इरमीया पोकरान आकाट एञ्ञो।
एटे एनोड:
18 “रामा पोलूब ती ओक निक्के मुर मुरेग
आड़रानोन आरू कोलार एर्रानोन वेनूंग एरमो।
रायेल आपला पापकूलूग आड़रा
आरू ओर चिला कान्डूग किटूक पाड्डू राजी पाडाया”
एनी पोक्की मेन्डानो पूरा एञ्ञो।f
ईसूलेर नासरत पोलूब ती मेलेर्रानो
19 आनातले एरोदेस कोस चाय्यरान पिटतेल पोरबून सरग दूत,
मिसर देचे ती,
यूसूपीन केलायकूड ती देका पाडी किली,
20 “आ पापीन आनकीकतान एनी कानतानेर चाञ्ञेर।
आदूग,
ईन चुलूक।
पापीन आरू ओन ईय्येन पात्ती किली इसराएल देचे ती चेन” एट्टेड।
21 आदूग ओड चुलतेड आरू चेपालीन आरू ओन ईय्येन चेंगे पात्ती किली इसराएल देचे ती वेञ्ञेड।
22 एरोड,
एरोदेसीन पाड ती,
तान्न चिन्ड आरकीलाऊसg एऊदी देचेत कोस एञ्ञेड नाड एनी वेन्नी किली,
यूसूप आट चेनूंग नारचेड।
तेबे केलायकूड ती “लेक ती मेन” एन्डानोन वेन्नी किली गलील देचा टिटाक चेन्डेड।
23 आरू नासरत एन्डान पिदीर तो पोलूब ती चेनी किली मेनूंग मुरीयाकतेर।
मापोरबून कान तीग काबेर वेन्नी किली लोगीन पोक चियरान गुरूकूल “ओनीन नासरी एन्डार” एनी पोक्की मेन्डान पाटा पूरा एरको एनी आटनी एञ्ञो।