OLIURE OSI
Esdras
Siru hhutun Bojudeu bo kak Jerusalen
1
Zolur oseke osi Siru, nliin ninsi Persia, antom o dolo olado osi NYEEK ladoi ze mntum Jeremias, olut lhutun oiek osi Siru. Hunkran Siru zudun olado, antom ko hairo ze plin lo uzuuz , ozupoo ze baña uzuuz , opiso jaink: 2 "Olado Siru oli, nliin ninsi Persia: NYEEK, Uzi duzu hulin mnliin uzuuz zosaak uzuin nlemp wolo ku ze Jerusalen, dsi Judá. 3 Ña ze psoof anhoi ninsi baña lo, Uzi lo o pho na ya, a khia Jerusalen ze ozi ze Juda antom alemp Ku NYEEK, Uzi usi Israel, Uzi wobunk ze Jerusalen. 4 Ninjudeu a humi hili ze zun a oonzi, ze apsol, boiinz zun ze minzun kzinkun lo na prat na mhuru na ŋun ŋloŋo ŋnsi uyas, na ŋnsaam ŋun ŋhaloŋi na ijuuns boko uzuuz bo jeuŋi phul ze Ku NYEEK khoki ze Jerusalen."5 Hunkran boyeek pliin ze iiñ isi Juda na Benjamiŋ, bopenen Uzi, bolevita, na baña uzuuz bosi Uzi lutlhutuni ŋiek boko bo nazoon phya plemp Ku ksi NYEEK ze Jerusalen. 6 Bokinz boko uzuuz bozinkun baka prat, mhuru, na ŋnsaam na ŋun ŋloŋ ŋnsi uyas na ŋun ŋnfiroŋi na ŋun ŋhaloŋi uz ŋnsi bo hulŋi na ijuuns boko uzuuz ze Ku ksi Uzi. 7 Nliin Siru punun ŋun ŋili o ŋnsi ku ksi NYEEK, ŋnsi Nabukodonosor hili bini ze Jerusalen zu ze ku ksi ŋnzi lo. 8 Siru nliin ninsi Persia hil Mitredat, nmbaan onsaam lo, antom a punu ŋolo; afin ŋa antom zu ŋolo ze kñen Sesbazar, nyeek ninsi Judá. 9 Itiim ŋun ŋminzŋun yoi: ŋnsia 30 ŋnsi mhuru, ŋnsia 1000 ŋnsi prat, ŋmbañ 29, 10 itisel 30 isi mhuru, Itisel 410 isi prat, na ŋun ŋnloŋo ŋhoŋi 1000. 11 Ŋun ŋminzŋi uzuuz ŋnsi mhuru na ŋnsi prat ŋho 5400. Sesbasar ya na ŋa, kero bojuuk ka pun ze Babilonia phya Jerusalem.