Tumbuk ulun jok uwas ngotiak nulih kesah komolum Yesus jok uwas torjadik tahkan holang ihtok. 2 Idoh nulih havoi umbak jok kongesah ahkan torok tahkan ulun-ulun jok nohtok bongoi inon jok uwas torjadik erih tahkan topahtuk ah, khavun kojadiu ah marak tarung pios erih. 3 Kotului erih, ulik ahkuk noliti paring tarung erih tahkan topahtuk ah, ahkuk ngomin icok kopuhtus ahkan nguan buhkuk ihtuh mbak torahtur ahkam muk. 4 Ahkuk nguan ihtuh, ahkan ihkok taꞌai inon jok uwas kongajar ahkam muk punak tuꞌuk.

5 Beteng jaman Herodes, lacak Yudea, arok icok behtik okon sombayang agamak Yahudi jok ngarai ah Jakaria tahkan kolompok okon agamak Abia, oruh ah pun tahkan koturun Harun, ngarai ah Elisabet. 6 Komolum dorok hobosai ah erih nyenang ahtoi Hotalak. Mbak ahtoi jok punak tuꞌuk dorok pahtuh mbak paring poletah khavun hukum Taurat jok tonulih Musa. 7 Dorok yarok tepun anak kotului Elisabet tomanang khavun dorok rih uwas havoi okok noh.

8 Icok ondo, beteng kolompok okon agamak Abia ngonduon giliran, Jakaria nguan korejak molayan Hotalak nuk Lovuk Hotalak.

9 Mbak kongundi, jok kopuꞌun ah konguan doh okon-okon agamak, Jakaria konopilik ahkan nyolong nuk Lovuk Hotalak khavun mahpui manyan nuk nyembah Hotalak. 10 Kotihkak mahpui manyan, ulun arok bodoa nuk konahak. 11 Beteng erih kak molekat Tuhan mokarah arop ah ahkan Jakaria. Molekat erih tombok nuk silak kotouk mesbah. 12 Kotihkak Jakaria nohtok molekat erih, iyok tokocit khavun mihkoh. 13 Totahpik molekat erih nuhtui: “Arak mihkoh, Jakaria! Hotalak umbot nyonih doa muk. Oruh muk Elisabet ahkan nganak anak kinyam bahkas. Ihkok nyamah ah noh nongak ngarai ah Yohanes. 14 Ihkok ahkan ngandah tuꞌuk khavun tumbuk ulun ahkan ngandah ngindoi anak erih arok nain. 15 Iyok ahkan monyenang ahtoi Tuhan khavun iyok iyam ahkan ngorih danum anggur, khavun ngorih aꞌang jok moharik.

Khavun sojaham iyok kongarok, iyok uwas konguasak Roh Hotalak. 16 Iyok ahkan nguan tumbuk ulun Israel hulik umbak Tuhan, Hotalak doh. 17 Iyok ahkan muhat khavun bokuasak kolo nabik Elia. Iyok ahkan konguhtus sojaham Tuhan. Iyok ahkan ngodamai amai dorok anak ah khavun nguan ulun jok iyam pahtuh mbak Hotalak ahkan kongomin noku jalan jok hinut. Mbak koderih iyok ahkan nyodiak ahtoi ulun ahkan norimak Tuhan.”

18 Hiyon Jakaria ahkan molekat erih: “Bokolo poh ahkuk taꞌai, ngindoi aꞌang erih ahkan torjadik? Kotului ahkuk tuh uwas okok noh khavun oruh kuk uwas jukur kokoi ah nai.”

19 Molekat erih mutah ah: “Ahkuk noh Gabriel jok molayan Hotalak khavun ahkuk uwas konguhtus Ah ahkan bokesah umbak ihkok nongak tarung jok pios ihtuh ahkam muk. 20 Beteng ondo jok uwas tonetu Hotalak, inon jok uwas pomarak kuk ahkam muk ahkan torjadik. Totahpik kotului ihkok iyam pocayak, ihkok nain iyam taꞌam nuhtui, ihkok ahkan bisuk nyiring inon jok ahkuk marak ah rih torjadik.”

21 Kotihkak erih, ulun-ulun nulo ngindoi Jakaria. Idoh pusong mbai iyok dalo kotahiu nuk luvang Lovuk Hotalak. 22 Khavun beteng iyok boluak, iyok iyam taꞌai nuhtui umbak idoh. Iyok turus kiak nongak kirak hapan longoi ah, tului iyok bokobisuk iyam taꞌai ah bokesah. Mahkak ulun-ulun pun taꞌai ngindoi iyok arok nohtok ah aꞌang jok motaher nuk Lovuk Hotalak kotului erih iyok iyam taꞌai nuhtui.

23 Uwas ohpah noh gilir korejak ah nuk Lovuk Hotalak, Jakaria pun bulik noku lovui ah. 24 Iyam tahik hulik erih, Elisabet oruh ah botohik, khavui bokuvuk nuk luvang lovuk limok bulan kotahiu ah. 25 Khavun Elisabet marak ah: “Uwas tahik noh ulun-ulun mokiak ahkuk tului tomanang, totahpik ihtuh noh jok konguan Tuhan ahkak kuk. Iyok masik mbak ahkuk, khavun huntuh Iyok kanik ngahpus kojaek kuk nuk husuk ulun arok.”

