Ʉkʉjɨtuufya ɨnyumba jaa Kyala
Ʉlwɨmbo ʉlwa kʉfyʉka.
132
Gwe NTWA, ʉnkʉmbʉkege Ndaabɨti,mbʉtolwe bwake boosa ʉbʉ aataamiigwe.
2 Gwe NTWA, ʉkʉmbʉke muno aakʉlapiile,
muno aafingiile ʉlʉfingo kʉmyako, gwe gwa maka gwa Jaakobo,
3 alɨnkʉtɨ, “Ndikwingɨlamo nnyumba jangʉ,
pamo ʉkʉlambalala pa kɨtala kyangʉ,
4 amaaso gangʉ aagatikʉgonamo ʉtʉlo,
pamo ʉkʉsipʉka,
5 mpaka nʉmmwagɨle ʉbʉjo bwa kwitʉʉgalapo ɄNTWA,
ɨnyumba jaake ʉmwene maka gwa Jaakobo!”
Ndaabɨti aatile,
6 “Ʉko kʉ Efulatia twapɨliike ɨsya ibokosi lya lwitɨkano,
twalyagile mmigʉnda gya Jealimu.b
7 Tʉbʉʉke mu nyumba jaa NTWA,
tʉkiipuutege nkyeni nkɨkota kyake ɨkya bʉtwa.
8 Gwe NTWA, sumuka! Ʉbʉʉke kʉbʉjo bwako ʉbwa kʉtʉʉsya,
gwingɨle pamopeene ni ibokosi lya lwitɨkano, ɨlya maka gaako.
9 Abapuuti baako bafwɨkigwe ʉbʉgolofu,
abiikemo baako baluluutɨlege akaluulu kaa lʉsekelo.”
10 Kʉnongwa jaa Ndaabɨti ʉmbombeli gwako,
ʉlɨngankaanaga ʉmpakigwa amafutac gwako.
11 ɄNTWA aalɨnndapiile Ndaabɨti ʉlʉfingo lwa nalooli,
ʉlʉfingo ʉlʉ atikwisa kʉlwandʉla,
aatile, “Jʉmo ʉgwa ndʉjungu lwako,
ngwisa kʉmmbɨɨka pa kɨkota kyako ɨkya bʉtwa.
12 Abaanaako lɨnga bikʉlʉkola ʉlwitɨkano lwangʉ,
nʉ kʉsikonga ɨndagɨlo ɨsi ngʉbamanyisya,
po na baanaabo boope,
bikwisa kʉtʉʉgalaga pa kɨkota kyako ɨkya bʉtwa bwila na bwila.”d
13 ɄNTWA nalooli akasalile akaaja akaa mu Syoni,
ikʉnyonywa ʉkʉtʉʉgalamo,
14 aatile, “Apa po pabʉjo bwangʉ ʉbwa kʉtʉʉsya bwila na bwila,
po pabʉjo bwangʉ, namanga mpasalile.
15 Angʉbasaja abenekaaja nʉ kʉbapa ɨfi bikʉlonda,
ngwisa kʉbiikʉtɨsyaga ɨfindʉ abalondo baake.
16 Abapuuti baake ngwisa kʉbafwɨkaga ʉbʉpoki,
abiikemo baake bikwisa kʉluluutɨlaga nʉ lʉsekelo.
17 Ngwisa kʉntupukɨsya Ndaabɨti ʉbʉnyafyale bwake ʉbʉkʉlʉmba,
nʉ kʉntendekekesya ɨnyaale ʉmpakigwa amafuta gwangʉ.
18 Abalʉgʉ baake ngwisa kʉbafwɨka ɨsoni,
looli ʉmwene ʉbʉtwa bwake bukwisa kʉnogaga.”