Cetáma 4

19Avril. Martin BONDE. Nous devons faire une note en bas de page pour dire que la petite phrase "Tí taá yɛ̀ɛ̀di." ne figure pas dans plusieurs versions. Mais certaines l'ajoutent pour expliciter cette partie (vt.8). Faire une illustration de tente (vt.20).

Kàyɛ̰́ɛ̰̀ nà Àbɛ́dì.

¹ Kà Àdám̀ é múná dɔɔdí n'ɔ̀ɔ poòo Ɛ́fù, k'ó póń é pɛdá Kàyɛ̰́ɛ̰̀, ye wɔ̀ni è yɔ̀: N nɛdà é pɛdá nìdo nà Weèdi kú nɔɔ̀ti. ² K'ó tṵ́má póń é pɛdá Kàyɛ̰́ɛ̰̀ ya̰ǹta kà ta yèdi tonà Àbɛ́dì. Kà Àbɛ́dì é kpɛ̰́ń é hḭn hɔ̰ɔ̰̀cɛ̰nto, kà Kàyɛ̰́ɛ̰̀ mɛnn é hḭn ka̰ǹká̰ńto.

³ K'yé m'péé, kà Kàyɛ̰́ɛ̰̀ é toó-ní yɛ̀ɛ̀di diití é tɛ̀ni é pa̰a̰ Kɔ́yɔ̀ɔ. ⁴ Kà Àbɛ́dì mɛnn é deèda-ní o nɔtí mɛhɛká, hɔ̰ɔ̰̀dapàka o hɔ̰̀ci de cedí é pɛdá-ka kà kà suu dɛ́dɛ́í è káá kɔ̀ma. K'ó tɛ̀ni é kà kɔ̀ù é deèda ka maǹsuucí é pa̰á̰ dɔ̀hɔ̀di Kɔ́yɔ̀ɔ kpɛ́mú. Kà Kɔ́yɔ̀ɔ óò sɛda sukú, é ta̰ǹta o pa̰dí. ⁵ Há̰kà Kàyɛ̰́ɛ̰̀ mɛnn, nì p'óò tà̰ǹtà n'ɔ̀ɔ kú pa̰dí. K'yóò dɔnka dɛ́dɛ́í, k'òo yìhìka é fɔùda. ⁶ Kà Kɔ́yɔ̀ɔ óò béka è yɔ̀: Badà pa̰nà kà fɔ̰́di áa cɛ̰dí k'àa yìhìka é fɔùda mɛma kú bookú? ⁷ K'à pa̰kú k'yè sudi n kó tṵ́má áa ta̰ǹta-á-ma. Àmá k'à pa̰kú mìì pú suu-sá, k'á n'yá̰á̰ è yɔ̀ sḭ̀ḭ̀ma dɔɔ́ a há̰ńnùdi è yònà nɔsḭ̀ǹta è kpɛ̀i áa nɛdá, yè há̰ yònà fɔ̰́ń-dà è mà nɛdá.

⁸ Nà mɛma baàkaà, daadí yènì kà Kàyɛ̰́ɛ̰̀ é caka o ya̰ǹn Àbɛ́dì è yɔ̀: Tí taá yɛ̀ɛ̀di4:8 Ye wɛɛnɔ̀dì kɔ́ɔ́ pɔ̀kàhi tɔɔhí mɛhɛká. Há̰kà, hìcɔ̰́ nì tɔ̀hɛ̀nà è kpɛ̀i é wekàna ye bɛ̀m̀bɛ̀nì-dà.. Kà pá yídá é ka̰há̰ é tɛ̀i kà Kàyɛ̰́ɛ̰̀ é cɛ̰ɛ̰́ o ya̰ǹn óò kɔ̀ù. ⁹ Kà Kɔ́yɔ̀ɔ óò béka è yɔ̀: A ya̰ǹn Àbɛ́dì péé ya? K'ó tɛ̰́ná è yɔ̀: N yá̰á̰ nkɛ́ɛ̀? Mmí-dà yòǹ o ceíko-a? ¹⁰ Kà Kɔ́yɔ̀ɔ yɔ̀: A pa̰nà badà ye pesà-ní? N you k'àa ya̰ǹta hḭ̀ma kɔǹ teǹka háá kà ma boòku é ta̰ntá-ní n pesá è békú n yeda ta kpɛ́mú. ¹¹ Mìì tee-sá k'á hḭn mɛma, n k'áa nɔda-á-ma k'á nátá-nà teǹka mɛ̀ǹkà hàdà-ka ka nùdi é nìì a ya̰ǹta hḭ̀ma a hútà-ma. ¹² A té kó ká̰ńta teǹka kà koò pú k'áa pɛdá yècɛ̰́ɛ̰̀. A baà kó n'centì è yíńti-í-ma tenkà hḭ́ǹka é n'yòǹ cà̰ǹn tɔɔ̀pa yìhìka, é n'kɔ́ɔ́ a kó kaàdi-sá. ¹³ K'ó tɛ̰́ná Kɔ́yɔ̀ɔ è yɔ̀: Náńkú a n toò-ku n wɛhi-nà sàma-dà, n pú kó nɛɛ́ kù toó. ¹⁴ Ǹtɛ yenì k'à n bɔ̀haà tennaaká hḭ́ǹka, k'yè békú n nátá a yìhìka é taá sɔ̀di. N kó n'centì è yíńti-í-ma teǹka hḭ́ǹka, é n'yòǹ cà̰ǹn tɔɔ̀pa yìhìka, é n'kɔ́ɔ́ n kó kaàdi-sá. Nìi mɛ̀ǹǹ kó n peèta-nà-ko wɛǹni kó nɛɛ́ n kɔ̀ù-ú-ma. ¹⁵ Kà Kɔ́yɔ̀ɔ óò tɛ̰́ná è yɔ̀: Kà mɛ̀ǹǹ a kɔ̀ù-ko, n kó yeda a kpɛ́mú é bodá ye bàǹti cɔ̀ku màyehì-dà. Ye wɔ̀ni k'óò pa̰ná yḭdó k'yé teha k'òòcɔ̰́ǹ ò pètà-nà ò dá ò kɔ̀ù. ¹⁶ Kà Kàyɛ̰́ɛ̰̀ é yídá é nátá-nà Kɔ́yɔ̀ɔ pesá é taá kaàdi Nɔ̀ɔ́tì^a teǹka, kà kà péé Èdɛ́nì yɛ̀ɛ̀di hḭ́ńkà bɛ́kàma.

