Okwibhoru kwo Yesu Kirisito
2
Mo‑chaasiko chiyo Yohana ꞉ibhwiru,
Kayisaari Aghosito akabhugha kubha,
abhaato bhoose bha chaase cheeche,
bhaghëndë kwiyandëka.
2 Okwiyandëka kuyo niko koore o kumbërë,
kwo riibhagha rino Kureniyo are omukangati mo‑mukööwa o Siiriya.
3 Mbe,
abhaato bhoose bhaaghaye kwiyandëka,
omooto woose mo‑moghya o waabho.
4 Yusubhu woose akaru mo‑moghya o Nasareeti mo‑mukööwa o Ghariraaya,
aghatiira ghuye mo‑mukööwa o Yuteya mo‑moghya o Bheserehemu,
gho kubha Bheserehemu niwe ore omoghya o Tawuti,
na Yusubhu naare o mo‑rwibhoro rooche.
5 Kwo riibhagha riyo,
Yusubhu aghaye kwiyandëka haghirohamu na Mariyamu,
omorwacheru obhuku waache.
Mariyamu nawe n‑inda are.
6 Eriibhagha bhaanyi iyo,
okwibhora kooche ghokahika.
7 Akiibhora omoona o kebhureni omutange waache,
akamokundekeri changibho.
Akamuraari mwitore,
gho kubha,
bhataabhwine omweya mo‑chanyumba che bhaghëni.
Abhariishi ˆbhakarweru na marayika
8 Haghuhe no omoghya uyo,
mbaare‑ho abhariishi ꞉bhaare bharachonga chaatugho cheebho obhotiko.
9 Hayo hayo,
bhakarweru na marayika umu o Mutëmi.
Emirëngaari ghe bhokumi obhokoro bho Mutëmi ghekabharëngaari chambaara choose,
bhaghatiina chwee.
10 Amare marayika uyo akabhabhoorera akabhugha,
“Motatiina!
Mutëghëërërë,
ˆnekabharëëtëra angʼana anchömu ino eghotegheri chwee abhaato bhoose.
11 Reero ino mo‑moghya o Tawuti,
Omotoori waanyu niibhwiru.
Omotoori uyo niwe Kirisito Omutëmi.
12 Ekyërëkërëri ghe köbhëërëkërëri ghayo,
nikyo kino,
mokubhöna ekengʼwerere ke moona kiraariru mwitore,
kebhishuru changibho che keena.”
13 Hayo hayo marayika uyo are,
hakarwera ebheku bhe bhamarayika bhaghëndi bhaache koru Mwishaaro.
Bhaakabha bharaghongi Eryobha bharabhugha,
14 “Eryobha re Mwishaaro reghongibhu!
No omurëmbë ubhe mo‑se yoose,
kwo bhaato bhano Eryobha resiighiri!”
15 Bhamarayika bhayo,
hano bhagharokiri Mwishaaro,
abhariishi bhakabhugha,
“Tughëndë Bheserehemu,
korighi ghano Omutëmi atobhooriire.”
16 Mbe,
bhaaghaye bhwango bhwango,
bhakabhöna Mariyamu na Yusubhu,
bhakarighi ekengʼwerere,
kiraaruru mwitore.
17 Hano bhamorooche omoona uyo,
bhakabhabhoorera abhaato amangʼana ghoose,
ghano marayika wuure ꞉abhabhooriire ighoro yaache.
18 Abhaato bhoose hano bhooghwire amangʼana ghano bhabhooriiru na abhariishi bhayo,
bhakahagha chwee.
19 Amare,
Mariyamu aghaghatoora ghayo ghoose mo‑motema waache,
akabha araghiihëëbha.
20 Bhakamara,
abhariishi bhayo bhaghagharuka ino bharareghongi Eryobha,
na korekumi gho ghano ghoose ꞉bhooghwire na ghogharighi.
Kinya bhuure ꞉bhaabhooriiru na marayika,
hangʼu ghoose ꞉ghaabheere.
21 Omoona uyo,
hano ahikiri chaasiko inyaanye,
bhakamusaara,
bhakamoroka Yesu.
Niryo eriina rino marayika wuure,
are amorokiri,
eriibhagha nyina are akeere ghughëgha anda.
Yesu ˆbhakamuhaana kwo Waryobha
22 Chaasiko che komusu koobho Yusubhu na Mariyamu,
cheghasira,
kinya ꞉yëëndiiru mo‑meghiro ghe Musa.
a Mbe,
bhakamohira omoona uyo Yerusareemu,
kubha bhamuhaane kwo Mutëmi Waryobha.
23 ꞉Mbaamohiriri gho kubha,
꞉yaandëkuru mo‑meghiro ghe Mutëmi kubha,
“Omoona woose o mumbërë o ghesubhe,
nakwëndëru ahiru ambërë e Mutëmi.”b
24 Wiiki,
꞉mbëëndiri bharuusi eriruusi re komusu kinya reghughambu mo‑meghiro ghe Mutëmi,
“Moruusi eriruusi re bheghuuti bhibhere,
hande amaana abhere gha chaasarari.”c
25 Hayo Yerusareemu,
naare‑ho omooto umu,
eriina reeche Simiyooni.
Simiyooni uyo naare muhëënë ambërë e Ryobha araresooka,
ino araghanya korighi ghotooribhu kwo Abhiisiraeri.
