Lucas i

Dos Moppiyon Dinoggan no id Sulat ni

LUCAS

Unna nod Bosan

Iddos id sulat ka‑ay, si Lucas no sokkad no doktor woy mooggot kos kopomakoy rin ki Disas Krays. Sikandin mandad kos mid sulat to libru nod ngoranan no Pinuungan amoy id posuppay ka‑ay’n libru. Konna Judio si Lucas su iddos tribu rin, Griego woy id pomon sikandin diyot Antioquia no dakkoon bonuwa no sakup to Siria.

Dos id sulatan ni Lucas, si Teofilo nod ikohiyon no sokkad taddot mgo ponguu no id oubpa riyot bonuwa to Roma.

Id sulat ni Lucas inin libru, su amoy od kosorollan ni Teofilo iddos kovonnaan moka‑atag ki Disas Krays. Id kopi‑i rin no iddos langun no minuvu, labbi ron en iddos konna mgo Judio, od pokosaddoo ko ondoy si Disas Krays. Id kopi‑i rin mandad no od kosorollan dan iddos id puungan woy id nonaw ni Disas Krays, woy dos po‑ukit to kod‑undini rin to ampow’t ingod amoy od tobbus to langun nod pomakoy kandin.

Dos mgo Nokota‑aw:

Dos dontulon to kodsulat ka‑ay (1:1‑4)

Dos kodtobbow woy dos ko‑onakoy ni Juan no Tohodboutismu woy ki Disas (1:5 taman to 2:52)

Dos pinuungan ni Juan no Tohodboutismu (3:1‑20)

Dos kodboutismu woy kodgeddam ki Disas (3:1 taman to 4:13)

Dos nonaw woy dos mokososoobbun pinuungan ni Disas diyot Galilea (4:14 taman to 9:50)

Dos kod‑undiyon ni Disas to Galilea taman diyot Jerusalem (9:51 taman to 19:27)

Dos nonaw woy pinuungan ni Disas diyot Jerusalem (19:28 taman to 23:56)

Dos kodbadnow, dos kodpokita woy dos kodbatun tod Longaggon (24:1‑53)