Ʉlwipuuto lwa lʉtuufyo
Ʉlwɨmbo ʉlwa Ndaabɨti.
27
ɄNTWA jo lʉmuli lwangʉ, nʉ bʉpoki bwangʉ,nʉntiilege jwani?
ɄNTWA lyo ilinga lya bʉʉmi bwangʉ,
nʉntetemege jwani?
2 Ababomba mbiibi lɨnga bikʉʉnyiisɨla,
kʉkʉʉngoga,
abalʉgʉ bangʉ aba bikʉlwa na niine,
bikwitabania nʉ kʉgwa paasi.
3 Nalɨnga ɨkɨlʉndɨlo kya basikali kɨɨsyʉngʉʉtiile,
ʉne andikʉtiilaga.
Nalɨnga bwite bukʉʉnyiisɨla,
poope ngʉkʉsʉʉbɨlaga, gwe NTWA.
4 Akandʉ kamokeene nʉnsʉʉmile ɄNTWA,
aka ko aka ngʉkalonda,
njege mu nyumba jaa NTWA,
amasikʉ goosa mbʉʉmi bwangʉ,
mbʉkeetege ʉbʉnunu bwake ɄNTWA,
nʉ kʉsʉʉma ʉbʉlongosi bwake mu tempeli jaake.
5 Namanga iisikʉ ɨlya bʉtolwe,
aikʉʉfisa ʉne mbʉjo bwake,
aikʉʉfisa mu nyumba jaake ɨnyiikemo,
aikʉʉmbɨɨka pa lwalabwe.
6 Apo aikʉmbela ʉkʉbatola,
abalʉgʉ bangʉ aba baasyʉngʉʉtiile.
Po angʉsekelaga nʉ kʉmpaala ɄNTWA,
bo ngʉsoosya iikemo mu heema jaake.
7 Gwe NTWA, ʉlɨɨpɨlɨka ɨnguuto jangʉ,
ʉlɨɨmbaakɨsya nʉ kʉʉnyaamula.
8 Ɨndumbula jangʉ jikʉtɨ,
“Isaga, ʉnndonde ɄNTWA.”
Ɨndumbula jangʉ jikʉtɨ,
“Gwe NTWA, ngʉkʉlonda.”
9 Ʉlɨngiifisaga kʉmyangʉ,
ʉlɨngangagaga kʉ bʉkalale ne mbombeli gwako,
jo ʉgwe ʉlɨ ntʉʉli gwangʉ.
Gwe Kyala, ʉmpoki gwangʉ,
ʉlɨngandaaga pamo ʉkʉʉndeka.
10 Nalɨnga taata na jʉʉba bikʉʉndeka,
looli ɄNTWA aikʉʉnyambɨlɨla.
11 Gwe NTWA, ʉʉmanyisye ɨnjɨla syako.
Ʉʉndongosye mu njɨla ɨngolofu,
paapo abalʉgʉ bangʉ bingi.
12 Ʉlɨngaandeka ʉkʉgwɨla kʉ balʉgʉ bangʉ,
aabikʉʉmbombela ɨsi biiganile.
Bikʉʉnjobela ɨnongwa ɨsya bʉtʉngʉlʉ,
bikʉlonda ʉkʉʉfulasya ʉne.
13 Ngʉsʉʉbɨla ʉkʉtɨ angʉbʉbona ʉbʉnunu bwa NTWA,
nkiisʉ kya bʉʉmi.
14 Ʉnsʉʉbɨlege ɄNTWA.
Ʉjege nkifu, ʉlɨngoonyokaga amaka,
kangɨ ʉnsʉʉbɨlege ɄNTWA.