Akörö Ahörëëru neere haghirohamu nawe.
26 Neere imariri komobhoorera kubha,
taaghoku,
ataamara arighi Kirisito o Mutëmi o Ryobha.
27 Ibheere abhiibhori bhaache,
꞉mbaamohiriri Yesu Mwisëngërö,
kubha bhakörë bhuure emeghiro ghekwërëkërëri.
Simiyooni uyo,
Akörö Ahörëëru ekamukangata kubha asöhë‑mu.
28 Akamwimoki omoona Yesu,
ino araghongi Eryobha arabhugha,
29 “Oo Omutëmi omokoro,
ibheere nongatighiri
eni omutamishi waacho,
neku kwo murëmbë,
gho kubha nuköriri kinya ꞉ombooriire,
30 niroochiire obhotoori bhoocho,
31 bhuno usëëmiri ambërë e bhaato bha chaase choose.
32 Obhotoori bhuyo n‑emirëngaari ghe ghokwërëkërëri
anchëra yaacho mo‑bhaato bha matöngö,
na asooko mo‑bhaato bhaacho Abhiisiraeri.”
33 Amangʼana ghayo Simiyooni ꞉abhughiri ighoro e moona uyo,
ghakabharoghoori chwee abhiibhori bhaache.
34 Simiyooni akabhiitabheri hayo,
akamobhoorera Mariyamu,
nyina o moona uyo akabhugha,
“Tëghëërëra!
Omoona uno,
꞉naahwiru ne Eryobha,
naghoghwishi na nakobhabhooki Abhiisiraeri abhande bhaaru.
Naakubha ekimanyenkereri na abhaato mbaghokyanga,
35 gho ghayo,
amiihëëbhö gha emetema ghe bhaato bhaaru ngeekubha haheero.
Niiye mo‑motema waacho nokooghu obhororo chwee,
kinya ongʼuturu ne ekinyamiino.”d
36 Hayo naare‑ho murööti umu,
omukari mokungu chwee,
eriina reeche Ana,
omuukë o Bhanweri,
o ritöngö re Asheeri.
Ana uyo,
꞉naamariri emeeka mohungate hangʼu anyi no omosubhe waache,
achekumara mosubhe waache uyo aghaku.
37 Akabha mosino akahikera eghita ke meeka miröngö enaane ne ene na takwiruru.
Naare araghe Mwisëngërö,
ghusëngëra Eryobha obhotiko no omwishe gho ghusabha na kwiyima ebhiinyakurë.
38 Kwo riibhagha riyo,
Ana akahika hayo ꞉bhaare Simiyooni,
na Yusubhu,
na Mariyamu no omoona uyo,
aghasëëma koreghongi Eryobha.
Arabhabhoorera amangʼana gha moona uyo,
mo‑bhaato bhayo ꞉bhiitëngʼiire kubha,
Eryobha ndeghotoori Yerusareemu.
39 Yusubhu na Mariyamu,
hano ꞉bhaare bhamariri ghuköra ghoose ghano emeghiro ghe Mutëmi ghyëndiri,
bhaghagharuka awaabho mo‑moghya o Nasareeti,
mo‑mukööwa o Ghariraaya.
40 Omoona uyo aghakora,
na aghaköngʼa,
na akangʼiiniha,
naare ariitabheru ne Eryobha.
Omoona Yesu Mwisëngërö
41 Abhiibhori bha Yesu mbaare bhasiighiri ghuye Yerusareemu kira mooka,
mo‑nyangi e Bhaasaka.
42 Ibheere,
hano Yesu are omoona o meeka ikomi ne ebhere,
bhaaghaye nawe iyo kurëngʼaana na asughara yaabho.
43 Hano chaasiko che nyangi iyo chesiriri,
abhiibhori bha moona uyo bhaghagharuka aka,
amare iwe aghasaagha Yerusareemu.
Nabho bhataamënyiri aribha asaaghiri iyo.
44 Ibho bhaghiituuri kubha naghugharuka aka na abhaghëndi bhaache.
Eriibhagha riyo,
mbaare bhaghëndiri mwishe moghima bhaanyi mo‑nchëra,
amare bhataamotooriri mo‑miisho.
Niho bhaghasëëma komutabharera mo‑bhahiiri bhaabho na mo‑bhasaani bhaabho.
45 Hano abhoriri,
bhaghagharuka Yerusareemu,
bharamtabhara.
46 Orosiko ro ghatato,
bhakamubhöna Mwisëngërö,
ikeere ghateghate e bheeghi.
Naare arabhatëghëërëra,
arabhabhoori amabhoori.
47 Abhaato bhoose hano bhooghwire kebhuno are arabhugha,
bhakahagha chwee ighoro e miihëëbhö ghaache na amagharokeri ghaache.
48 Abhiibhori bhaache hano bhamorooche,
bhakahagha chwee.
Nyina akamobhoori akabhugha,
“Aa!
Omoona waane,
neke otuköriire hangʼu?
Mööhi!
Eni ni iso ntoore tuhahiri chwee,
toraghutabhara!”
49 Akamugharokeri akabhugha,
“Neke moore morantabharera?
Moteeche kubha nekwëndëru kuhööya Mwisëngërö re Taata waane?”
50 Erigharokeri re Yesu,
abhiibhori bhaache bhataarimënyiri.