Kàyɛ̰́ɛ̰̀ yaàbíiká fùdikú

¹⁷ K'ó múná dɔɔdí n'ɔ̀ɔ poòo, k'ó póń é pɛdá bíidatá kà pà tà tonà Hènɔ́kì. K'ó yídá é maá yɔtí é tì pa̰a̰ ye bíitá yèdi. ¹⁸ Kà Hènɔ́kì é pɛdá Ìdátì, kà Ìdátì mɛ̀ɛ té pɛdá Màhùyàɛ́dì, kà Màhùyàɛ́dì é yídá pɛdá Mɛ̀tùsàɛ́dì, kà Mɛ̀tùsàɛ́dì é pɛdá Dèmɛ́kì. ¹⁹ Kà Dèmɛ́kì é tódá poòpa pàdɛ́ɛ́, kà cecedó kú yèdi héé Àdáà, dɛ́ɛ̀do Sídà. ²⁰ Kà Àdáà é pɛdá Yàbádì. O kú bííhí fùdikú-dà cèǹtì è wohú nɔtí, è wentí fḭ́ḭná mɛhɛká. ²¹ Yàbádì de káá-ma ya̰ǹn kà p'òò tonà Yùbádì. O kú yaàbíiká-dà béńti kódìti è tṵ́mà heu-nà heuhí. ²² Kà Sídà mɛ̀ɛ té pɛdá bíidatá kà ta yèdi tonà Tùbádì-Kàyɛ̰́ɛ̰̀, k'ò yòǹ mádo è máì máafɔ̀ùti nɛǹti nà máamɔ́ntí kpɛ́ɛtí. O potɔ̰ɔ̰̀ɔ̰ yèdi-dà de dɛɛ̀ Nààmá. ²³ K'yé m'péé, kà Dèmɛ́kì é caka o poòpa Àdáà nà Sídà è yɔ̀: Àdáà nà Sídà, n besí-nà. N poòpa-nà, besí-nà sukú n kó n'yɔ̀pu: Kà nìdo n potà n k'óò kɔ̀ù-ú-dà, kà kadapàm̀bíitá n pa̰à̰ bòdi n kó tà kɔ̀ù-ú-ma. ²⁴ Weèdi hḭ́n kà nìdo kɔù Kàyɛ̰́ɛ̰̀, nì kó yeda o kpɛ́mú é bodá ye bàǹti cɔ̀ku màyehì-dà. Há̰kà mmí nɛ cakú è yɔ̀ kà nìdo kɔù mmí, pà kó yeda n kpɛ́mú é kɔ̀ù nììpa púyehì nà pàyehì-dà é nɛɛ́ bodá ye bàǹti.

²⁵ Kà Àdám̀ é tṵ́má múná dɔɔdí n'ɔ̀ɔ poòo Ɛ́fù, k'ó póń é pɛdá bíidatá k'òo poòo é tà yíí è yɔ̀ Sɛ́tì, mìì tee-sá ò de yɔ̀: Weèdi n pɛ̰ḭ bíitá tɔɔ̀ta kà tà kó fiɔ̀wa Àbɛ́dì fìɔ̀di, Kàyɛ̰́ɛ̰̀ kɔ̀ù-ko. ²⁶ Kà Sɛ́tì mɛ̀ɛ té pɛdá bíitá é tà yíí è yɔ̀ Ènɔ́sì. Ye kú wɔ̀ni-dà nììpa cetà-ma Weèdi dɔɔ̀pu è nì yún è tonà Kɔ́yɔ̀ɔ.