Yesu ˆakamuhöri omubhabharu orosiko ro Riikane
14
Orosiko rumu ro Riikane,
Yesu ꞉naaghiire kuraaghëra awaache omokoro umu o Mabharisaayo.
Hano are muyo,
Amabharisaayo na abhaato abhande bhano ꞉bhaare hayo,
bhaakabha bharamwisuncha chwee.
2 Ibheere,
hayo ambërë yaache,
naare‑ho omooto umu uno are no obhubhabharu bho kobhimba omobhere.
3 Yesu akabhabhoori Amabharisaayo,
na abheeghi bha meghiro,
akabhugha,
“Kana,
ntoghwisherereru ne emeghiro ghiito kuhöri abhaato orosiko ro Riikane,
ghasi tiyaanyi?”
4 Amare ibho,
bhaghakira.
Yesu akamoturi omubhabharu uyo,
akamuhöri,
akamwisherereri agharuke aka.
5 Akamara Yesu akabhabhoori,
“N‑niwe ghate yaanyu uno angʼömbë yaache,
a hamu atikere yaache,
eragho mwiribha orosiko ro Riikane,
atangayeruusiri?”
6 Abhaato bhayo,
bhataare na re ghugharokeri.
Ghwitabharera asooko
7 Yesu akarighi kebhuno abhaghëni bhayo ꞉bhaare bhariyahurera ebhetumbe bhe mbërë bhe sooko.
Niho akabhabhoorera eghetuubhaani,
arabhugha,
8 “Hano okubha uraghiinu mo‑bhughëni bho riirugha,
otiikara mo‑bhetumbe bhe mbërë.
Otaköra hangʼu gho kubha,
mbaghotora kubha bhamuraghiini owonde o sooko ghoghokera iye.
9 Uno are abharaghiini inyu bhabhere,
nakuucha ghokobhoorera,
‘Omotighere uno omweya waache.’
Hayo,
nokorighi chaasoni chwee,
gho kubha nooghuye ghwikara mo‑bhetumbe bhe nyuma.
10 “Mbe,
hano okubha uraghiinu mo‑bhughëni,
oghi wiikare ebhetumbe bhe nyuma.
Hano uno akubha abharaghiini akuucha,
akobhoorere,
‘Musaani waane,
nuuche hano ambërë,
niho hakurëngʼaaniire iye ghwikara.’
Hayo nookubha uhaabhuru asooko ambërë e bhaghëni bhayo bhoose.
11 Wiiki,
omooto woose uno aghwitiiri,
Eryobha ndekomwiki haase.
Omooto woose uno aghwitoora haase,
Eryobha ndekomotiiri ighoro.”
12 Akamara,
Yesu akamobhoorera uno are amuraghiini,
“Aribha uköriire abhaato obhughëni,
otaraghani abhasaani bhaacho,
na abhahiiri bhaacho,
koru abhaatani bhaacho abhaame.
Oraköra hangʼu,
ibho bhoose mbaghokuraghani,
na hangʼu nookubha orehuru kino ore obhaköriire.
13 “Mbe,
örëënda kobhakörëra abhaato obhughëni,
uraghani abhahabhe,
na abharëma,
na abhabhëëru,
na abhahuku.
14 Neekubha ngʼoni ghokoocho,
gho kubha,
ibho bhataanyi ne egheghiro ghe ghokoreha.
Eryobha niryo reghokoreha,
eriibhagha re kobharyoki abhaato bhaache abhahëënë.”
Eghetuubhaani ke bhaghëni bha riirugha
15 Mbe,
umu o bhayo ꞉bhaare bhiikeere mo‑bhiinyakurë,
hano oghwire amangʼana ghayo gha Yesu,
akamobhoorera akabhugha,
“Ngʼoni,
omooto uno akubhöna omweya o kuraaghëra mo‑bhughëni bho bhutëmi bho Ryobha!”
16 Yesu akamugharokeri gho ghetuubhaani akabhugha,
“Naare‑ho omooto umu,
uno ꞉asëëmiri obhughëni bhokoro,
akaraghani abhaato bhaaru chwee.