26 Kotihkak Elisabet bobutui onom bulan, Hotalak nyuhuk molekat Gabriel tulak noku kota Nazaret, nuk Galilea. 27 Gabriel sonyuhuk noku icok behtik bavik honong beleh ah ngarai ah Maria. Maria botunang umbak icok behtik ngarai ah Yusup, koturun lacak Daud. 28 Molekat erih lombut noku Maria, khavui marak ah: “Ngandah noh ihkok jok kongomberkat Hotalak! Hotalak arok humbak-mbak ihkok!”

29 Nyonih auh molekat erih Maria pusong, sohinggak iyok bokisok luvang ahtoi ah, inon manak auh ah tuh beh. 30 Mahkak molekat erih marak ahkai ah: “Arak ihkok mihkoh Maria, tului ihkok cucuk umbak huang Hotalak. 31 Ihkok ahkan bobutui khavun ahkan nganak anak kinyam bahkas, ihkok nyamah nongak ngarai Ah Yesus. 32 Iyok ahkan hajok khavun Iyok ahkan tonaꞌah Anak Hotalak jok Paling Isung. Tuhan Hotalak ahkan nguan Iyok jadik Lacak havoi umbak Daud, tahtuk ajuh Ah lomoi. 33 Khavun Iyok ahkan jadik Lacak momorintah unuk isung koturun Yakub yarok tihkas nyamah ah. Nyiring havun Korajaan Ah iyam ahkan niho.”

34 Totahpik Maria mutah molekat erih: “Ahkuk tuh honong beleh kuk, inon kolo ah aꞌang erih touk nyolung ahkak kuk?”

35 Khavun molekat erih mutah ah: “Roh Hotalak ahkan lombut noku ihkok khavun kuasak Hotalak jok Paling Isung ahkan tohkak isung ihkok, tului erih noh Anak jok ahkan kongarok muk rih pomarak Anak Hotalak, jok Kudus.” 36 Nyonih ah noh pios-pios, Elisabet jok jolaham harik erih uwas bobutui onom bulan, khavun ahkan nganak anak kinyam bahkas oluk poh iyok uwas okok khavun pomarak ulun tomanang. 37 Tului bagin Hotalak iyam arok jok motaher.

38 Umbot erih Maria marak ah: “Ahkuk tuh jihpon Tuhan. Nguai ah noh solung ahkak kuk numun jok kongohavot muk rih.” Khavun molekat erih turus tulak nohtah Maria.

39 Umbot erih Maria turus tulak noku icok kapung nuk Yudea, kapung erih nuk daerah puruk. 40 Nuk anai iyok nyolong noku lohpo Jakaria dorok avui ah. Kotihkak iyok nyolong, iyok naꞌah Elisabet. 41 Khavun kotihkak Elisabet nyonih taꞌah Maria, nopicak ngandah noh anak jok unuk luvang butui ah, khavun Elisabet pun konguasak Roh Hotalak. 42 Mbak auh jok mohing iyok bokesah: “Maria, ihkok noh bavik jok paling kongomberkat Hotalak nuk holang paring bavik. Khavun kongomberkat noh anak kinyam jok ahkan konganak muk erih! 43 Iyai ahkuk ihtuh sohinggak inai Tuhan kuk lombut noku ahkuk? 44 Kotihkak kuk nyonih taꞌah muk, anak nuk luvang butui kuk nopicak ngandah. 45 Utung noh ihkok, tului ihkok pocayak inon jok pomarak Tuhan ahkam muk erih ahkan torjadik.”

46 Maria bokesah:

56 Sokitar toluk bulan kotahiu ah Maria mocon hicok humbak umbak Elisabet, khavui bulik noku lovui ah nuk Nazaret.

57 Kotihkak uwas cuhkup noh bulai ah, Elisabet dimbit. Iyok dimbit icok behtik anak kinyam bahkas. 58 Kotihkak ulun hokosilak lovuk khavun dolang arik konduang ah nyonih yamios kopios Tuhan umbak Elisabet, idoh pun ngandah umbak iyok.

59 Beteng anak kinyam erih umur ah jaluk ondo, ulun-ulun erih lombut ahkan malax iyok. Idoh kanik nguan ngaran anak kinyam erih Jakaria havoi mbak ngaran amai ah. 60 Totahpik Elisabet marak ah: “Arak! Iyok alah tok nguan ngarai ah Yohanes.”

61 “Iyam arok icok behtik pun tahkan arik konduang muk jok numun ngaran erih,” hiyon doh ahkan Elisabet. 62 Khavun umbak kihpai kirak, idoh ngisok Jakaria ngaran inon jok kanik iyok napak ngaran anak ah.

63 Jakaria nyavot icok bahtuk tulih khavui nulih: “Ngarai ah Yohanes.” Khavun paring doh pusong. 64 Beteng erih kak Jakaria hulik touk nuhtui, khavui momuji Hotalak. 65 Ulun-ulun jok hokosilak lovuk erih mihkoh, khavun tarung erih soup nuk paring kapung daerah puruk Yudea. 66 Paring ulun jok nyonih aꞌang erih bokisok luvang ahtoi doh: “Ahkan jadik inon kiak anak erih havun?” Kotului Tuhan humbak-mbak iyok.

67 Jakaria, amai Yohanes, konguasak Roh Hotalak sohinggak iyok ngesah Auh tahkan Hotalak. Iyok marak ah:

80 Khavun Yohanes erih mahik hajok khavun mahik muhat roh ah. Iyok mocon nuk lahpang baras, nyiring docok noh kotihkak ah iyok ngesah Auh Hotalak ahkan bangsak Israel.