Yesu ˆakaryoka
16
Hano orosiko ro Riikane rohetiri,
Mariyamu o koru mo‑moghya o Maghitara,
na Saroome,
na Mariyamu nyina waache Yakobho omonyi o Yoose,
bhaghaghora amaghuta gha keneeso ghichömu,
kubha bhaghi bhahake erihundughu re Yesu.
2 Orosiko o rumbërë ro wiiki atabhoori,
mo‑rungʼöörö,
bhaaghaye mo‑mbeehera e Yesu.
3 Hano ꞉bhaare mo‑nchëra,
bhaghasëëma kwibhoori bharabhugha,
“Ibheere,
n‑niwe aghotoruuseri eriibhohe riire ikoro mo‑ghisëku ke mbeehera?”
4 Amare hano bhahikiri,
bhakarighi eriibhohe riyo rehiringituru,
reenyi rubhareka,
ndeere ikoro chwee.
5 Hano bhasöhiri mo‑mbeehera,
bhakarighi omobhureni umu abheekiri andachana indë yeero,
ikeere eribhaara re kwiro.
Abhakari bhayo bhakaroghoora chwee.
6 Niho akabhabhoorera akabhugha,
“Motaroghoora.
Nyeeche kubha mokomutabhara Yesu o Nasareeti,
uno ꞉bhaamumambiri mo‑musarabha.
Naryokiibhu,
taanyi hano!
Mumööhi hano niho bhaare bhamuraariri.
7 Ibheere mughëndë,
mobhabhoorere abhaanabheegha bhaache,
ahanene Bheetero,
kubha Yesu nabhakangatiri ghuye Ghariraaya.
Iyo niho mokomorighi kinya abhabhooriire.”a
8 Hano bhooghwire hangʼu,
bhaghasëëma ghosingisa kwo bhotiini na kuhagha.
Bhakahoroka anche,
bhakangʼösa koru hayo.
Bhatamobhooriire omooto wowoose angʼana iyo,
gho kubha ꞉mbaatiiniri chwee.
Yesu ˆakamorwera Mariyamu o Maghitara
[
9 Hano Yesu aryokiri mo‑rungʼöörö orosiko o rumbërë ro wiiki,
akiyëërëkani singa o Mariyamu o Maghitara,
uno are amoruusiri emisambu mohungate.
10 Mariyamu o Maghitara aghaye,
akabhabhoorera abhaanabheegha bhano ꞉bhaare haghirohamu na Yesu,
kwo riibhagha riyo mbaare bhakeere bhararera na kwihiinyërëra.
11 Amare hano bhooghwire kubha Mariyamu o Maghitara namorooche Yesu anyi muhöru,
bhataakumiri.
Yesu ˆakabharwera abhaanabheegha bhabhere
12 Orosiko ruyo ruyo,
Yesu akabharwera bhabhere ghate e bhaanabheegha bhaache.
Abhaanabheegha bhayo mbaare mo‑nchëra,
bharaghe mo‑meghondo.
Bhataatoriri komumënya,
gho kubha naare ne eghisösö ekende.
13 Hano bhamumënyiri,
bhaghagharuka kobhabhoorera abhaghëndi bhaabho,
amare abhaanabheegha bhayo,
bhataakumiri.
Yesu ˆakabharwera abhaanabheegha ikomi na umwa
14 Antenero,
Yesu ˆakabharwera abhaanabheegha bhaache ikomi na umwa,
hano bhaare haghirohamu,
bhararaaghëra.
Akabhahiinya gho ghiri e bhuköngʼu bho metema gheebho,
gho kubha ꞉mbaangiri ghoghakumi amangʼana gha bhaghëndi bhaabho bhano bhamorooche Yesu hano ꞉aryokiibhu mo‑bhaku.
15 Niho akabhabhoorera akabhugha,
“Mughëndë mo‑se yoose,
muraghani Angʼana Anchömu kwo bhaato bhoose.
16 Omooto wowoose uno aghokumi na kubhatiisu,
naghotooribhu.
Amare,
omooto wowoose uno akwanga ghokumi,
naghoteneru ekiina.
17 Abhaato bhano bhamokumiri,
mbaghuköra ebhyërëkërëri bhino,
mbaakubha bhararuusi emisambu mo‑bhaato kwo riina reene na ghosiikëra gho ghighambo ekihë,
18 mbaghughööta chanchöka kwo mabhökö,
koru bharanyo egheghiro ghyokyose kino gheghotora kobhiita,
bhataaghoku.
Mbaakubha bharatoora amabhökö ghaabho mo‑bhabhabharu,
bhahöra.”
Yesu ˆaghaghëghu ghuye Mwishaaro
19 Hano Omutëmi Yesu amariri ghosiikëra nabho,
Eryobha rekamwimoki rekamohiki Mwishaaro.
Aghiikara eribhaara re kwiro re Ryobha.
20 Abhaanabheegha bhaache bhaare bhaghatanura hayo,
bhaaghaye kuraghani Angʼana Anchömu haghiro hoose,
ino Omutëmi Yesu naare arabhaha changuru che ghuköra ebhyërëkërëri.
Hangʼu nibhu are arahëënëhi amangʼana ghayo kubha n‑gha hëënë.]