Ʉlwipuuto lwa kʉkɨsʉʉmɨla ɨkiisʉ ʉkʉja nɨ mboto
Kʉ mpaali gwa lwɨmbo. Ʉlwɨmbo ʉlwa Banya Koola.
85
Gwe NTWA, gwakɨsajile ɨkiisʉ kyako,gwabagomokiisye ɨsajo aBanyaisilaɨli.
2 Gwabahobokiile ʉbʉtʉlanongwa abandʉ baako,
gwasiswile ɨmbiibi syabo syosa. Sela
3 Gwasilekile ɨngalalɨsi syako syosa,
gwasanwike, gwabʉlekile ʉbʉkalɨ bwako.
4 Kyala gwe mpoki gwɨtʉ, ʉtʉgomokesye amaka,
ʉlɨngatʉkalalɨlaga ʉswe.
5 Bʉle, kʉtʉkalalɨlaga bwila na bwila?
Kʉjaga nɨ ngalalɨsi kʉ sopelo syosa?
6 Bʉle, ʉtikʉtʉpaga kangɨ amaka,
ʉkʉtɨ twe bandʉ baako tʉsekelege?
7 Gwe NTWA, ʉtʉnangɨsye iipyana lyako,
ʉtʉpoke ʉswe.
8 Ngʉmpɨlɨkɨsyaga ɨsi ikʉjoba Kyala,
namanga ɄNTWA abafingiile ʉlʉtengaano abandʉ baake,
abasʉngʉligwa baake aba basookilemo mbʉkonyofu.
9 Nalooli ʉbʉpoki bwake bʉlɨ pa bʉpiipi, kʉlɨ aba bikʉntiila,
ʉkʉtɨ ʉbʉsisya bwake bʉjege nkiisʉ kyɨtʉ.
10 Iipyana nʉ bwanalooli aafikwaganila,
ʉbʉgolofu nʉ lʉtengaano aafikʉlʉngana.
11 Ʉbwanalooli aabukʉmela pakiisʉ bo ʉlwa mpiki,
ʉbʉgolofu aabukʉsuluka ʉkʉfuma kʉmwanya.
12 Nalooli, ɄNTWA aikʉtʉpa ɨfinunu,
ɨkiisʉ kyɨtʉ kikʉjaga nɨ mboto.
13 Ʉbʉgolofu bukʉtalapo nkyeni mwa Kyala,
bukʉtendekesya ɨnjɨla jaa kwendamo ʉmwene.