17 Eriibhagha re bhughëni hano rehikiri,
akamotoma omusësë waache kwo bhano are araghiini bhoose,
abhabhoorere,
‘Muuche ibheere!
Kira egheghiro nkimariri ghuköru!’
18 “Amare,
abhaghëni bhoose,
ke umu umu bhaakabha bhararuusi ebhiitamereri,
bharasabha abhaabhërë.
Ibheere,
o mumbërë akamobhoorera,
‘Neghoghusabha ondigheri changori,
gho kubha neghoriri omoghondo,
nekwëndëru neghi koworighi.’
19 Owonde akabhugha,
‘Neghoghusabha ondigheri changori,
gho kubha neghoriri changʼömbë ikomi che korema.
Ibheere,
ˆneeghaye ghochisaki.’
20 Wiiki owonde akabhugha,
‘Nekwiriri omukari,
gho ghayo,
nteeghotora kuucha.’
21 “Omusësë uyo aghagharuka,
akamobhoorera omutëmi waache ghayo ghoose.
Niho omutëmi waache aghakarara chwee,
akamobhoorera omusësë waache,
‘Nooghi ibheerebheere,
mo‑nchëra ankoro na mo‑chanchëra chansuuhu che moghya uno,
obharëëtë hano abhahabhe,
na abharëma,
na abhahuku,
na abhabhëëru.’
22 “Akamara,
omusësë uyo aghagharuka,
akamobhoorera akabhugha,
‘Omutëmi,
ghaare ontomiri neghaköriri.
Koru hangʼu,
okeere onyi‑ho omweya.’
23 “Omutëmi akamobhoorera,
‘Mbe!
Oghi anche e moghya mo‑chanchëra chino cheeghuye mo‑bhyaro ebhesuuhu,
na mo‑meghondo,
obhahaamërëri abhaato bhaache bhasöhë mo‑ka yaane,
mbagha yiichore.
24 Amare,
bhaare neere niraghiini ekimbërë,
ˆnekabhabhoorera kubha taanyi‑ho koru umu o bhayo uno aghusama obhughëni bhoone!’”
Eriighori re kubha omughëndi o Yesu
25 Yesu,
naare araghënda haghirohamu ne erikinda ikoro re bhaato reramutambana,
aghiishoorori,
akabhabhoorera akabhugha,
26 “Omooto wowoose uno akwënda kubha omoonamwegha waane,
nakwëndëru ansiighe eni ghokera ishe,
na nyina,
no omukari waache,
na abhaana bhaache,
na bhaömööbhö,
koru atiisiigha omwene.
27 Omooto uno ataaghughëgha omusarabha waache,
na ghuntambana,
taaghotora kubha omoonamwegha waane.
28 “Tobhughe aribha umu ghate yaanyu nakwënda kwabhëka omunara.
Mbe,
taakwabhëka akeere ghwikara singa,
na ghutëma eriighori re bheghiro bhyose bhino akwënda kwabhëkëra omunara uyo.
Araköra hangʼu,
niho akumënya aribha naanyi na chambiiri che ghwisha kumareereri eryabhëka riyo.
29 Mbe,
araanga ghuköra hangʼu,
naghotora kwabhëka obhoroso,
aramara akeyu kumareereri omunara.
Niho mooto woose uno akoheta hayo,
naakubha aramutaraaha,
30 arabhugha,
‘Omooto uno nasëëmiri kwabhëka,
amare taatoriri kumareereri eryabhëka!’
31 “Tobhughe omutëmi umu nakwënda ghuye kurööna no omutëmi owonde.
Naghwikara singa ibhoori aribha iwe na abhakëëya bhaache ebheku ikomi naghotora kurööna no omutëmi uno anyi na abhakëëya ebheku miröngö ebhere.
32 Ararighi kubha naghokindu,
hayo hayo nakobhatoma abhaato bhaache,
bhaghëndë bhwango kwo mutëmi uyo owonde akeere anyi kurë,
bhatabhare omurëmbë.
33 “Hangʼu hangʼu,
taanyi‑ho koru umu ghokoonyu uno aghotora kubha omughëndi waane,
aribha ataamara atigha bhyose bhino anyi nabhyo.
Omoonyo uno otaanyi no obhwëra