Pkak lempoo
3
Kero pli pjaandun jawi, bowk Israel hil o bamni uzuuz zimbau boko; bo ya zoñnor ze Jerusalen injaka ña aloŋ. 2 Jesuwa bowk Jozadaki na bopenen Uzi boloŋ bosinz boko, na Sorobabel bowk Sealtiel, na pzaro boko bonazoon, antom lemp pkak psi Uzi usi Israel, antom ptur wojun unhulobi duzu pkak Pminzpun ze mi opisomi zo iimna Moises, ñiinz ninsi Uzi. 3 Bosink mnkalo myeek mnsi baña bosi osaak, bo deeŋ pkak ze zun phili oni, bo tur wojun duzu pkak psi NYEEK, oi wojun ukndolobi ze nfa na montna. 4 Bo dol onah mnliina mnsi nku ze mi opisomi, zonu ba ktur wojun ze ŋnumru oiimna zuwoi zonu ominzun. 5 Antom ka bo dukoo ze tur wojun usi mhagzin na phul un Onhali osi Pli Phalu, na ŋnah uzuuz ŋnditoŋi ŋnsi NYEEK, na ŋun ŋhaloŋi ŋnsi baña binŋi phul NYEEK na ijuuns boko uzuuz . 6 Bozi hil o zu bool pseke psi ku ksi NYEEK, onu oseke osi pli pjaandun botep ptur wojun usi NYEEK. 7 Bo hul bo zu iku onsaam na bozukun iku, sa pot hul boko ŋun ŋnde, Pran na mnsitidos ze baña bosi osaak osi Sidoŋ na osi Tiru antom bo bi na mndera mnsi bun bu knduwobi sedru busi osaak Libanu, ze krik khyeek phya Jope, ze mi Siru nliin Persia jakmunk boko.Bool pseke psi ku Uzi hiroo
8 Zolur opugzan kero ka bo toom pkak ze ku Uzi, ze Jerusalem, ze pli pugzan, Jorobabel auwk Selatiel na Jesuwa auwk Josadaki na pzaro boko, bopenen Uzi na bolevita, na bombinki ze pjuuk ya ze Jerusalen. Botep utihun. Bolevita bonkawki ŋnlur ŋntaaj Bopugz o bo mpeuki ŋolo, bohokun zurun utihun ku ksi NYEEK. 9 Hunkranda Jesuwa na bowk boza, Kadmiel na bowk, na bowk Juda, bo nazoon antom o zurun baña bokntihun kunk ze ku Uzi. Bolevita boloŋ bowk Enadadi, na pzaro boko bo sa zinkun baka utihun uz.
10 Kero bo zu iku hir bool pseke psi ku kyeek ksi NYEEK, bopenen Uzi seh zun boko na yun bo ktiimoi isi wojun na ikornet. Bolevita bowk boliin Asafi bo bi uz na insunden, antom pzah NYEEK, ze mi Davidi nliin Israel hil munk boko. 11 Boyehi antom sembroo: zah NYEEK, boyeh khiz knjaki: "NYEEK o na mnjona, mnjona lo ze Israel mhoko oloŋ." Baña uzuuz bo kiik maakrin na mnliina, bo zah NYEEK, zonkont bool pseke psi ku lo po hiroo. 12 Bopenen Uzi bonsumki na bolevita, na boyeek bowkoliin boko bonzafki, bonhiinki ku kseke bo hur maakrin kero bo iin bool pseke psi ku khalu. Bonsumki ze boloŋ ka kiik na mnliina. 13 Hunkran ñazi hilun phikran pkiik psi mnliina, na pkiik psi puma zonkont baña hil ze Tiŋzan. Ka irim boko teo zun ze nlozi.